GÉNESIS 43 - Quichua Imbabura Bible

1Chai llactapica, ashtahuan ninan yarjaimi tiarca.

2Egiptomanda apamushca trigota micushpa tucuchishca jipami, cashna tucurca: Paicunapaj taita Jacoboca: —Ñucanchi micungapaj, asha granota randingapaj tigrarichi— nircami.

3Shina nijpimi Judá runaca, cashna nishpa tigrachirca: —Chai runaca, cangunaca pactachinapachami canguichi nishpami, ñucanchita cashna nirca: ‘Cangunapaj huauquita cangunahuan na pushamushpaca, ñuca ñavipica napacha ricurimunachu canguichi’ nircami.

4Ñucanchi huauquita ñucanchihuan cachajpica, urai rishpa granota canman randimugrishunllami.

5Ashtahuangarin paita na cachajpica, na urai rishunllu. Chai runaca, ñucanchitaca: ‘Cangunapaj huauquita na pushamushpaca, ñuca ñavipica na ricurimunachu canguichi’ nircamari— nijurcami.

6Shina nijpimi taita Israelca, cashna nirca: —¿Imashpata shuj huauquitapash charinchimi nishpa, chai runaman villashpa, chashnapacha llaquichihuanguichi?— nircami.

7Shina nijpimi paicunaca, cashna nishpa tigrachinajurca: —Chai runamari ñucanchimandapash, ñucanchi familiamandapash callarishpa cashna tapuchirca: ‘¿Cangunapaj taitaca causanrachu? ¿Nachu shuj huauquita charinguichi?’ nijurcamari. Shina nijpimi, pai tapushcashnallata tigrachircanchi. Chai runa ñucanchita: ‘Cangunapaj huauquita pushamugrichi’ ningataca, ¿imatata yachashunyari?— ninajurcami.

8Shina nishca jipami Judá runaca, paipaj taita Israeltaca cashna nijurca: —Chairalla viñai huambragutaca, ñucahuan cachapailla. Shina cachajpimi, ñucanchica jatarishpa rishun. Ñucanchipash cambash, ñucanchi huahuacunapash na huañushpa, causai ushangapajmi chashna rishun.

9Paitaca ñucami canman tigrachipasha, ñucata tigrachihuai nishpa mañahuanguilla. Chairalla viñai huambraguta ñuca na cambajman tigrachimushpa, cambaj ñaupajpi na churamushpaca, ñucami can taitapaj ñaupajpica, tucui causaipi nalitapacha rurashca casha.

10Na shuyanajushpaca, ña ishcaicamanmi tigramunchiman carca— nijurcami.

11Shina nijpimi paipaj taita Israelca, cashna nijurca: —Shina cashpaca, chashna ruraichilla. Chai runaman carangapaca, cai llactapi ima ashtahuan ali tiashcata japishpa, cangunapaj costalpi churashpa apaichilla. Bálsamo nishca asha jambiguta, asha balun mishquiguta, mishquillagu ashnajuj jambicunata, mirra nishca jambita, tucticunata, almendracunata apaichilla.

12Culquitaca, ashtahuan shuj chaupita mirachishpa apashpa ringuichi. Shinallata cangunapaj costal shimipi punda tigrachimushca culquitapash apaichilla. Chai culquitaca, pandashpapashchari cachamurca.

13Cangunapaj huauquitapash pushashpa jatarishpa, chai runapajman tigraichilla.

14Tucuita Rurai Ushaj Diosca, cangunata llaquishpa chai runa ricuchun ayudashpami ali canman. Shinallata cangunapaj chaishuj huauquitapash, cai Benjamín huambragutapash cacharimushpami ali canman. Ñuca huahuacuna illaj quedana cajpica, shina cachun— nijurcami.

15Shina nijpimi chai runacunaca, ima caranatapash, chaupi yali culquitapash, Benjamindapash japinajurca. Shina japishpa ña jatarishpami, Egiptoman urai rishpa, Josepaj ñaupajpi ricurinajurca.

16Joseca, Benjamín huambragu paicunahuan cajta ricushpami, paipaj huasipi mayordomotaca cashna nirca: —Chai runacunata ñuca huasiman pushashpa shuj huagrata, cungata muchushpa huañuchishpa aichata yanungui. Chai runacunami, chaupi punllapica ñucahuan micunga— nircami.

17Chai runaca, José imashna nishcashnallata rurashpami chai runacunataca, Josepaj huasiman pusharca.

