JOEL 3 - Quichua Imbabura Bible

Llactacunataca, Mandaj Diosmi llaquichinga

1Ricuichi, chai punllacunapi, chai huatacunapica, Judá llactamanda, Jerusalenmanda prezu apai tucushcacunatami tigrachimusha.

2Tucui shuj llactacunapi causajcunata tandachishpami, Josafat shuti pugru pambaman cachasha. Chaipimi, ñuca agllashcacunata llaquichijcunataca, ñucapash llaquichisha. Paicunami, ñucapajlla cachun agllashca israelcunataca, shuj llacta puracunaman caiman chaiman cachashpa, ñuca llactataca chaupirinajurca.

3Ñuca agllashcacunataca suerteta rurashpami, caishuj chaishuj chaupirinajurca. Ñuca agllashcacunapaj churicunataca, culquimanda huainayaj huarmimandallami cunajurca. Ushicunataca, vinomandallami jatunajurca, chaitami ufianajurca.

4Shinallata Tiro shuti, Sidón shuti pueblocunapi, tucui Filistea llactapi causajcunalla, cangunahuanga ¿imatata ricunata charini? ¿Cangunaca, ñuca imashna llaquichishcashnallata, ñucatapash llaquichingapajchu munanguichi? Chashna rurajpica, canguna japinatallatami ñapash cachamusha.

5Cangunaca, ñuca culquita, ñuca orota, juyailla ñuca charishcacunata quichushpami, cangunapaj dioscunapaj huasicunaman aparcanguichi.

6Cangunaca, Judá llactapi causajcunapaj, Jerusalenbi causajcunapaj churicunataca, paicunapaj llactamanda caruman cachangapajmi, griegocunapaj miraicunaman jaturcanguichi.

7Ricuichi, paicunataca maiman jatushpa cachashcatapash tigrachimushallami. Chai jipami, canguna japinataca cangunapaj jahuapillata cachamusha.

8Cangunapaj churicunata, ushicunataca, Judá llactapi causajcunamanmi jatusha. Paicunami, caru llactapi causanajuj sabeo nishca runacunaman jatushpa cachanajunga. Mandaj Dios ñucami, chashna villani.

9Caitaca, tucui llacta puracunapi villaichiyari, macanajui tianatapash villaichiyari. Ninan shinlli runacunapash alichirishcalla cachun villaichiyari. Quimirimuichiyari, macanajuj tucui soldadocunapash, shamuichiyari.

10Cangunapaj azadongunataca, espadata ruraichiyari. Hocescunataca, lanzacunata ruraichiyari. Ushaita na charijcunapash: ‘Ushaita charinimi’ nishpa caparichiyari.

11Ladolla llactacunapi causajcuna, tucuicuna tandanajushpa shamuichiyari” ninmi.

Mandaj Dioslla, ninan shinlli cambaj runacunata paicunapajman cachamupairi.

12Tucui llactacunapi causajcuna, rijcharichiyari. Josafat shuti pugru pambaman vichai richiyari. Chaipimi, muyundi llactacunapi causajcuna imata rurashcataca ricuchingapaj tiarisha.

13Granocunaca ñami fucushca, chaitaca hoceshuan tandachichiyari. Uvasta cutana pushtupica, uvaspash jundami tiajun, cutangapaj urai shamuichiyari. Paicuna nalita rurashcacunaca, ashtacapachami.

14Imata rurashcatapash ricuchina pugru pambapica, ashtaca llactacunami tandanajurca. Paicuna imata rurashcatapash ricuchina pugru pambapi, Mandaj Dios ricuchina punllami ña chayamujun.

15Chai punllapica indipash, lunapash yanayangami, luzerocunapash na punchayachingachu.

Judá llactapi causajcunatami cacharichinga

16Mandaj Diosca, Sion shuti urcumandami león huacanshna caparinga. Pai rimajpash, Jerusalenmandami uyaringa. Jahua pachapash, cai pachapash chujchungami. Shina cajpipash pai agllashcacunaca, Mandaj Diostallami shuyanajunga. Paica israelcunapaca, shinlli torreshnami canga.

17“Shina rurajpimi ñucataca, cangunata Mandaj Taita Dios cajta rijsihuanguichi. Ñucapajlla Sion urcupi causajujtami rijsihuanguichi, Jerusalenbash ñucapajlla tucujpimi shuj gentecunaca, cutinga chaitaca na ashtahuan yalinajunga.

18Chai punllacunapimi, urcucunamandaca llullu vino talirijunga, lomacunamandaca lechemi talirijunga. Judá llactapi tiaj tucui jatun larcacunataca, ashtaca yacumi calpajunga. Mandaj Diospaj huasimandapash, shuj pugyumanda yacu llujshishpami, Sitim shuti pugru pambaman jicharinga.

19Egipto llactaca, tucuchi tucungami. Edom llactapash, llaquinayaita jichushca pambamanmi tigranga. Judá llactapi causajcunata nalicachishpa rimashcamanda, ima nalitapash na rurajcunata huañuchishpa yahuarta jichashcamandami, chashna tucunga.

20Ashtahuangarin Judá llactaca, causaita causaicamanmi gentecunahuan junda canga. Mirai mirai huahuacunami, Jerusalenbica causanajunga.

21Yahuarlla cajpi nara fichashcataca, ñucami fichasha. Mandaj Dios ñucami, Sion urcupi causasha” ninmi.