ISAÍAS 37 - Quichua Imbabura Bible

Judá llactataca, Senaquerib shuti runa llaquichinamandami cacharichishca(2 Rey. 19:1-37; 2 Crón. 32:20-23)

1Chashna villajta uyashca jipami, cashna tucurca: Jatun mandaj Ezequías shuti runaca, pai churajushcata liquishpami, cañamuhuan quilparishpa, Mandaj Diospaj huasiman shamurca.

2Chai jipami, mayordomo Eliaquim shuti runatapash, escribij Sebna shuti runatapash, curacunata mandaj rucucunatapash, cañamuta churajushcata, Dios ima nishcata villaj Isaiaspajman cachamurca. Isaiasca, Amoz shuti runapaj churimi carca.

3Paicunaca cashnami ninajurca: “Ezequías runaca, cashnami nin: ‘Cunanmari jarcashpa rimai tucuna, nali shimicunahuan rimai tucuna, ninan llaqui punllapi canchi. Huahuata unguna punlla pactajpi, huahuata unguj huarmi, ushai illanshnami canchi.

4Rabsaces nishca mandaj rimashcataca, canda Mandaj Taita Diosca uyangapashchari. Asiria llactata jatun mandaj, paipaj amomi paitaca, causajuj Taita Diosta nali shimicunahuan ninanda nalicachishpa rimachun cachamushca. Chashna rimashcataca, canda Mandaj Taita Diosllata uyapashcami. Shina cashcamanda cunanga, caipi huaquin puchushcacunamanda, Diosta mañajupailla’ ninmi” nichunmi cachamurca.

5Chaita villangapajmi, Ezequiasta servijcunaca, Isaiaspajman shamurca.

6Isaiasca, paicunataca cashnami nirca: “Cangunapaj amotaca, cashna ninguichi: Mandaj Diosca, cashnami nin: ‘Asiria llactata jatun mandajta servijcuna, nali shimicunahuan ñucata ninanda rimashcamandaca, ama manllaichu.

7Ricui, ñucami paipica shuj espirituta churasha. Shinamandami paica, ninan manllanayaita uyashpa, paipaj llactaman tigranga. Paipaj llactapimi paitaca, espadahuan huañuchi tucuchun saquisha’ ninmi ninguichi” nijurcami.

8Rabsaces nishca mandaj tigrashpaca, Asiria llactata jatun mandajtaca, Libna shuti pueblopi causajcunahuan macanajujujtami tuparigrirca. Laquis shuti pueblomanda ña rishcata yachashpami, paica tigrarca.

9Ashtahuangarin Asiria llactata jatun mandajca, Etiopia llactata Tirhaca shuti jatun mandaj, paihuan macanajungapaj shamujun nijtami uyarca. Chaita uyashpami, paipaj randi parlajcunataca, Ezequiasman cashna nichun cachamurca:

10“Judá llactata jatun mandaj Ezequiastaca, cashna ninguichi: ‘Can yariashpa causajungui, chai cambaj Taita Dios umachijuchunga, na saquinachu cangui. Paica Jerusalendaca, Asiria llactata jatun mandajpaj maquipica na churashachu ningami.

11Ricui, Asiria llactata jatun mandajcuna imatalla rurashpa, tucui llactacunata tucuchishcataca canllata uyaranguimi. Shina cajpipash, ¿canrachu quishpirigringui?

12Ñuca ñaupa taitacuna tucuchishca llactacunataca, ¿maijan dioscunallapash cacharichi usharcachu? Chai taitacunaca, Gozán, Harán, Resef shuti pueblocunapi causajcunatapash, Edén shuti llactapi tiajuj Telasar shuti pueblopi causajcunatapashmi tucuchirca.

13¿Hamat, Arfad, Sefarvaim, Hena, Iva shuti pueblocunata jatun mandajcunaca maipita?’ ninguichi” nichunmi cachamurca.

14Ezequías runaca, jatun mandajpaj randi parlajcuna apamushca cartacunata, paicunapaj maquimanda japishpami leyirca. Chai jipami, Mandaj Diospaj huasiman vichai rirca. Chaipimi chai cartacunataca, Mandaj Diospaj ñaupajpi pascarca.

15Shina ricuchishpami Ezequiasca, cashna nishpa Mandaj Diosta mañarca:

16“Tucuita Mandaj, israelcunapaj Taita Dioslla, canga querubín nishcacunapaj chaupipimi causajungui. Canllami, tucui cai pachapi mandajuj llactacunapaj Taita Dios cangui. Jahua pachatapash, cai pachatapash canmi rurarcangui.

17Mandaj Dioslla, aliguta uyapairi. Mandaj Dioslla, cambaj ñavita pascashpa ricupairi. Senaquerib rimachun cachamushcatapash uyapairi. Paica, causaj Taita Diosta nali shimicunahuan rimachunmi cachamushca.

18Mandaj Dioslla, Asiria llactata jatun mandajcunaca, shuj llactacunataca paicunapaj alpacunandi tucuchircapachami.

19Paicunapaj dioscunatapashmi rupachinajurca. Chaicunaca, na dioscunachu carca. Ashtahuangarin runacunapaj maquihuan rurashca caspicuna, rumicunallami carca. Chaimandami, chashna tucuchinajurca.

20Cunanga, ñucanchita Mandaj Taita Dioslla, chai jatun mandajpaj maquimanda ñucanchita cacharichiyari nipanimi. Cai pachapi mandajuj llactacunapica, Mandaj Diosca canlla tiajta yachachun, chashna rurapairi” nishpami mañarca.

