HECHOS 19 - Quichua Imbabura Bible

Efeso pueblopimi, Pabloca villajushca

1Corinto pueblopi Apolos purijujpica, cashnami tucurca: Pabloca urcu ladocunata purijushpami, Efeso puebloman shamurca. Chaipi huaquin crijcunahuan tuparishpami,

2paicunataca cashna tapurca:

—Canguna Jesusta crishpaca, Diospaj jucha illaj Espiritutaca, ¿ñachu japircanguichi?— nijpimi, paicunaca:

—Diospaj jucha illaj Espíritu tian nijtaca, uyaitapash nara uyashcachu canchi— ninajurca.

3Shina ninajujpimi:

—¿Imamandata cangunataca bautizarca?— nishpa tapurca.

Shina tapujpimi:

—Juan yachachijujta uyashpami, bautizai tucurcanchi— ninajurca.

4Shina nijpimi Pabloca, paicunata cashna nirca:

—Llaquirishpa Diospajman tigrarijpimi, Juanga bautizajurca. Shina bautizajushpaca: ‘Ñucapaj jipa shamujtami, crina canguichi’ nishpami, tucuicunaman yachachijurca. Chaica, Quishpichij Cristo Jesusmi— nircami.

5Shina villajpi uyashpami paicunaca, Apunchi Jesuspaj shutipi bautizai tucunajurca.

6Pablo paicunapaj uma jahuapi maquita churashpa Diosta mañajpimi, Diospaj jucha illaj Espirituca paicunapajman shamurca. Shinamandami, shuj shuj rimaicunapi rimashpa, Dios ima nishcataca villanajurca.

7Tucui paicunaca, chunga ishcaishna runacunami carca.

8Pabloca, tandanajuna huasiman yaicushpa purijushpami, quimsa quillacaman ninan ushaihuan villashpa purijurca. Chaiman shamujcunapash crichunmi, Taita Dios mandajujmanda chimbapura parlashpa, na manllashpa villajurca.

9Ashtahuangarin huaquingunaca, shinlli shungu tucushpami, na cringapaj munanajurca. Shina cashpami ali Ñangutaca, ashtaca gentecunapaj ñaupajpi nalicachishpa rimanajurca. Paicunataca saquishpami, Pabloca crijcunatapash pushashpa, Tirano shuti runa yachachij huasiman rirca. Chaipimi, tucui punlla villajurca.

10Pabloca, ishcai huatatami Asia llactapi causajurca. Chaipi Apunchi Jesusmanda villajujpimi, Judea llactamanda gentecunapash, griego nishca gentecunapash tucuicuna uyanajurca.

11Taita Dios ushaita carajpimi Pabloca, pipash na rurai ushashcacunata imatapash juyailla rurashpa ricuchijurca.

12Shinamandami Pablo churajushca pañocunata, churajunacunata huañujuj gentecunapi churangapaj apanajurca. Chaita churajpica, huañujuj gentecunaca ali tucujpi, ayacunapash llujshircallami.

13Ashtahuangarin Judea llactamanda huaquin gentecunaca, ayacunata llujchijcunami canchi nishpami purinajurca. Paicunapash, Apunchi Jesuspaj shutipi rimashpami, nali ayacunata llujchingapaj munarca. Shina cashpami, ayacunataca: “Pablo villajuj Jesuspaj shutipi llujshichi” ninajurca.

14Judea llactamanda curacunata mandaj Esceva shuti curapaj canchis churicunapash, ayacunata llujchijcunami carca.

15Paicuna llujchingapaj munajpimi, chai nali ayaca cashna nishpa tigrachirca: “Jesustaca rijsinimi. Pablo maijan cajtapash yachanimi. Ashtahuangarin cangunaca, ¿pita canguichi?” nircami.

16Shina nishpami, chai aya jundashca runa jatarishpaca, paicunatara japishpa chugrichingacaman ninanda macarca. Shina macajpimi, chai huasimandaca lluchulla pacajushpa calpanajurca.

17Chashna tucushcataca, Efeso pueblopi causanajuj Judea llactamanda gentecunapash, griego nishca gentecunapash tucuicunami yacharca. Chaimandami tucuicuna manllarishpa, Apunchi Jesustaca juyaillagupachami cangui ninajurca.

18Tauca crijcunami, punda imatalla nalita rurashpa causashcatapash, tucuicunapaj ñaupajpi villangapaj shamunajurca.

19Shinallata taucacunami, yumbu tucungapaj yachajuna librocunata apamushpa, tucuicunapaj ñaupajpi rupachinajurca. Chaicunata cuentata rurajpica, picha chunga huaranga culqui valijtashnami rupachirca.

20Chashnami, Apunchi Jesusmanda tucui ushaihuan villajujpi, ashtacacuna crishpa miranajurca.

21Chai jipami Pabloca, Macedonia shuti, Acaya shuti llactacunata yalishca jipaca, Jerusalenman ringapaj munarca. Paica cashnatami yajurca: “Ñuca chaipi cashca jipaca, Roma puebloman rinapachami cani” yajurcami.

