JUECES 18 - Quichua Imbabura Bible

1Chai huatacunapica, Israel llactapi jatun mandajca na tiarcachu. Chai huatacunallatami, Dan shuti aillu runacunaca, alpata japishpa chaipi causangapaj mascashpa purinajurca. Paicunaca chai huatacunacamanmi, Israel aillu purapica, paicuna causana alpataca na charishca carca.

2Chaimandami Dan shuti aillupaj miraicunaca, paicunapaj aillupura picha runacunata cacharca. Llactata ali ricushpa rijsishpa tigramugrichunmi, Zora shuti, Estaol shuti pueblocunamanda ashtahuan shinlli runacunata cacharca. Paicunataca: “Richi, llactata ali rijsishpa tigramugrichi” nishpami cacharca. Chai runacunami, Efraín urcuman rishpa, Micaía runapaj huasicaman chayashpa, chai tutaca chaipi pacarirca.

3Micaía runapaj huasiman ña chayagrinajushpami, chairalla viñai chai levitapaj shimita rijsirca. Ña chayashpaca, cashnami ninajurca: —¿Pita candaca, caiman pushamurca? ¿Imatata caipica rurajungui? Canga caipica, ¿imatata rurangapaj shamurcangui?— ninajurcami.

4Shina nijpimi paica, cashna nishpa tigrachirca: “Micaía runaca, ñucamandaca cashna chashnami rurarca. Shinallata paipaj cura cachumbashmi churahuarca” nircami.

5Shina nijpimi chai runacunaca, cashna ninajurca: —Ñucanchi cashna rinajushcapash alichu llujshina, chaita yachangapaj cunanga Taita Diosta tapui— ninajurcami.

6Shina nijpimi chai curapash, cashna nishpa tigrachirca: —Ama manllashpa richilla. Canguna rinajushca ñandaca, Mandaj Diosmi ricushpa cuidajun— nircami.

7Shina nijpimi, chai picha runacunaca llujshishpa, Lais shuti puebloman shamunajurca. Chai pueblopi causajcunataca, Sidón shuti pueblopi causajcunashnallata, ima llaqui japinatapash na yarishpa, cungashca, yanga yanga causanajujtami ricurca. Chai llactapica, pipash imapillapash na fiñachijpi, mandajuj chai llactatapash pipash na quichungapaj tiajpimi, aliguta causanajurca. Sidón shuti pueblomandapash, carupimi causanajurca. Pihuan randishpa jatushpa causanatapash, na charircachu.

8Zora shuti, Estaol shuti pueblocunapi causanajuj paicunapaj huauquicunapajman, chai picha runacuna tigrajpimi, paicunapaj huauquicunaca: —¿Imapash tianllu?— nishpa tapunajurca. Shina tapujpimi, paicunaca cashna nishpa tigrachinajurca:

9—Jatarishpa, paicunahuan macanajungapaj vichai rishunchi. Ñucanchica, chai llactata ali ricungapajmi rircanchi. Chai llactataca, aligupacha cajtami ricurcanchi. Cangunaca, ¿nachu imatapash ruragringuichi? Chai llactata japingapaj ringapaca, ama quillanayachishpa ucha rishunchilla.

10Ña rishpaca, ima llaqui japinatapash na yarishpa causanajuj gentecunapajman, ashtaca alpacunata charij llactamanmi chayagringuichi. Paicunataca, Taita Diosmi cangunapaj maquipi churashca. Chaipica, cai pachapi imalla tiajcunaca, imapash na illanllu— ninajurcami.

11Shina nijpimi Zora shuti, Estaol shuti pueblocunapi causanajuj Dan shuti aillu familiacunaca, sucta patsaj runacuna chaimanda llujshishpa rinajurca. Paicunaca, macanajunacunata churashcami rinajurca.

12Chaimanda rishpaca, Judá llactapi tiaj Quiriat-jearim shuti pueblopimi, indi huashajuj ladoman carpacunata shayachishpa tianajurca. Chaimandami cunangaman chai pambataca, Dan shuti aillupaj carpacuna shayana pamba ninajun.

13Chai pambamandaca, Efraín urcuman chimbashpami, Micaía shuti runapaj huasicaman chayamunajurca.

14Chaiman chayashpami, Lais shuti pueblo muyundi llactacunata rijsingapaj rij chai picha runacunaca, paicunapaj huauquicunataca cashna ninajurca: —Cai huasipica, efod nishcapash, terafín nishca dioscunapash, caspita labrashpa rurashca imamambash rijchaj shuj diospash, culquita yacuyachishpa rurashca shuj diospash tiajtaca, ¿nachu yachanguichi? Shina cashcamanda imata rurana cashpapash, aligutami yarina canguichi— ninajurcami.

15Chaiman chayashpaca, Micaía runapaj huasipi causajuj, chairalla viñai levita runapajman rishpami, alillachu cangui nishpa tapunajurca.

