ISAÍAS 28 - Quichua Imbabura Bible

Efraín ailluca llaquichi tucungami

1Machashpalla causaj Efraín aillupaj jariyashca coronalla, ¡aij imachari tucunga! Paicunaca, juyailla chagracunapaj pugru pamba uma quinrai coronashnami tiajun. Vinota ufiashpa muspayashcacunaca, anguyajlla sisa coronashnami.

2Ricuichi, Mandaj Diosca chaita tucuchingapajmi, manllanayai rundutashna, jatun acapanatashna, pipash na jarcai ushanalla jatun yacutashna, imatapash tucuchijlla ninan ushaita charij shinlli runatashna charijun. Paimi, chai pueblotaca alpaman urmachinga.

3Machashpalla causaj jariyashca Efraín aillupaj coronataca, paipaj chaquihuanmi sarunga.

4Pugru pamba uma quinrai lomapi tiajuj chai juyailla chagrapash, anguyajlla sisashna coronapash, punda fucushca jigos granoshnami canga. Rupai callari punllacunapi punda fucushca jigosta, pipash ricushcandi japishpa micunshnami, chai pueblotaca tucuchinga.

5Chai punllapica, tucuita Mandaj Diosca, pai agllashca puramanda huaquin puchushcacunapaca, punchapamba coronagushna, umapi churana juyailla diadema nishcagushnami canga.

6Aliguta ricushpa mandangapaj tiarijmambash, imatapash cashcatapacha rurana yuyaitami cunga. Macanajuita cutin rurajpipash, pueblo pungupi cuidaj soldadocunamambash ushaitami cunga.

7Shina cajpipash paicunapashmi, vinota ufiashpa pandanajurca. Sidrata ufiashpami, yuyai illajcuna tucurca. Curapash, Dios ima nishcata villajpash, sidrahuan, vinohuan machashpami musparinajurca. Sidrata ufiashpa muspayashpami, imatapash muscuipishnalla ricushpa, Dios ricuchishcatashna panda villanajurca. Aliguta ricushpa mandanapipashmi pandanajurca.

8Tucuilla mezacunapimi, shungu tigrachishpa mapayachishca. Maijan pushtupillapash, mapa illajca na tianllu.

9Paicunaca cashnami ninajun: “Ali yachaitaca, ¿pimanshi yachachinga? Na cashpaca, imatalla yachajushcataca, ¿pimanshi entendichinga? Chuchumanda chairalla anchuchishca huahuacunaman, chuchuta chairalla quichushca huahuacunamanmi yachachijun.

10Chai mandashcatallata, chai shimicunatallata, chai yachajunatallata, shuj jilapi escribishcatallatami, cutin cutin yachachijun. Ashataca shujmanda ashata, caishujmandami yachachijun” ninajunmi.

11Cai gentecunataca, jarcarishpa jarcarishpa rimaj runashna, na rijsishca rimaipimi yachachinga.

12Paicunatami Diosca, cashna nirca: “Caimi cangunapaj samanaca, shaijushcataca samachinguichi. Caihuanmi samanata charinguichi” nircami. Ashtahuangarin paicunaca, na uyanayachircachu.

13Shinamandami Mandaj Diosca, chai mandashcatallata, chai shimicunatallata, chai yachajunatallata, shuj jilapi escribishcatallata, cutin cutin yachachinga. Ashataca shujmanda, ashata caishujmandami paicuna urmashpa jatun llaqui tucungacaman, prezu japi tucushpa huatai tucungacaman rimajungalla.

Jerusalenbi causajcunatami, Diosca shinlli tacurishca

14Cai Jerusalenbi causaj gentecunata asishpa ricushpa mandaj runacuna, Mandaj Dios ima nishcata uyaichiyari.

15Cangunaca, cashnami ninajurcanguichi: “Ñucanchica, tucuita pactachingapajmi, huañuihuambash ña ari nishcalla canchi. Seolhuambash, chashnallatami ari ninajurcanchi. Yacu jatarinshna shamushpapash, ñucanchitaca na llaquichingachu. Ñucanchica, llullashpa pacajunatami charinchi. Umachinapimi pacajushun” nircanguichimi.

16Shina ninajushcamandami Mandaj Jatun Diosca, cashna nin: “Ricuichi, Sion pueblopica huasichina esquinapi ñuca agllashca, juyailla shinlli rumigutami, huasichi callarina ucuman churarcani. Chai rumita yariajlla causaj runaca, na manllashpa calpajunachu.

17Ñucami, aliguta ricushpa mandanataca, cordelhuan medisha. Imatapash cashcatapacha ruranataca, nivelashpami ricusha” ninmi. Canguna llullashpa pacajuna huasitaca, rundumi tucuchinga. Canguna pacajuna patacunataca, yacumi apanga.

18Huañuihuan ari ninajushcapash, yangami quedanga. Seolhuan ari ninajushcapash, na shinlli cangachu. Ninandapacha huaira astishpa yalishpaca, cangunataca sarushpami yalinga.

19Chai huaira yali callarishpami, cangunataca apanga. Pacarin pacarinmi, punllandi, tutandi yalinga. Pai yalimujta uyashpaca, imamanda chashnapacha yalijujta na yachashpami, manllarishpa urmanguichi.

20Chutarishpa sirijungapaca, camapash na pactangachu, jatanapash pilluringapaca na pactangachu.

21Mandaj Diosca, Perazim shuti urcupishnami shayaringa. Gabaón shuti pambapishnami, ninanda fiñaringa. Paica, canguna na yachai ushanallata rurangapaj, ima horapash na ricushca manllanayaita rurangapajmi, chashna fiñaringa.

22Cangunata huatashcacuna ama ashtahuan sipichunga, cunanga na asishpa ricunachu canguichi. Cai tucui llactata tucuchinataca, tucuita Mandaj Diospacha yarishcatami ñucaca uyarcani.

23Ñuca nishcata aliguta uyahuaichi. Ñuca imata nijujtapash, callarishpa uyahuaichi.

24Tarpungapaj yapuj runaca, ¿tucui punllachu yapujungalla? ¿Pambapi curpacunata faquishpa, ñutushpallachu chishanga?

25Alpata ñutushpa aliguta rurashca jipaca, ¿nachu eneldo muyuta cashpa, comino muyuta cashpapash tarpunlla? Trigotapash huachupimi tarpun. Cebadatapash, avenatapash, maipi tarpunapillatami tarpun.

26Tarpuj runataca, paipaj Taita Diosmi chashna aliguta ricuchishpa yachachijun.

27Eneldo nishca granotaca, na trillanahuan trillanllu. Comino granotapash, na carretahuan saruchishpa trillanllu. Ashtahuangarin eneldotaca, caspihuanllami chafsin. Cominotaca, uchilla varahuanllami huactan.

28Trillashpaca, grano urmangacamanllami trillan. Carreta ruedacunahuanga, na saruchishpa ñutuchinllu. Trillana rueda quirucunahuambash, granotaca na ñutuchinllu.

29Chaitapash, tucuita Mandaj Diosllatami rurarca. Paica, imata rurangapaj yarijushcatapash juyailla rurashpa ricuchingapaj, paipaj yachaipash jatun cajta ricuchingapajmi, chashna rurarca.