MARCOS 13 - Quichua Imbabura Bible

Diospaj huasita tucuchinatami, Jesusca villashca(Mat. 24:1-2; Luc. 21:5-6)

1Diospaj huasi ucumanda Jesús llujshijujpimi, paipaj yachajuj puramanda shujca, cashna nirca:

—Yachachij, ricui. Cai huasicunaca, rumicunahuanlla rurashcamari— nircami.

2Shina nijpimi Jesusca, cashna nirca:

—¿Cai jatun huasicunatachu ricunajunguichi? Caipica, shuj rumillapash na chai jahuan, chai jahuan quedangachu. Tucuillami urmachi tucunga— nircami.

Tucurimui punllapica, ninan llaquicunami tianga(Mat. 24:3-28; Luc. 21:7-24; 17:22-24)

3Shina nishpallami, Diospaj huasi chimba ladopi tiajuj Olivos shuti urcupi tiarirca. Chaipimi Pedrohuan, Jacobohuan, Juanhuan, Andreshuan paicunalla, Jesustaca cashna nishpa tapunajurca:

4—¿Ima horata chashna ninan llaquicunaca tianga? ¿Ima llaquita ricushpata, can villashcacuna pactajujtaca yachashun? Chaitaca villayari— ninajurcami.

5Shina nijpimi Jesusca, paicunaman cashna nishpa tigrachirca:

—Pipash cangunatara umachinman. Aliguta yarishpa causanguichi.

6Ashtacacunami: ‘Quishpichij Cristomi cani’ nij tucushpa, ñuca shutipi shamunga. Paicunaca, ashtaca gentecunatami umachinajunga.

7Ashtahuangarin jatun macanajuicuna tiajta, ninan macanajuimi shamugrin nijta uyashpapash, na musparinachu canguichi. Chashna llaquicunaca tianapachami. Chashna cashpapash, tucurimui punllapachaca nara chayamungachu.

8Shuj llactapi causajcunahuan, caishuj llactapi causajcunahuanmi macanajui jataringa. Llactata mandaj puracunapash macanajungami. Tauca llactacunatami, alpa mama chujchushpa tucuchinga. Ninan yarjaipash, ninanda caparinajuipashmi tianga. Chai llaquicunaca, callarillami canga. Ashtahuan jatun llaquicunami shamunga.

9Ashtahuangarin cangunaca, aliguta yarishpa causanguichi. Cangunata japishpaca, mandajcunapaj ñaupajmanmi apanajunga. Shinallata tandanajuna huasicunapimi astinga. Ñucata catinajushcamandami, llactata mandajcunapaj ñaupajman, jatun mandajcunapaj ñaupajman apai tucunguichi. Paicunamambash, chashnapachami nishpa villai ushanguichimi.

10Tucurimui punllacuna nara chayamujpillatami, ali villaitaca tucui llactacunapi causajcunaman villanapacha.

11Mandajcunapaj ñaupajman cangunata apashpa cujpica, imatashi nisha yashpa, na manllarinachu canguichi. Chaitaca, yaritallapash na yarinachu canguichi. Ashtahuangarin Dios imata yarichishcatami, chaipica rimanguichi. Diospaj jucha illaj Espíritu yarichijpimi, na cangunapaj munai rimanguichi.

12Huauquillatami, paipaj huauquitaca, huañuchijcunaman cunga. Shinallata taitallatami, paipaj churitaca huañuchijcunaman cunga. Shinallata huahuacunapash, paipaj taitata mamata fiñashpa jatarishpami huañuchinajunga.

13Ñuca shutipi catinajujpimi cangunataca, tucui gentecuna na ricunayachinga. Ashtahuangarin tucurimui punllacaman llaquicunata apajcunallami quishpichi tucunga.

14‘Ninanda millanayachi tucushpa tiajujmi, llaquinayaita tucuchijunga’ nishpami, Profeta Danielca escribirca. Chashna nishcashna, chaica napash tiajuna pushtupimi tiajunga. Chaita ricushpaca, Judea llactapi causajcunaca, urcucunapi pacajungapaj richun ninimi. (Cashna villashcata leyijca, aliguta yarichun ninimi).

15Chai punlla chayamujpica, huasi jahuapi tiajujca, huasi ucuman ama yaicuchun. Huasi ucumanda imata apangapajpash, ama yaicuchun ninimi.

16Pambapi purijujpash, paipaj jahualla churajunata apangapaca, ama tigrachun ninimi.