16Dan shuti aillupaj miraipura sucta patsaj runacunapash, macanajunacunata chaririajmi, pungu yaicunapi shayanajurca.

17Llactacunata rijsingapaj rij picha runacunaca, chai huasiman yaicushpami, labrashpa rurashca imamambash rijchaj diostapash, efodtapash, terafín dioscunatapash, culquita yacuyachishpa rurashca, imamambash rijchaj diostapash japinajurca. Macanajunacunata chaririaj shayanajuj sucta patsaj runacunahuan, curahuanga pungu yaicunapimi shayanajurca. Paicuna chaipi shayajungacamanmi, chashna ruranajurca.

18Micaía runapaj huasiman yaicushpami, labrashpa rurashca imamambash rijchaj diostapash, efodtapash, terafín dioscunatapash, culquita yacuyachishpa rurashca, imamambash rijchaj diostapash japinajurca. Shina japishpa apanajujta cura ricushpami: —¿Cangunaca, imatata ruranajunguichi?— nirca.

19Shina nijpimi paicunaca, cashna nishpa tigrachinajurca: —Maquihuan shimita quilparishpa upalla cai. Ñucanchi taitashna tucungapaj, cura tucungapaj, ñucanchihuan jaculla. ¿Israel aillu familiacunapaj cura cangapaj randica, shuj runapaj huasipilla cura canachu ashtahuan ali?— ninajurcami.

20Shina nijpimi, chai curapaj shungupica cushijushpa, efodta, terafín dioscunata, imamambash rijchaj diostapash apashpa, gentecunapaj chaupipi rirca.

21Paicunaca huahuacunata, animalcunata, imalla charishcacunata ñaupachishpami rinajurca.

22Dan shuti aillupaj miraicuna Micaía runapaj huasimanda ña caruta rinajujpimi, Micaía runapaj huasi ladollapi causajcunaca tandanajushpa, Dan shuti aillu runacunata catinajurca.

23Dan shuti aillu runacunata caparijta uyashpami, paicunaca tigrarishpa ricushpa, Micaía runataca: —¿Imata nishpata cai tucui runacunata tandachishpa catimungui?— ninajurca.

24Shina ninajujpimi Micaía runaca, cashna nishpa tigrachirca: —Cangunaca, ñuca rurashca dioscunatapash, ñuca curatapashmi apashpa rinajunguichi. Imapash illajtamari saquihuanguichi. Chashna jahuachu: ‘¿Imatata nijungui?’ nishpa tapuhuanguichi— nircami.

25Shina nijpimi Dan shuti aillupaj miraicunaca, cashna ninajurca: —Ama ñucanchita caparishpa catimuichu, pactarallapash ñucanchi puramanda ñapash fiñarijcuna ninanda fiñarishpara candapash, cambaj familiacunatapash huañuchinman— ninajurcami.

26Shina nishpaca, Dan shuti aillupaj miraicunaca ri callarircallami. Micaía runaca, paita yali shinlli runacuna cajta ricushpami, paipaj huasiman tigrashpa rirca.

27Paicunaca, Micaía runa rurashca dioscunatapash apashpa, paipaj curatapash pushashpami, Lais shuti puebloman chayarca. Chai pueblopi causajcunataca, ima llaquipash illaj cungashca causanajujpimi, espadahuan chugrichishpa huañuchishpa pueblotapash rupachinajurca.

28Sidón shuti pueblomanda carupi causanajujpimi, chai pueblopi causajcunata mitsangapaca, pipash na tiarca. Paicunaca, picunahuan randishpa jatushpa causanatapash na yacharcachu. Chai puebloca, Bet-rehob shuti pueblo ladolla pugru pambapimi carca. Chai jipaca, chai pueblota cutin alichishpami, chaipi causanajurca.

29Chai pueblotaca pundaca, Lais shuti cashca cajpipash, chai jipaca Dan shutitami shutichirca. Paicunapaj ñaupa taitaca, Israelpaj churi Dan shuti cashcamandami, chai pueblotaca chashna shutichirca.

30Dan shuti aillupaj miraicunaca, paicuna mañangapajmi, labrashpa rurashca imamambash rijchaj diosta chai pueblopi shayachirca. Paicunapaj cura cachumbash, Moisespaj churi Gersón shuti runapaj churi Jonatán runatami churarca. Paica, paipaj churicunandimi, israelcuna chai llactamanda prezu apai tucuna huatacaman, Dan aillupaj mirai purapi curacuna tucushpa causanajurca.

31Shinami paicunaca, Micaía runa rurachishca imamambash rijchaj labrashca diostaca, paicunapaj pueblopi shayachirca. Taita Diospaj carpa, Silo shuti pueblopi tiajushca tucui huatacunacamanmi chashna charirca. Levita runamandapash, paipaj caishuj huarmimandapashmi villajun