DEUTERONOMIO 15 - Quichua Imbabura Bible

Mañachishca culquita saquina huatamandami villajun

1Culquita mañachishcataca, cada canchis huata chayashcatami, na cutin mañashpa saquinalla cangui.

2Culquita mañachishcataca, cashnami rurana: Maijan cashpapash paipaj cumba runaguman culquita mañachishca cashpa, chai culquita cuhuai nijujpipash, na tigrachi ushajpica, saquinallami. Paipaj cumba runaguta cashpa, na cashpaca paipaj huauquita cashpapash na tapujungallachu. Culquita mañachishcata na tigrachi ushajpica, saquinallami nishpa Mandaj Dios mandashca huata pactashcamandami, na ashtahuan tapunga.

3Shuj llactamanda runa canda culquita mañashcata charijpica, paitaca cutin mañanguilla. Ashtahuangarin cambaj huauquillata canda culquita mañashcata charijpica, paitaca ama cutin tigrachihuai nishpa saquinguilla.

4Canguna purapica, mañashpa purij runa ama tiachunmi, chashna rurana canguichi. Pai Mandaj Taita Diosca, canda Mandaj pai Taita Diosllata carajpi canguna japishpa causana llactapimi, ninanda bendicianga.

5Canda Mandaj Taita Dios mandashcata uyashpa, aliguta cazushpami, ñuca cunan canman tucui mandashcacunataca pactachina cangui.

6Canda Mandaj Taita Dios bendiciajpi, pai villashcashnallata ashtaca llactacunapi causajcunaman can mañachingapajpash charinguimi. Ashtahuangarin canga, pitapash na mañanguichu. Canga, ashtaca llactacunatami mandashpa charingui. Ashtahuangarin candaca, na mandai ushangachu.

Imagutapash na charijcunaman culquita mañachinamandami mandashca

7Canda Mandaj Taita Dios canman carashca llactapi maijan pueblopi cashpapash, cambaj huauqui purallata maijan cashpapash imagupash illaj tiajpica, ama shinlli shungu tucunguichu. Imagutapash na charij cambaj huauquita ricushpaca, ama cambaj maquita vichashpa, shinlli shungu tucunguichu.

8Ashtahuangarin imata munajpipash, na mitsashpa cambaj maquita pascashpa mañachinguilla.

9Cambaj shungupira: ‘Mañachishcata saquina canchis huataca ñami pactamujun’ nishpa, jatun nalita yarijunguiman. Shina yarijushpara, imagutapash na charij cambaj huauquiman imagutapash carangapaj na munashpa, fiña ñavihuan ricunguiman. Chashna rurajpica canda fiñashpami, Mandaj Diosman caparishpa villanga. Diosmi, candaca juchata rurashcata ricunga.

10Canga, na cungashpallami carana cangui. Carashpaca, cambaj shungupi na mitsarinachu cangui. Shina aliguta carajpimi, canda Mandaj Taita Diosca candaca, tucui imatalla rurashcacunapi bendicianga.

11Cai llacta chaupipica, mañashpa purijcunaca na illangachu. Chaimandami candaca, cashna mandani: ‘Cambaj huauquita, imagutapash na charij runaguta, imagupash illaj runagutaca, cambaj maquita pascashpa ayudanguilla’ ninimi.

Gañangunata imashna charinatami mandashca(Éx. 21:1-11)

12Hebreo purallata cambaj huauquicuna jari cashpa, na cashpaca huarmi cashpapash canman jaturijpica, sucta huatatallami servichishpa charina cangui. Canchis huatapica, cacharishpa cachanguilla.

13Ña cacharishpa cachashpaca, na chushaj maquita cachanachu cangui.

14Mandaj Dios canda bendiciajpi charishcataca, cambaj llamacunamandapash, trillana cambaj pambamandapash, uvasta cutana pushtumandapash, canllata carashpa cachanguilla.

15Egipto llactapi servishpa causashcatapash, canda Mandaj Taita Dios candaca cacharichishcatapash yarinami cangui. Shinamandami cunanga, caita rurachun mandani.

16Candapash, cambaj huasi ucu puratapash juyashcamanda, canhuan causajujpi tucui imapash ali llujshishcamandami, canda servishpa causajuj runaca: ‘Na saquishpa rinayanllu’ ninga.

17Shina nijpica paitaca, huasi pungu caspipi quimichishpami, rinrita utujuna jirruhuan rinrita utujuna cangui. Chashna rurajpimi paica, tucui causaipi canda servishpa causajunga. Canda servij huarmitapash, chashnallatami rurana cangui.

18Canda servij runaca, caipi chaipi trabajaj runa japinatapash chaupitalla japishpami, sucta huatata canda servishpa causarca. Chashna causashcamanda paita cacharishpa cachana chayajpica, na cachai ushanringachu yashpa ama llaquiringuichu. Ashtahuangarin canda Mandaj Taita Diosmi, can tucui imatalla rurashcamandaca bendicianga.

Punda huachashca jari animalta Diosman shicanyachijuchunmi mandashca

19Cambaj huagracuna, cambaj llamacuna punda huachashca jari animalcunataca, canda Mandaj Taita Diosman shicanyachingui.

Cambaj huagracuna punda huachashca jari shicuhuanga, na yapunachu cangui. Cambaj llamacuna punda huachashca llamapaj milmatapash, na rutunachu cangui.

20Chaicunataca, canda Mandaj Taita Diospaj ñaupajpimi micuna cangui. Mandaj Dios agllashca pushtupimi, cambaj tucui familiacunandi, huatapi huatapi micuna cangui.

21Chai animalcunapi ima nalipash tiajpi, na cashpaca ñausa, na cashpaca janga cajpi, na cashpaca imapash nali cajpica, canda Mandaj Taita Diosman cushpa na huañuchinachu cangui.

22Chaicunataca, can causajuj pueblocunapimi micuna cangui. Chaitaca, mapa cashpapash, mapa illaj cashpapash, gacela nishca animalpaj, tarugapaj aichata micunshnallata micungallami.

23Yahuartallami na micuna cangui. Yahuartaca, yacutashnami alpapi talina cangui.