17Chai punllacunapica, vijsayu huarmicunapash, llullu huahuata viñachijuj huarmicunapash, ¡aij, imachari tucunga!

18Chai punllacunaca, ama tamia punlla cachunmi, Taita Diostaca ninanda mañariana canguichi.

19Chai punllacunapica, ninan manllanayai llaquicunami tianga. Cai pachata Taita Dios churashca punllamandapacha, cunangaman chashna llaquicunaca, na tiarcachu. Jipamambash, chashna llaquicunaca na tiangachu.

20Llaquichina punllacunata Taita Dios na saquichijpica, shujllapash na quishpirinmanllu. Ashtahuangarin pai agllashcacunata juyashpallami Jatun Diosca, chai llaqui punllacuna ama unaicaman tiachun ucha saquichishca.

21Chai punllacunapimi huaquingunaca: ‘Ricuichi, Quishpichij Cristomi caipi’ ninajunga. Na cashpaca, huaquingunaca: ‘Ricuichi, chaipimi’ ninajungami. Chashna ninajujpipash, napacha crinachu canguichi.

22Chai punllacunapica: ‘Ñucami, Quishpichij Cristo cani’ nishpa, ‘Ñucami, Dios ima nishcata villaj cani’ nishpami, llullashpa villajcuna tianga. Paicunaca, pipash na rurai ushashcatami, imatapash manllarinayaita rurashpa ricuchinajunga. Chashna rurashpami, Taita Dios agllashcacunatapash pandachi ushashpaca, pandachinajunga.

23Ashtahuangarin cangunaca, aliguta ricushpami causana canguichi. Nara chashna tucujpillatami, cunambillata tucuita cangunaman villajuni— nijurcami.

Runa Aichayu Tucushca Jesús tigramunatami villashca(Mat. 24:29-35,42-44; Luc. 21:25-36)

24Chashna ninan llaqui punllacuna yalishca jipami, indipash yana yana tucunga. Lunapash, cai pachataca na punchayachingachu.

25Luzerocunapash jahuamanda urmamungami. Shinallata ninan ushaihuan jahuapi tiajujcunapash, ninandami cuyunga.

26Chai jipallami, Runa Aichayu tucushca ñucataca, fuyupi shamujujta tucuicuna ricunga. Ninan ushaihuan, punchapamba shamujtami ricunga.

27Shina shamushpami, ñuca angelcunata cachamusha. Paicunami, ñuca agllashcacunataca, tucui cai pacha tucuri chuscundi ladomanda tandachimunga.

28Jigos yurahuan chimbapurashpa parlashcatami, aliguta yachajuna canguichi: Chai yurapi malquicuna viñashpa, llullu fangacuna jundajta ricushpami, tamia pascarina punllacuna chayamujtaca yachanguichi.

29Chashnallatami chai tucuita ricushpaca, ñuca shamunaca ña pungupi cajta yachana canguichi.

30Na llullashpami, cangunataca cashna nini: Cunan viñaicuna nara huañujpillatami, ñuca villajushca shimicunaca pactanga.

31Jahua pachapash, cai pachapash tucuringami. Ashtahuangarin ñuca rimashca shimicunaca, napacha tucuringachu.

32Ashtahuangarin ima punlla ima horas chashna tucunataca, pipash na yachanllu. Jahua pachapi tiaj angelcunapash, na yachanllu. Diospaj Churi cashpapash, na yachanichu. Ñuca tigramunataca, ñuca Taitallami yachan.

33Ricuichi, ima punllacuna chashna tucunata na yachaimandami, na puñushpa chapariashpa, Diosta mañashpa causana canguichi.

34Caru llactaman shuj runa rijushpaca, paita servijcunamanmi huasita mingashpa rin. Imata rurachumbash, paicunamanmi saquin. Pungupi cuidajtapash, aliguta ricuriapangui nishpami mandan. Shinallatami ñuca tigramunapash canga.

35Huasiyu runa ima horas tigramunata na yachashcamandaca, na puñushpami chapariana canguichi. Paica, ña amsayajujpi cashpapash, chaupi tuta cashpapash, gallo candai horas cashpapash, indi llujshinallapi cashpapash, shamungallami.

36Cungashcapi shamushpaca, canguna puñunajujta ama japij shamuchunmi, chashna shuyana canguichi.

37‘Na puñushpa chaparaichi’ nishpaca, na cangunatalla ninichu, tucuicunatami chashna nijuni— nijurcami.