GÉNESIS 44 - Quichua Imbabura Bible

Josepaj copatami villajun

1Joseca, paipaj huasipi mayordomotaca, cashna nishpami mandarca:

—Cai runacunapaj costalcunapica, paicuna mashnata apai ushana granota jundachilla. Shinallata culquitapash, tucuicunapaj costal shimipi churangui.

2Shinallata ñuca copatapash churangui. Chai culqui copataca, trigomanda pai cushca culquindi, jipa huauquipaj costal shimipi churangui— nircami.

Shina nijpimi chai runaca, José imashna nishcashnallata rurarca.

3Caya ña punllayashcapica, cayacaman nishpa, chai runacunata cachajpimi, paicunapaj burrocunandi rinajurca.

4Paicuna pueblomanda llujshishpa, nara caruta rijpillatami Joseca, paipaj mayordomotaca cashna nirca:

—Jatarishpa, chai runacunata cati. Paicunata japigrishpaca, cashna ningui: ‘¿Imamandata alita rurashcamandaca, nalita rurashpa tigrachinguichi? ¿Imamandata ñuca culqui copata shuhuamurcanguichi?

5¿Nachu caica ñuca amo ufiaj copa? ¿Nachu cai copapi imatapash yachai ushan? Caita rurashpaca, nalitamari rurashcanguichi’ ningui— nircami.

6Pai ña japigrishpami, chai shimicunata nijurca.

7Shina nijpimi paicunaca, cashna nishpa tigrachinajurca:

—Ñucanchita mandajlla, ¿imamandata chashnacunataca ningui? Canda servijcunaca, ima horapash chashnataca na rurashunllu.

8Ricui, ñucanchi costal shimicunapi tarishca culquitapash, Canaán llactamandapacha apamushpami, quiquinman tigrachiparcanchi. ¿Imashnamanda canda mandajpaj huasimandaca culquita, orota shuhuashunyari?

9Canda servijcunamanda maijambajpipash chai copa taririjpica, huañushpami ali canman. Shinallata ñucanchipashmi, ñucanchita mandajpaj servijcuna tucushun— ninajurcami.

10Shina ninajujpimi chai runaca, cashna nirca:

—Cunambash, canguna nishcashnallata cachun. Maijambajpimi copa taririn, chaimi ñucata servij canga. Cangunaca, ima llaquitapash na apanami quedanguichi— nircami.

11Shina nijpimi paicunaca, paicunapaj costalcunata ucha alpaman uriajuchishpa, tucuicunapaj costalcunata pascanajurca.

12Shina pascajpimi, rucu huauquipaj costalmanda callarishpa, jipa huauquipaj costalcaman mascashpa tucuchirca. Chai copaca, Benjaminbaj costalpimi taririrca.

13Shinamandami, paicuna churajushcacunata liquinajurca. Shinallata paicuna apanajushcacunata, paicunapaj burropi tucuicuna cutin apachishpami, puebloman tigranajurca.

14Judá runaca, paipaj huauquicunandimi, Josepaj huasiman shamurca. Joseca, chaipillatami tiajushca carca. Paicuna chayashpami, paipaj ñaupajpi alpapi cungurinajurca.

15Chaipimi Joseca, cashna nirca:

—¿Imashpata cashna rurarcanguichi? Maijan runa cashpapash, ñucashnalla runaca, imatapash yachai ushajlla cajtaca, ¿nachu yachanguichi?— nircami.

16Shina nijpimi Judá runaca, cashna nirca:

—Ñucata mandajtaca, ¿imatata nipashunyari? ¿Imatata rimapashunyari, na cashpaca ima nishpata alipi ricuripashunyari? Canda servijcuna nalita rurashcataca, Taita Diosmi tarishca. Ricui ñucanchipash, chai copata maijan tari tucushcapashmi, ñucata mandaj canda servijcuna capanchi— nijurcami.

17Shina nijujpimi Joseca, cashna nishpa tigrachirca:

—Ñucaca chashnataca, ima horapash na rurashachu. Chai copata charijushca, chairalla viñai chai huambrallami, ñucata servij canga. Cangunaca, taitapajman aliguta tigraichilla— nircami.

