ÉXODO 24 - Quichua Imbabura Bible

Moisespash, mandaj rucucunapashmi, Sinaí urcupi cashca

1Mandaj Diosca, Moisestaca cashnami nirca:

—Cambash, Aarón, Nadab, Abiú shuti runacunapash, israelcunata mandaj rucu puramanda canchis chunga rucucunapash, Mandaj Dios ñuca ñaupajman vichai shamuichi. Chaipica, carumandallata urai cumuringuichi.

2Shina cajpipash Moisesllami, Mandaj Dios ñucapajman quimirimungui. Paicunaca na quimirimungachu. Israelcunapash, canhuanga na vichai shamungachu— nircami.

3Moisés shamushpaca, Mandaj Dios tucui ima nishca shimicunata, tucui mandashcacunatapashmi israelcunaman villajurca. Shina villajujpimi, tucui gentecuna shujllashnalla tucushpa:

—Mandaj Dios rimashca tucui shimicunataca, rurapashunllami— nishpa tigrachinajurca.

4Moisesca, Mandaj Dios tucui ima nishca shimicunata escribishpami, tutamandata jatarishpa, urcu chaqui uraman shuj altarta rurarca. Shinallata chunga ishcai Israel aillucuna imashna tiashcashnallatami, chunga ishcai rumicunata shayachirca.

5Shina rurashpaca, Israel puramanda chairalla viñaicunatami cacharca. Paicunami, Diosman animalcunata cushpa tucuillata rupachinajurca. Shinallata Mandaj Dioshuan ali cangapajpash, shicucunata cushpami huañuchinajurca.

6Moisesca, chai yahuartaca chaupita japishpami, jatun tastacunapi churarca. Caishuj chaupitaca, altar jahuapimi tsirapachijurca.

7Shinallata Dioshuan ari ninajushpa escribishca librota japishpami, israelcuna uyajta leyirca. Shina leyijpimi paicunaca, cashna ninajurca:

—Ñucanchica, Mandaj Dios tucui ima nishcata cazushpa rurapashunllami— ninajurcami.

8Chai jipami Moisesca, yahuarta japishpa israelcunapaj jahuapi tsirapachishpa, cashna nirca:

—Ricuichi, tucui caicunata rurangapaj, Mandaj Dios cangunahuan ari ninajushcata ricuchij yahuarmi— nircami.

9Chai jipaca Moisespash, Aaronbash, Nadadpash, Abiupash, israelcunata mandaj rucu puracunamanda canchis chunga rucucunapashmi vichai rinajurca.

10Shina rishpaca, israelcunapaj Taita Diostami ricunajurca. Paipaj chaqui ucupica, alpapi zafiro nishca rumicunata mandashcashnami carca. Tutamanda casajujpi, jahua pachapi punchapamba ricurijunshnami carca.

11Ashtahuangarin Diosca paipaj maquitaca, israelcunata mandajcunapaj jahuapi chutashpa, na llaquichircachu. Shinamandami, Taita Diosta ricushpapash micunajurca, ufianajurca.

12Chai jipami Mandaj Diosca, Moisesta cashna nirca:

—Ñucapajman, urcuman vichai shamushpa, chaipi shuyangui. Chaipimi, tabla rumicunatapash, mandashca shimicunatapash, israelcunata yachachingapaj mandashpa ñuca escribishcatapash cusha— nircami.

13Shina nijpimi Moisesca, paita servij Josuendi jatarirca. Shina jatarishpami Moisesca, Taita Diospaj urcuman vichai rirca.

14Mandaj rucucunataca, cashnami nirca:

—Cangunapajman ñucanchi tigramungacaman, caipillata shuyanajuichilla. Ricuichi Aaronbash, Hur shuti runapash cangunahuanmi. Maijan cashpapash llaquita charishpaca, paicunapajman ringuichilla— nircami.

15Shina nishpa urcuman Moisés vichai rijpimi, urcutaca fuyu quilparca.

16Mandaj Diospaj punchapambaguca, Sinaí shuti urcupimi tiajurca. Fuyuca, urcutaca sucta punllacamanmi quilpariajurca. Canchis punlla tucujpica, chai fuyu chaupimandami Moisesta cayarca.

17Mandaj Diospaj punchapambaguca, urcu pundapica nina pillurishpa rupajunshnami, israelcunapaj ñavipica ricurijurca.

18Moisesca, fuyu chaupiman yaicushpami, urcuman vichai rirca. Moisesca, urcupimi chuscu chunga punllata, chuscu chunga tutata tiajurca.