JEREMÍAS 37 - Quichua Imbabura Bible

Jeremiasta prezushcatami villajun

1Joacim shuti runapaj churi Conías shuti runapaj randica, Josías shuti runapaj churi jatun mandaj Sedequías shuti runami mandajurca. Paitaca, Babilonia llactata jatun mandaj Nabucodonosor shuti runami, Judá llactapi jatun mandaj cachun churarca.

2Mandaj Diosca, Jeremias runahuanmi paipaj Shimicunata villachirca. Ashtahuangarin chai shimicunataca, Sedequías runapash, paita servijcunapash, chai llactapi tucui gentecunapash na cazurcachu.

3Jatun mandaj Sedequías runaca: “Ñucanchita Mandaj Taita Diosta ñucanchimanda ninanda mañapai” nichunmi, Selemías shuti runapaj churi Jucal shuti runata, Maasías shuti runapaj churi Sofonías shuti curata, profeta Jeremiaspajman cachamurca.

4Jeremiastaca, nara prezu churashcachu carca. Chaimandami paica, gentecunahuan yaicujurca, llujshijurca.

5Faraonbaj soldadocuna Egiptomanda llujshimujujtami, Jerusalén muyundipi chapanajuj caldeo soldadocunaca yacharca. Chaita yachashpami, Jerusalenmandaca anchurishpa rinajurca.

6Chaimandami Mandaj Diosca, cai shimicunata Jeremiasman cashna nishpa villarca:

7“Israelcunata Mandaj Taita Diosca, cashnami nin: ‘Ñucata tapuchun cangunata cachamuj, cai Judá llactata jatun mandajtaca, cashna nigrichi: Ricuichi, cangunata ayudangapaj llujshimuj Faraonbaj soldadocunaca, ñami paicunapaj Egipto llactamanllata cutin tigrarca.

8Shinamandami caldeocunaca, cutin tigramugrin. Paicunaca, macanajushpa mishashpa japishpami, cai pueblotaca rupachinajunga’ ninmi.

9Mandaj Diosca, cashnatapashmi nin: ‘Caldeocunaca, anchurishpa rishcapachami nishpaca, na umachirinachu canguichi. Paicunaca, napacha anchuringachu.

10Cangunahuan macanajujuj caldeo soldadocunataca, tucuillacunata chugrichijpi chugrishca soldadocunalla puchushpapash, paicunapaj carpacunamanda tucuilla jatarishpami, cai pueblotaca rupachinga’ ninmi nigrichi” nijurcami.

11Chai jipaca, cashnami tucurca: Faraonbaj soldadocuna shamunajujta yachashpami, caldeo soldadocunaca Jerusalén ladomanda anchurinajurca.

12Shina anchurijpimi Jeremiasca, Jerusalenbi causanajuj gentecunapaj chaupimanda anchurishpa, Benjamín llactaman ringapaj llujshijurca.

13Paica, Benjamín shuti pungutami llujshigrijurca. Chaipica, soldadocunata mandaj Irías shuti soldadomi cuidajurca. Paimi, profeta Jeremiastaca:

—Canga, caldeocunapajmanmi rijungui— nishpa prezu japirca.

Irías shuti runaca, Selemías shuti runapaj churimi. Selemías shuti runaca, Hananías shuti runapaj churimi.

14Irías japijpimi, Jeremiasca:

—Pandatami nijungui, na caldeocunapajman rijunichu— nirca.

Shina nijpipash na uyashpami Irías shuti runaca, Jeremiasta japishpa, mandajcunapaj ñaupajman pusharca.

15Mandajcunaca ninanda fiñarishpami, Jeremiastaca astishpa, Jonatán shuti escribij runapaj huasipi, prezu churanajurca. Chai huasitaca, prezuna huasitami rurashca carca.

16Chai huasipica Jeremiastaca, ucuman allashpa utujushca, quinraimambash utujushcacunapimi churarca. Chaipimi paica, tauca punllacunata tiajurca.

17Jatun mandaj Sedequías runaca, Jeremiasta chai ucumanda llujchimuchunmi cacharca. Chaimanda llujshimujpimi:

—¿Mandaj Diosca, imatapash villanllu?— nishpa, paipaj huasipi pacalla tapurca. Shina tapujpimi Jeremiasca, cashna nirca:

—Ari, pai villashcataca charinimi. Babilonia llactata jatun mandajpaj maquipimi, churai tucugringui— nircami.

18Jeremiasca, jatun mandaj Sedequías shuti runataca, cashnatapashmi nijurca:

—Ñucata prezu churangapaca candapash, canda servijcunatapash, cai gentecunatapash, ¿imata rurashpata juchata rurarcani?

19Cunanga, cangunaman villajcunaca, ¿maipita? Paicunaca: ‘Babilonia llactata jatun mandajca cangunatapash, cai llactatapash na llaquichingapaj shamungachu’ nishpami villanajurca.

20Jatun mandaj ñuca amolla, cunanga caigutallami mañagripani. Ñuca mañashcata ari nihuailla: Ñucaca, escribij Jonatán runapaj huasipi huañungapaca, na munapanichu. Ama chaiman cutin cachahuanguichu— nijurcami.

21Shina nijujpimi, jatun mandaj Sedequías shuti runa mandajpi, Jeremiastaca prezuna huasi patiopilla churashpa cuidanajurca. Paimanga, Tandata Rurajcunapaj chaquishca mishqui tandata ñanmanda apamushpami, punllandi caranajurca. Chai pueblopi tucuilla tanda tucuringacamanmi caranajurca. Shinami Jeremiasca, prezuna huasi patiopilla tiajurca.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help