1Mandaj Diosta alicachinguichi, paica aligumari.
Pai llaquinaca, causaita causaicamanmi.
2Mandaj Dios quishpichishcacunaca, fiñaj runapaj
maquimanda cacharichi tucushcacunami canguichi.
Shinamandami, paita alicachina canguichi.
3Tucui cai pachamandami tandachimurca.
Indi llujshimuj ladomanda, indi huashajuj
ladomanda, jahua ladomanda,
urai ladomandami tandachimurca.
4Ñambash illaj, jichushca pambapi, chulunlla
pushtupimi, chingashca purinajurca.
Maipi causana pueblopash na taririjpimi purinajurca.
5Yarjaimanda, yacunayaimanda ña
huañunallacunami purinajurca.
6Chashna ninan llaquipi cashpami, Mandaj
Diostaca caparishpa mañanajurca.
Paimi, chai llaquicunamandaca llujchirca.
7Ali ñandami, paicunataca pushamurca.
Causanalla pueblopi causaj shamuchunmi pushamurca.
8Mandaj Dios ninanda llaquishcamandaca alicachinguichi.
Huañuna aichayu runacunaman, jatun manllarinacunata
rurashcamandapash alicachinguichi.
9Imagupash illajmambash, na munangacamanmi caran.
Yarjachijmambash, ashtaca alicunatami caran.
10Huaquingunaca, yana yana tutapi, huañui
japinalla llandupimi causanajurca.
Llaquichi tucushpa, cadenacunahuan huatai
tucushpami tianajurca.
11Mandaj Dios rimashca shimicunata, paicunallata
na cazushcamandami, chashna tianajurca.
Jahua pachapi causajuj Dios ali yuyaiguta
cushcatapash, na uyanayachircachu.
12Chaimandami shinlli ruranacunapi churajpi,
paicunaca shungu faquirinshna llaquita apanajurca.
Paicuna urmajpi jatarichingapaca, pipash na tiarcachu.
13Shina ninan llaquipi cashpami,
Mandaj Diostaca caparishpa mañanajurca.
Paimi, chai llaquicunamandaca llujchirca.
14Yana yana tutamandapash, huañui
japinalla llandumandapashmi llujchirca.
Imahuan huatashcatapash fitircami.
15Mandaj Dios ninanda llaquishcamandaca alicachinguichi.
Huañuna aichayu runacunaman, jatun manllarinacunata
rurashcamandapash alicachinguichi.
16Paica, bronce pungucunataca faquircallami,
jirru aldabacunatapash ñuturcallami.
17Juizu illajcunaca, paicunallata na cazushpa
causashcamandami, llaquichi tucunajurca.
18Paicunapaj shungupica, tucui
micunatami millanayachirca.
Shina cashpami, huañuna punguman ña chayanajurca.
19Shina llaquipi cashpami, Mandaj
Diosta caparishpa mañanajurca.
Paimi, chai llaquicunamandaca llujchirca.
20Paipaj shimihuan rimashpa alichishpami,
jatun llaquimandaca llujchirca.
21Mandaj Dios ninanda llaquishcamandaca alicachinguichi.
Huañuna aichayu runacunaman, jatun manllarinacunata
rurashcamandapash alicachinguichi.
22Paiman animalcunata cushpa huañuchishpa alicachinguichi.
Pai ima alicunata rurashcataca, cushijushpa villaichi.
23Mama cuchata jatun barcocunapi urai
shamushpa, randishpa jatujcunaca,
24paicunami Mandaj Dios imatalla
rurashcacunataca ricunajurca.
Shinallata yacu ucucunapi jatun manllarinacunata
rurashcatapashmi ricunajurca.
25Pai rimashpami, ninan huairata jatarichirca.
Chai huairami, caiman chaiman cuyurijuj
yacutapash ashtahuan jatarichirca.
26Jahua pachacaman vichai rinshnapash, manllanayai
ucu ucu yacucunaman huashajunshnapashmi tucunajun.
Paicunapaj shunguca, jatun llaquipimi yacuyanshna tucun.
27Manllaimanda chujchushpami, machashcashna cuandranajun.
Paicuna tucuita ali yachajushcapash yangallatami.
28Chashna llaquipi cashpami, Mandaj
Diosta caparishpa mañanajun.
Paimi, chai llaquicunamandaca llujchin.
29Paimi, ninanda huairajujtaca saquichishpa,
caiman chaiman cuyurijuj yacutapash,
casilla cachun ruran.
30Yacu casilla tucujpimi cushijunajun.
Chashnami Diosca, barcocuna shayarina
paicuna munashca pushtuman chayachin.
31Mandaj Dios ninanda llaquishcamandaca alicachinguichi.
Huañuna aichayu runacunaman, jatun manllarinacunata
rurashcamandapash alicachinguichi.
32Tucui gentecuna tandanajushcapi jatunyachinguichi.
Mandaj rucucuna tandanajushcapipash alicachinguichi.
33Diosca, jatun yacutapash, jichushca pambata ruranllami.
Yacucuna llujshijujtapash chaquichinllami.
34Grano fucuj ali alpacunatapash,
na fucuj alpaman tigrachinllami.
Chai alpapi causajcuna jatun nalita
rurashcamandami, chashna ruran.
35Jichushca pambapipash, yacu cuchata ruranllami.
Chaquishca pambapipash, yacu llujshijujta ruranllami.
36Chaipimi, yarjachijcunata causachun churan.
Paicunami, causana pueblota rurashpa callarichin.
37Pambacunapi tarpushpami, uvascunata tarpunajun.
Chaicunaca, ashtaca granocunatami fucunajun.
38Chaicunaca, Dios bendiciajpimi, ashtacapacha miranajun.
Paicunapaj animalcunapash, na tucurinllu.
39Chai jipaca, yangapi churai tucushpa,
pingaichi tucushpami causanajun.
Jatun millai nali runacuna jatun llaquicunahuan
ninanda llaquichijpimi, chashna causanajun.
40Yangapi churai tucunataca, Diosllatami
tsirapachinshna, mandajcunapaj jahuapi cachamun.
Shinami paicunataca chingashca, ñambash
illaj, yanga purinajuchun saquin.
41Paillatami imagutapash na charij runataca,
llaqui causaimanda jatarichin.
Familiacunatapash, corralpi llamatashnami mirachin.
42Ima nalitapash na rurajcunaca,
chaita ricushpa cushijuichi.
Nalita tucui rurajcunaca, shimita vichaichi.
43Caicunata pactachingapaca, ¿pipash
ali yachajushca tianllu?
Shina tiashpaca, Mandaj Dios ninanda
llaquij cajta yachangami.
Who We AreWhat We EelieveWhat We Do
2025 by iamachristian.org,Inc All rights reserved.
