PROVERBIOS 24 - Quichua Imbabura Bible

1Nalita rurajcunata ricushpaca,

ama ñucapash chashna cashcaiman yanguichu.

Paicunahuan tandanajunatapash, ama munanguichu.

2Paicunapaj shungupica, shuhuanatallami yarinajun.

Shimihuambash nalitallami rimanajun.

3Alipacha yachajushcahuanmi, huasi ucu purataca

huasichinshna shayachinga.

Aligutapacha yarishpami, shinllitapacha shayachinga.

4Ali yachajushcahuanmi huasi ucucunapipash,

tucui imalla munanayai, juyailla

charinacunatapash jundachinga.

5Alipacha yachajushca runaca, ninan shinlli runami.

Ali yachajushca runapaca, imapash na llashachu.

6Jatun macanajuitapash, ali yachajushcahuanmi rurana.

Ali yachajcuna yuyaita cushcami,

jatun macanajuitaca mishachin.

7Juizu illaj runapaca, ali yachaica

na pactai ushanalla jahuamanmi tiajun.

Puebloman yaicuna pungu ladopi tandanajuipica,

paipaj shimita pascaitapash na pascangachu.

8Pitapash llaquichingapaj yariajlla causaj runataca:

“Caica, nali shungu runami” ninajunmi.

9Shinlli shungu runaca, juchatallami yarijun.

Na cazushpa asij runaca, runacunapaj

ñaupajpica millanayaimi ricurin.

10Imatalla rurana punllapi imata ruranatapash

na munashpaca, ushai illajmi tucungui.

11Huañuchingapaj apai tucushcacunataca cacharichingui.

Huañuchi tucunallapi purijcunatapash quishpichingui.

12Chaitaca, napacha yachashpami causashcanchi

ninajujpipash, tucuicunapaj shunguta pezanshna

ricujuj Diosca, ¿nachu yachanga?

Cambaj causaita ricujuj Diosmi, chaitaca yachan.

Shina cashcamandami, runacuna imata

rurashcashnallata cunga.

13Ñuca huahualla, balun mishquita

japishpa micuilla, aligumari.

Balun mishqui shinlliyashcapash,

cambaj shimipica mishquillagumi canga.

14Ali yachaita japinapash, cambaj almapaca,

chashnallatami canga.

Chaita tarishpaca, can japina cashcatapash japinguimi.

Shinallata tucuripica, can

shuyajushcapash na tucuringachu.

15Diosta na manllaj runalla.

Imatapash cashcatapacha ruraj runapaj carpataca,

ama pacalla chapajuichu.

Paipaj huasi ucucunapi ima tiashcatapash,

ama llujchishpa apaichu.

16Imatapash cashcatapacha ruraj runaca,

canchiscaman urmashpapash, cutin jatarinllami.

Ashtahuangarin Diosta na manllajcunaca,

jatun llaquipimi urmanga.

17Canda fiñaj runa llaquipi

urmajpica, ama cushijunguichu.

Nitijanshna pandarijpipash,

shungupillapash ama cushijunguichu.

18Mandaj Diosca, chaita ricushpara

candapash nalicachinman.

Paita fiñarishpa llaquichijushcatapash,

paimanda anchuchinman.

19Nalita rurajcunahuanga, ama tandanajunguichu.

Diosta na manllaj runacunata ricushpapash,

ama ñucapash chashna cashcaiman yanguichu.

20Nali runapaca, jipaman cushijuica na tiana

cashcamandami, na chashna yarina cangui.

Diosta na manllajcunapaj lámpara

michata huañuchinshnami tucuchinga.

21Ñuca huahualla, Mandaj Diostapash,

jatun mandajtapash cazungui.

Imatapash nalicunata yarishpa purijcunahuanga,

ama tandanajunguichu.

22Paicunataca, cungashcapi llaqui japina

cashcamandami, na tandanajuna cangui.

Chai ishcandi llaquichinataca, ¿pita yachangayari?

23Caicunapash, ali yachajushcacuna rimashca shimicunami:

Imata alichina cajpipash, ñavita

ricushpalla chasquinaca nalichu.

24Nalita ruraj runatara: “Canga, imatapash

cashcatapacha rurajmi cangui” nijtaca,

tucui gentecunami ima llaquipash japishpami

ali canman ninajunga.

Shuj llactacunapi causajcunapashmi millayanachinga.

25Ashtahuangarin jarcashpa rimajcunaca,

cushijuita charingami.

Paicunaca, ninandami bendiciai tucunga.

26Ali shimicunatalla rimashpa tigrachij runapaj

shimitaca muchanshnami alicachinga.

27Llujshirishpa imata ruranatapash mascagringui.

Cambaj pambacunapi imatallapash ruranata yaringui.

Chashna rurashca jipami, cambaj huasita shayachingui.

28Ama pitapash, yangata llullashpa chashnapachami

nishpa villanguichu.

Cambaj shimihuambash, ama uyanayaita

llullashpa parlanguichu.

29Ama: “Paitapash shinallatami rurasha,

pai imashna llaquichishcashnallatami paimambash

tigrachisha” ninguichu.

30Imata ruranatapash na munaj runapaj

alpa ladotami yalijurcani.

Shinallata na yachajushca runapaj uvas

chagratapashmi yalijurcani.

31Ricui, tucui chai pambapimi, cashacuna viñashca carca.

Shinallata tucui chai pambapimi, tsinicuna jundashca carca.

Chai pamba muyundipi jarcashcacunapash,

urmashpa tucurishcami carca.

32Chaita ricushpami, ñuca shungupi yarijurcani.

Chaita ricushpaca, cashnami yarijurcani:

33Ashata puñushpa, umata caiman chaiman cuyuchishpa,

ashata puñungapaj maquita cruzashpami sirijushcangui.

34Chashna sirijujpillatami, imapash illaj

tucunaca, yanga purij runashna chayamun.

Imatapash na charij canaca, macanajunacunahuan

alichirishca runashnami chayamunga yajurcanimi.