21Chaimandami, Amoz shuti runapaj churi Isaiasca, Ezequiasman cashna nichun cacharca: “Israelcunata Mandaj Taita Diosca, cashnami nin: ‘Asiria llactata jatun mandaj Senaquerib llaquichishcamanda imatalla ñucata mañashcataca uyarcanimi’ ninmi.

22Mandaj Diosca, chai jatun mandajtaca cai shimicunatami rimarca: ‘Sionbi causajcunaca, jarihuan nara tacarishca cuitsagu asijunshnami, candaca yangapi churashpa na cazushpa asinajun. Jerusalenbi causajcunaca, can tigrashpa rijpica umata cuyuchishpami asinajun.

23¿Pitata ninanda nalicachijurcangui? ¿Pitata nali shimicunahuan rimajurcangui? ¿Pitata shinlli rimashpa jariyashpa ricujurcangui? Israelcunapaj jucha illaj Diostamari chashna rimajurcangui.

24Canda servijcunahuanmi, Jatun Diostaca ninanda nalicachishpa rimashpa, cashna nijurcangui: Ñucapaj ashtaca carretacunahuanmi, urcu pundacunaman, Líbano shuti urcu jahuacunaman vichai risha. Chaipimi, jatun cedro quirucunata, ashtahuan ali ciprés quirucunata urmachisha. Chaipica, ashtahuan jatun urcu pundacamanmi risha. Juyailla jihua junda bosque pambacunamanmi risha.

25Ñucami, pugyuta allashpa yacuta ufiarcani. Egiptopi tiaj jatun yacucunataca, ñuca chaquihuan sarushpami chaquichisha nijurcanguimi.

26Chashnataca, punda huatacunallata ñuca rurashcataca, ¿nachu uyashcangui? Chaitaca, punda punllacunallata ñuca ruranata yarijushcataca, ¿nachu yachashcangui? Cunanga, ñucami candaca pushamurcani. Canmi, jatun pircahuan jarcashca pueblocunataca urmachishpa, rumi mundungunatalla saquingui.

27Chai pueblocunapi causajcunaca, na shinllicunachu carca. Paicunaca manllashpami musparinajurca. Paicunaca, pambapi jihuacunashna micuna llullu jihuacunashna, huasi jahuapi jihuacuna nara ali viñashpallata chaquishcashnami.

28Candaca, imashna cajtapash tucuitami yacharcani. Can maiman llujshijtapash, cutin tigramujtapash, can ñucahuan ninanda fiñarishcatapash yacharcanimi.

29Canga, ñucahuan ninanda fiñarishpa ninanda jariyashpami, ñuca rinriman uyarimujta rimarcangui. Chaimandami candaca, ñuca garfio jirruta cambaj singapi churachishpa, caballopaj shimipi churachina jirruta cambaj shimipi churachishpa, can maita shamushca ñandallata tigrachisha’ ninmi.

30Chashna tucunata can yachachunga, cashnatami ricuchisha: Cunan huatapash, cati huatapash, paimanda viñashpa fucushca granotami micunguichi. Ña quimsa huata tucujpica, canguna tarpushpa fucujpimi cozechanguichi. Uvastapash tarpushpami, chaipi fucushcata micunguichi.

31Judá llactapi causanajuj puramanda pacajushpa, huaquin puchushcacunaca, alpa ucupi sapi puchushcamanda sapiyashpa yura vichai viñamushpa cutin fucunshnami miranajunga.

32Jerusalenmandami, huaquin puchushcacuna llujshinga. Sion urcumandami, quishpirishcacuna llujshinga. Tucuita Mandaj Diosllata ninandapacha juyashcamandami, chaitaca pactachinga.

33Shinamandami Mandaj Dios ñucaca, Asiria llactata jatun mandajmandaca cashna nini: Cai puebloman yaicuitaca, na ushangachu. Cai pueblopica, shuj flechatallapash na cacharingachu. Jarcarina escudota apashpa, cai pueblo ñaupajpi shayarimuitapash, na ushangachu. Baluarte nishcata shayachitapash, na ushangachu.

34Paica, maita shamushca ñandallatami tigranga. Cai puebloman yaicumuitaca, na ushangachu. Mandaj Dios ñucami, chashna nini.

35Cai pueblopi causajcunata ayudashpami quishpichisha. Ñucallata juyarimanda, ñucata servij Davidtapash juyaimandami, chashna rurasha” ninmi nichunmi cacharca.

36Chai tutallatami, Mandaj Diospaj angelca, asiriocunapaj carpacunaman rishpa, patsaj pusaj chunga picha huaranga soldadocunata huañuchirca. Cayandi tutamandata jatarishpaca, tucuilla huañushca sirinajujtami ricunajurca.

37Chaimandami, Asiria llactata jatun mandaj Senaquerib shuti runaca, Nínive shuti puebloman rishpa chaipi causagrirca.

38Chaipica cashnami tucurca: Senaquerib shuti runaca, Nisroc shuti paipaj diospaj huasipi chai diosta ninanda alicachijujpimi, Adramelec shuti, Sarezer shuti paipaj churicunallata espadahuan huañuchirca. Shina huañuchishpaca, Ararat shuti llactamanmi pacajushpa rinajurca. Paipaj randica, Esar-hadón shuti paipaj churimi mandai callarirca.