22Chashna yarishpami, paita ayudaj puracunamanda Timoteota, Erastota agllashpa, ishcandita Macedoniaman ñaupachishpa cacharca. Pabloca, tauca punllacunatami, Asia llactapillata quedarca.

Efeso pueblopi causajcunami caparinajushca

23Chai punllacunapimi Efeso pueblopica, ali Ñanguta catinamanda Pablo villajujpi, ninanda fiñai callarirca.

24Chaitaca, culquita imatapash alipacha ruranata yachaj, Demetrio shuti runami callarichirca. Paica, Diana shuti diosta yarina huasitashnallami, uchilla huasicunata culquimanda ruran carca. Chashnata rurashpaca, chaita ruranata yachajcunaca, ashtaca culquitami japinajurca.

25Chaimandami, chaitallata ruranata yachaj runacunata tandachishpa, chai runaca cashna nijurca: “Caita ruranata yachajcuna. Ñucanchica cashna rurashpami, ninanda charijyanchi. Chaitaca, cangunallata alimi yachanguichi.

26Ashtahuangarin: ‘Maquihuan rurashcalla dioscunaca, napacha dioscunachu’ nishpami, chai Pabloca ashtacacunata pandachishpa purijun. Chaitaca, cangunallata ñami ricunguichi, ñami uyanguichi. Paica, na cai Efeso pueblopilla chashna nijunllu. Ashtahuangarin Asia llactapipash, ashamandallami na tucuilla llactapi chashna crichijun.

27Shina crichijpica, na ñucanchi jatunatalla jarcashpa llaquichingachu. Ashtahuangarin ñucanchi jatun Diana shuti diospaj huasitapashmi yangapi churanga. Chai dios jatun cashcamanda, tucuilla Asia llactapipash, tucui cai pachapipash ninanda alicachishcatami tucui callarinajun” nijurcami.

28Shina nijta tucuicuna uyashpami, ninanda fiñarishpa:

—¡Ñucanchi cai Efeso pueblopi causajcunapaj Dianaca, jatunmari!— nishpami caparinajurca.

29Chashna ninajujpimi, chai pueblopi causajcunaca ninanda musparishpa, Pablota cumbashpa Macedonia llactamanda shamushca Gayo shuti, Aristarco shuti runacunata japirca. Paicunataca, tucuicuna tandanajushpami, imatapash ricuna ucuman apanajurca.

30Pablopash, chai gentecunapajman rishalla nijujpimi, crijcunaca na cacharirca.

31Asia llactata huaquin mandajcunapash, Pablopaca ali rijsijmi carca. Paicunami: “Imatapash ricuna chai ucuman ama yaicupaichu” nishpa villagrichun cacharca.

32Chaipi tandanajushca gentecunaca, ninanda musparishpami, maitapash shujta shujta rimashpa caparinajurca. Ashtahuangarin shujcunaca, imapaj tandanajushca cajtapash na yacharcachu.

33Chai gentecunapaj chaupimandami, Judea llactamanda gentecunaca tucuicunaman villachun, Alejandrota t'angashpa cacharca. Paica, maquihuan ricuchishpami upallaichi nishpa, imashna cajta villangapaj munarca.

34Ashtahuangarin Alejandrotaca, Judea llactamanda runa cajta yachashpami, tucuicuna shujllashnalla tucushpa, ishcai horascamanshna:

—¡Cai Efeso pueblopi causajcunapaj Dianaca jatunmari!— nishpa caparinajurca.

35Chai pueblota mandajpajta escribij runaca, chai ashtaca gentecunata upalla caichi nishpami, cashna nijurca: “Cai Efeso pueblopi causajcuna. Cai Efeso pueblopi jatun Diana diospaj huasitaca, ñucanchimi cuidashpa charinchi. Júpiter nishca luzeromanda urmamushca, paiman rijchaj rumitapash cuidanchimi. ¿Chaitaca, maijan runata na yachashcayari?

36Chashna cajtaca, na chashnachu nitaca pipash na ushangachu. Chaimandami, imatapash na nishpa ricunalla canguichi. Narapash yachashpaca, na ñapash imatapash ruranallachu canguichi.

37Canguna apamushca cai runacunaca, cangunapaj diostapash nali shimicunataca na ninajunllu. Paipaj huasimandapash, na imatapash apashcachu.

38Demetrio shuti runatapash, paipajta rurajcunatapash fiñachijpica, mandaj puracuna tandanajushcaman villagrinatami charin. Chai mandajcunapaj ñaupajpimi, imatapash chimbapura juchachiri ushanguichi.

39Canguna ashtahuan imatapash ninata charijpica, tucuicuna tandanajushpami, mandashcapi nijunshna yarinajushun.

40Cunan cashna tucushcata, ñucanchita tapuchijpica, llaquichi tucunalla llaquimi cagrin. ‘¿Imamandata cashna fiñanajui tiarca?’ nijpica, na imatapash tigrachi ushanachu canchi” nijurcami.

41Shina nishpami, chai tandanajushca gentecunataca cayacaman nishpa cacharca.