ISAÍAS 7 - Quichua Imbabura Bible

Jatun mandaj Acaz shuti runaman, Isaías villashcami

1Jotam shuti runapaj churi, Judá llactata jatun mandaj Acaz shuti runa mandajui punllacunapimi, cashna tucurca: Remalías shuti runapaj churi, jatun mandaj Peka shuti runami, Israel llactata mandajurca. Paimi, Siria llactata jatun mandaj Rezín shuti runahuan cumba tucushpa, Jerusalenbi causajcunahuan macanajungapaj vichai shamurca. Chashna shamushpapash, Jerusalendaca na japi usharcachu. Jotam shuti runapaj taitaca, Uzías shutimi carca.

2Chaitami, Davidpaj miraipura jatun mandaj Acaz shuti runaman, cashna villaj shamunajurca: “Siria llactapi causajcunaca, Efraín llactapi causajcunahuan cumba tucushpami, canhuan macanajungapaj shamushca” ninajurcami. Chaita villajpimi, jatun mandaj Acaz shuti runapaj shungupi, Jerusalenbi causajcunapaj shungupica, huaira shamujpi urcu quirucuna caiman chaiman cuyurinshna, manllashpa chujchunajurca.

3Shinamandami Mandaj Diosca, Isaiastaca cashna nirca: “Cunanga cambash, Sear-jasub shuti cambaj churipash richi. Janajpi tiajuj tanqueman shamuj larca manñapi, Acaz shuti runahuan tuparinguichi. Chai tanqueca, Tajshajcunapaj alpaman rina ñan ladopimi tiajun.

4Acaz runataca, cashna ningui: ‘Siria llactamanda Rezín runahuan, Remalías runapaj churihuanga, nina chiriyashpa cushnijuj ishcai caspicunashnami, ninandapacha fiñarishca shamunajun. Ashtahuangarin canga, ama manllashpa samashpa shuyajuilla. Cambaj shungupipash, ama musparijuichu.

5Siria llactamanda runacunahuan, Efraín ailluhuan, Remaliaspaj churihuan cumba tucushcacunaca, canda llaquichingapaj nalita yarishpami, cashna ninajun:

6Judá llactapi causajcunahuan macanajungapaj rishpa manllachishunchi. Chai llactata japishpa, ñucanchipura chaupirishunchi. Chai llactapi jatun mandaj cachunga, Tabeel shuti runapaj churita churashunchi ninajunmi.

7Chaimandami Mandaj Jatun Diosca, cashna nin: Napacha chashna tucungachu. Chashnaca na cangachu.

8Siria llactapaj jatun puebloca, Damascomi. Damasco pueblopaca, Rezín shuti runami jatun mandaj. Sucta chunga picha huatapica, Efraín llactaca, llacta canata saquingacamanmi, llaquichi tucunga.

9Efraín llactapaj jatun puebloca, Samariami. Samaria pueblopaca, Remalías shuti runapaj churimi jatun mandaj. Cangunapash, ñucata na yariashpa causanajushpaca, tucuringuichimi’ ninmi nishpa villai” nihuarcami.

10Mandaj Diosca, Acaz shuti runataca cashnatapashmi nirca:

11“Canda Mandaj Taita Dios ñucataca, imata rurashpa canman ricuchijuchun nishpapash, mañahuailla. Alpa ucumanda cashpapash, jahua pachamanda cashpapash, ricuchishallami” nircami.

12Shina nijpimi, Acaz shuti runaca: “Na chaitaca mañapanichu. Mandaj Diostaca, na ñuca munashcata rurai nishpa fiñachishachu” nirca.

13Shinamandami Isaiasca, cashna nirca: “Davidpaj miraicuna, cunanga caita uyahuaichi: ¿Runacunata fiñachijushcapash, imapash na canllu yashpachu, ashtahuangarin cunanga ñuca Taita Diostapash fiñachinguichi?

14Cunanga, Jatun Diosllatami juyaillata rurashpa, cangunaman ricuchigrin: Ricuichi, jarihuan nara tacarishca cuitsagumi, vijsayu tucushpa shuj jari huahuaguta ungunga. Chai huahuagutaca, Emanuel shutitami shutichinga.

15Chai huahuaguca, ima ali cajtapash, ima nali cajtapash yachangacamanmi, leche virallata, balun mishquitalla micunga.

16Ima ali cajtapash, ima nali cajtapash, chai huahuagu nara yachajpillatami, can manllashca ishcai jatun mandajcunapaj llactaca, jichui tucunga.

17Mandaj Diosca candapash, can mandajuj llactapi causajcunatapash, cambaj huasi ucu puracunatapashmi, ninanda llaquichijunga. Efraín aillu, Judá aillumanda shicanyashca punllamandapacha, cunangaman na ricushca llaquicunami shamunga. Asiria llactata jatun mandajmi, chashna llaquichijunga.

18Chai punllapica, cashnami tucunga: Mandaj Diosca, Egipto llactamanda carupi tiaj jatun yacu manñacunapi causajcunatami, chuspicunata silbachishpa cachamunshna cachamunga. Asiria llactapi causajcunataca, balun chuspicunatashnami cachamunga.

19Tucui paicuna shamushpami, pugru pambacunapi, jichushca pambacunapi, jatun rumi ucucunapi, tucui casha yuracunapi, tucui ima yuracunapipash jundanajunga.

20Chai punllapica Jatun Diosca, Eufrates yacu chai lado llactamanda culquipaj mañashca navajahuanmi cangunataca, uma ajchatapash, barbastapash, chaqui milmatapash cuchushpa anchuchinga. Chaica, Asiria llactata jatun mandajmi canga.

21Chai huatapica, cashnami tucunga: Shuj runaca shujlla huarmi huagrata, ishcai llamatallami viñachijunga.

22Chai animalcuna ashtaca lecheta cujpimi, leche viratalla micushpa causanga. Cai llactapi quedajcunaca leche virata, balun mishquita micushpami causanga. Chaitapachami micushpa causanga.

23Chai huatapica, cashnapashmi tucunga: Chunga shuj kilo chaupi yalita pezaj culquipaj huaranga uvas yuracuna viñaj pushtucunapica, cashacuna, imapash nali shuj yuracunallami viñanga.

24Tucui llactapimi, cashacuna, imapash nali shuj yuracunalla viñanga. Shinamandami, chaimanga flechacunahuan, arcocunahuan yaicunajunga.

25Azadongunahuan tulashpa tarpuj tucui lomacunapica, cashacuna, imapash nali shuj yuracunalla junda cajpimi, manllashpa pipash na yaicui ushanajunga. Ashtahuangarin chaicunapica, huagracuna micuna, animalcuna sarunami canga” nircami.