1Chuscu huata, iscun quillata jatun mandaj Darío ña mandajujpimi, cashna tucurca: Quisleu shuti quillapaj chuscu punllapimi Mandaj Diosca, cai shimicunata Zacariasman villarca.
2Chai punllacunami, Bet-el shuti pueblopi causajcunaca, Sarezer shuti runatapash, Regem-melec shuti runatapash, paicunapaj runacunandi, Mandaj Diosta mañachun cachashca carca.
3Shinallata tucuita Mandaj Diospaj huasipi causaj curacunata, profetacunata cashna nishpa tapuchumbashmi cachashca carca: “¿Picha quilla chayajpica, huacanachu canchi? ¿Punda huatacuna rurashcashnallata, na micushpa catinachu canchi?” nichunmi cachashca carca.
4Chaimandami tucuita Mandaj Diosca, cai shimicunata cashna nishpa villahuarca:
5“Cai llactapi tucui causajcunata, curacunataca cashna ningui: ‘Cangunaca, cai canchis chunga huatapaj picha quilla, canchis quilla chayajpi na micushpa mañashpa huacashpaca, ¿ñucata yarishpachu chashna na micushpa mañarcanguichi?
6Micushpapash, ufiashpapash, ¿nachu cangunapajllata micunguichi, ufianguichi?’ ningui” nihuarcami.
7¿Nachu cai shimicunataca, Jerusalenbi causajcunapash, chai pueblo muyundi pueblocunapi causajcunapash, Neguev shuti, Sefela shuti pambacunapi causajcunapash, aliguta causanajujpillata Mandaj Diosca, pai ima nishcata punda villajcunahuan villachirca?
Diosta na cazushcamandami, prezu apai tucushca8Mandaj Diosca cai shimicunatami, Zacariasman cashna nishpa villarca:
9“Tucuita Mandaj Diosca, cashnami nin: ‘Ima llaquita alichinapipash, chashna cashcatapacha ricushpami alichina canguichi. Tucuicunallata cangunapaj huauquicunataca juyashpa, llaquishpa causaichi.
10Sapalla mamagutapash, taita mama illaj huahuagutapash, caru llactamanda shamushca runatapash, imaguta na charijtapash na llaquichishpa charinachu canguichi. Cangunapaj huauquicunatallataca, ucu shungupillapash na fiñanachu canguichi’ ninmi” nishpami villarca.
11Shina nijpipash na uyanayachishpami, ashtahuangarin huashaman tigrarishpa, ama uyangapaj rinrita llapirinajurca.
12Paicunapaj shunguca, diamante nishca rumishna tucushpami, tucuita Mandaj Dios, paipaj Espirituhuan punda villajcunaman mandashcatapash, pai ima nishcatapash, na uyanajurca. Chaimandami tucuita Mandaj Diosca, paicunataca ninandapacha fiñarca.
13Chaimandami tucuita Mandaj Diosca, cashna nin: “Paicunahuanga cashnami tucurca: Caparishpa ñuca cayajpipash, paicunaca na uyarcachu. Chashnallatami, paicuna caparishpa mañanajujpipash, na uyarcani.
14Ashtahuangarin paicunataca, na rijsishca tucui llactacunamanmi, jatun acapanahuanshna llujchishpa, caiman chaiman cacharcani. Paicuna rishca jipami, paicunapaj llactaca, llaquinayaita tucuchi tucurca. Chai llactamanga, pipash na rircachu, pipash na tigrarcachu. Paicuna munashca llactataca, jichushca pambatami saquinajurca” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