Judá runaca, Benjaminda cacharichunmi mañashca

18Shina nijpimi Judá runaca, Josepajman quimirishpa cashna nijurca:

—Aij, ñucata mandajlla. Ñucata mandajpaj rinripi uyarijta, canda servij uca shuj shimiguta rimachun saquihuayari nipanimi. Canda servij ñucahuanga, ama nina japirinshna fiñaripanguichu. Canga, Faraonshnallatami capangui.

19Ñucata mandajllatami, canda servijcunataca: ‘¿Nachu taitata, na cashpaca huauquita charinguichi?’ nishpa tapurcangui.

20Shina tapujpimi ñucanchica, ñucanchita mandajmambash cashna nishpa tigrachiparcanchi: ‘Ña rucu taitagutami charipanchi. Shuj cati huauqui huambragutapashmi charipanchi. Paica uchillagumi capan. Paitaca, taita ña rucugu cajpimi ungushca. Paipaj shuj huauquica, huañushcami. Pai cashcami, paipaj mamapaj huahua puramandaca quedashca. Paipaj taitaca, paitami ninanda juyan’ niparcanchimi.

21Shina nijpimi, canda servijcunataca: ‘Paita pushamupaichi. Paitaca, ñuca ñavihuambacha rijsingapajmi munani’ niparcangui.

22Chaimandami ñucata mandajtaca, cashna niparcanchi: ‘Chairalla viñai chai huambraguca, paipaj taitataca na saqui ushapanllu. Saquijpica, paipaj taitaca huañungami’ niparcanchimi.

23Shina nijpimi canda servijcunataca, cashna nircangui: ‘Cangunapaj jipa huauqui cangunahuan na shamujpica, ñuca ñavitaca ashtahuanga na ricunachu cahuanguichi’ niparcanguimi.

24Chai jipami, cashna tucurca: Canda servij ñuca taitapajman chayashpaca, ñucata mandaj can imatalla nishca shimicunatami, paiman villarcanchi.

25Shina villajpimi, ñucanchi taitaca: ‘Asha granoguta randingapaj tigraichi’ nirca.

26Shina nijpimi, cashna nishpa tigrachircanchi: ‘Na ri usharingachu. Ñucanchi huauqui ñucanchihuan rijpillami ripashun. Ñucanchi jipa huauqui ñucanchihuan na rijpica, chai runapaj ñavipica, na ricuri usharingachu’ nircanchimi.

27Shina ninajujpimi, canda servij ñuca taitaca, ñucanchitaca cashna nirca: ‘Cangunallata yachanguichimi, ishcai churigutami ñuca huarmiguca unguparca.

28Shujcarin, ñuca ñaupajmanda rishpami chingarca. Paitaca, millai animalcunapachami caita chaita fitishpa micushcanga yanimi. Paitaca, cunangaman na ricushcanichu.

29Cai huambragutapash, canguna ñuca ñaupajmanda apajpi, paitapash ñambi llaqui japijpica, yuraj ajcha tucushca ñucataca, jatun llaquihuanmi Seolman urai cachahuanguichi’ nircami.

30Cunanga, canda servij ñuca taitapajman ñuca tigrajpi, huambragu ñucahuan na rijpica, taitapaj shunguhuan, paipaj shunguhuan huatarishcashna juyarishcamandami,

31cashna tucunga: Ñuca rijpi huambraguta na ricushpaca, huañupangami. Canda servijcunami, canda servij ñucanchi taita rucuyashpa yuraj ajcha tucushcataca, jatun llaquihuan Seolman urai cacharinga.

32Canda servijmi, huambragutaca ñuca taitaman tigrachimushapachami nishpa cashna niparcani: ‘Huambraguta canman ñuca na tigrachimushpaca, ñucami ñuca taitapaj ñaupajpica, tucui causaipi llaquita apashpa causasha’ niparcanimi.

33Chaimandami, cunanga huambragupaj randica, ñuca amota servingapaca, canda servij ñuca quedasha nipani. Chairalla viñai huambragutaca, paipaj huauquicunahuan richun saquipailla.

34Ashtahuangarin huambraguta na pushashpaca, ¿imashnata ñuca taitapajman tigrapashayari? Ñuca taitata llaqui japijta ama ricungapajmi, na ri ushapasha— nijurcami.