DEUTERONOMIO 22 - Quichua Imbabura Bible

1Cambaj huauquipaj huagra, na cashpaca paipaj maltun llama chingashca purijujta ricushpaca, ama na ayudashpa sanquinguichi. Ashtahuangarin cambaj huauquipajmanmi, apashpa rina cangui.

2Cambaj huauquishna cashpapash, na cambaj ladolla causangachu, na cashpaca na rijsishcami canga. Shina cajpica, chai animaltaca cambaj huasiman apashpa, cambaj huauqui tapuj shamungacaman charinguilla. Tapuj shamujpica tigrachinguilla.

3Burrota tarishpapash, churajunata tarishpapash, chashnallatami tigrachina cangui. Cambaj huauqui imata chingachishcata tarishpapash, chashnami tigrachina cangui. Paitaca, ama na ayudashpa saquinguichu.

4Cambaj huauquipaj burro, na cashpaca paipaj huagra ñambi urmashca sirijujta ricushpaca, ama saquishpa ringuichu. Ashtahuangarin uchallami jatarichina cangui.

5Huarmica, na jaripaj churajunata churajungachu. Jaripash, huarmipaj churajunataca, na churajungachu. Canda Mandaj Taita Diosca, maijan chashna rurajcunataca millanayachinmi.

6Ñanda rijushpami, ima quirupi cashpapash, na cashpaca pambapi cashpapash, alasyu maijan animalpaj tazindapash huahuacunandi, na cashpaca lulundi taringui. Chai alasyu animalca huahuacunata, na cashpaca lulunda ugllashca tiajujtami taringui. Shina tarishpaca mamataca, na huahuacunandi apanachu cangui.

7Mamataca calpachun saquishpa, huahuacunatalla apangui. Shina rurashpaca, tucuipi ali llujshishpami unaita causangui.

8Mushuj huasita huasichishpaca, huasi jahua muyundipi patata rurangui. Shina rurashpami, maijambash chai jahuamanda urmashpa huañujpipash, na juchachi tucungui.

9Uvasta tarpujushpaca, imapash shuj granocunandica, ama tarpunguichu. Chashna tarpujpira, caishuj granopash, uvas chagrapash tucuilla chinganman.

10Na huagrahuan, burrohuan yugushpa yapunachu cangui.

11Llama milmahuan, lino puchahuan chapushpa ahuashca churajunatapash, na churajunachu cangui.

12Manto nishca cambaj jahualla churajuna chuscundi esquinapica, flecosta na churanachu cangui.

Chaira cazarashcacunata mandashcami

13Maijan cashpapash, cazarashpa paipaj huarmipi chayashca jipami, na ricunayachinga.

14Shinamandami imapash nalita ricushpa, cashna nishpa rimanga: ‘Cai huarmitami, ñuca huarmi cachun japishpa, paipi chayarcani. Paitaca, shuj jarihuan ña tacarishcatami ricurcani’ ningami.

15Shina nijpica, chairalla viñai chai cuitsapaj taita mamaca, chairalla viñai chai cuitsataca, maijan jarihuambash nara tacarishcata ricuchingapajmi, pueblopi mandaj rucucunapajman, shuj ricuchinata pueblo punguguman apamunga.

16Chai cuitsapaj taitaca, chai rucucunamanmi cashna ninga: ‘Ñuca ushitami, paipaj huarmi cachun, cai runaman curcani. Paica na ricunayachijunllu.

17Ricuichi, paica yanga juchachishpallami, cambaj ushica, shuj jarihuan chayarishcami cashca nijun. Ashtahuangarin ñuca ushi pihuambash nara tacarishca cajtaca, cai ricunata ricupaichilla’ ningami. Shina nishpami, pueblopi mandaj rucucunapaj ñaupajpi, chai cuitsapaj churajunata mandashpa ricuchinga.

18Chaita ricuchijpimi, mandaj rucucunaca chai runata japishpa llaquichinga.

19Chai runataca, jarihuan nara tacarishca Israel cuitsata tucuicuna yachachun yanga juchachishcamandami, patsaj culquita japishpa, chai huarmipaj taitaman cunga. Chai huarmihuanllatami, causashpa catinga. Chai huarmitaca, tucui causaipi na jichui ushangachu.

20Ashtahuangarin chai cuitsataca, shuj jari ña tacarishcami ricuringa.

21Shinamandami paipaj taitapaj huasi punguman llujchishpa, chai pueblopi causanajuj jaricuna, rumicunahuan pegajpi huañunga. Paipaj taitapaj huasipi huainayashpa, Israel puracunapi nalita rurashcamandami, chashna huañuchinga. Chashna rurashpami, canguna purapi tiaj nalitaca anchuchingui.

22Maijan runatapash cazarashca huarmihuan sirijujta japishpaca, ishcanditami huañuchina. Chai huarmihuan sirijushca runapash, huarmipashmi huañunga. Chashna rurashpami Israel purapi tiaj nalitaca anchuchingui.

23Jarihuan nara tacarishca shuj cuitsami, maijanhuambash cazarangapaj ari nishca canga. Chai cuitsataca, pueblopi shuj jari japishpami paihuan siriringa.

24Shinamandami ishcandita, pueblo punguman apashpa, rumicunahuan canguna pegajpi, ishcandi huañunga. Chairalla viñai chai cuitsaca, na caparishcamanda jarica, paipaj cumba runagupaj huarmita japishpa pingaichishcamandami, chashna huañunga. Chashna rurashpami, canguna purapi tiaj nalitaca anchuchingui.

25Ashtahuangarin cazarangapaj ari nirishca shuj cuitsata, pambapi shuj runa tuparishpa, munai na munai paihuan siririshpaca, chai cuitsahuan siririj runallami huañunga.

26Ashtahuangarin cuitsataca, imatapash na runanachu. Paita huañuchingapaca, ima nalitapash na rurashcachu. Maijan cashpapash, paipaj cumba runaguta fiñashpa huañuchinshnami, caipica tucun.

27Cazarangapaj ari nirishca chai cuitsa pambapi pailla cajpimi, munai na munai japijpi ninanda caparijpipash, paita mitsangapaca pipash na tiarca.

28Maijan runa cashpapash, cazarangapaj nara ari nishca, jarihuan nara tacarishca cuitsata maipi tuparishcapi, munai na munai paihuan siririshcatami yachanga.

29Shinamandami, chai cuitsahuan tacarishca runaca, chai cuitsapaj taitaman picha chunga culquita cunga. Chaipaj jipami, chai cuitsata pingaichishcamanda, paihuanllata cazarashpa tucui causaipi na jichui ushanga.

30Paipaj taitapaj huarmitallataca, pipash na cazarangachu. Paipaj taitapaj camatapash, na yangapi churangachu.