18Chai runacuna Josepaj huasiman pushai tucushpaca, ninanda manllarishpami cashna ninajurca: —Punda shamuipi ñucanchi costalcunapi culquita tigra apashcamanda lazupishna japishpa macangapajmi, ñucanchitaca caiman pushamushca. Shinallata ñucanchipash, ñucanchi burrocunapash, paita servijcuna cachun japingapajmi pushamushca— ninajurcami.

19Chaimandami, Josepaj huasipi mayordomopajman quimirishpa, huasiman yaicuna pungupi paihuan parlanajurca.

20Paitaca cashnami ninajurca: —Aij, ñucanchita mandajlla. Ñucanchica, na llullashpami nipanchi. Pundaca, micuna granoguta randingapajpachami, urai shamuparcanchi.

21Samana pushtuman chayashpa, ñucanchi costalcunata pascanajupimi, cashna tucurca: Chashna pascashpa ricushpaca, tucuicunapaj culquitami tucuicunapaj costal shimicunapi tiajujta ñapash ricurcanchi. Ñucanchi culquica, imashna pezashpa apamushcashnallatami tiajushca carca. Chai culquitaca, cutinmi tigrashpa apamuparcanchi.

22Ñucanchica, micuna granocunata randingapajmi, shuj culquitapash ashtahuan apamuparcanchi. Ñucanchica, chai culquita ñucanchi costalcunapi maijan churashcatapash, na yachashpami tianajurcanchi— ninajurcami.

23Shina ninajujpimi chai runaca, cashna nishpa tigrachirca: —Cangunapaca, casilla ali causai tiapachun, imatapash na manllanachu canguichi. Cangunapaj Taita Dios, cangunapaj taitapaj Taita Diosmi, cangunapaj costalcunapi chai culquita cangunaman carashca. Ñucami, cangunapaj culquitaca japircani— nishpami, Simeonda llujchishpa paicunaman tigrachirca.

24Chai runaca, Simeondaca caishujcunapajmanmi, Josepaj huasiman pusharca. Shina pushashpa yacuta paicunaman cujpimi, paicunapaj chaquita maillanajurca. Paicunapaj burrocunamambashmi, micuchun churarca.

25Chaupi punllacaman José chayamuna cajpimi, caranacunataca aliguta churanajurca. Paicunaca, paicunapash chaipi micuna cashcata yachashpami, chashna ruranajurca.

26Huasiman José shamujpica, maquipi charinajushca caranacunata huasi ucuman apamushpami, Josepaj ñaupajpi alpaman chayajta cumurinajurca.

27Chai jipami, Joseca paicuna imashna cashcata tapushpa cashna nirca: —Cangunaca, cangunapaj rucu taitagu tianmi nishpami villahuarcanguichi. ¿Chai taitaca alillachu, cunangaman causajunrachu?— nircami.

28Shina nijpimi paicunaca, cashna nishpa tigrachinajurca: —Canda servij ñucanchi taitaca alillami capan. Paica causajupanrami— ninajurcami. Shina nishpami, paita cazushcata ricuchingapaj urai cumurinajurca.

29Shinallata Josepash vichai ricushpami, paipaj mamapaj churi, paipaj huauqui Benjaminda ricurca. Shina ricushpami: —¿Caichu ñucaman parlanajushca cangunapaj jipa huauqui?— nirca. Shina nishpami, Benjamindaca: —Ñuca huahualla, Taita Dios candaca llaquipachun— nirca.

30Joseca, paipaj huauquita ricushpa, paipaj shungu ucupi ninanda llaquirishpami, ucha llujshishpa maipi huacanata mascarca. Paica, pai puñuj ucuman yaicushpami, chaipi huacajurca.

31Paipaj ñavita maillarishpa llujshishpaca, huacanayaipash yalijpimi: “Micunata churamuichi” nirca.

32Paipaj micunataca, shicanmi churarca. Paicunamambash shicambacha churashpami, paihuan micun cashca Egiptopi causajcunamambash, shican churarca. Egiptopi causajcunaca, hebreocunahuan micuitaca na ushanllu carca. Paicunahuan micunaca, Egiptopi causajcunapaca millanayai cajpimi, chashna ruranajurca.

33Josepaj ñaupajpimi, punda churimanda callarishpa jipa churicaman, catipi catipi tiarinajurca. Shina tiarishpami, chai runacunaca manllarishpa, caishuj chaishuj ricurinajurca.

34Joseca, paipaj ñaupajmandami, micunacunataca paicunaman cujurca. Ashtahuangarin Benjaminbaj micunaca paicuna purapajtaca, pichacaman yali ashtacami carca. Shinami Josehuan micushpa, ufiashpa cushijunajurca. Josepaj copatami villajun

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help