2 TIMOTEO 4 - Quichua Imbabura Bible

Diospaj Shimita villangui nishcami

1Causajcunaman, huañushcacunamambash, imata paicuna rurashpa causashcata ricuchingapajmi, Apunchi Jesucristoca shamushpa tucuita mandajunga. Taita Diospash, Apunchi Jesucristopash ricujujpimi, caitaca canman mingani.

2Diospaj Shimita villachunmi mingani. Uyanayachijpi, na uyanayachijpipash, villajunguilla ninimi. Ama fiñarishpa, ali shunguhuambacha yachachishpa, aliguta yarichishpa, jarcashpa rimashpa, ama chashna ruraichu nishpa yachachingui.

3Aliguta yachachijuj shimicunataca, na uyanayachina punllacunami chayamunga. Chaicunaca nali cashpami, imatapash nalitalla uyangapaj munashpa, tauca yachachijcunata tandachinga.

4Chaicunaca, na llullashpa villajuj Shimita na uyanayachishpami, yanga parlocunatara uyashpa catinajunga.

5Ashtahuangarin canga, aligutapacha yarishpa puringui, llaquicunatapash apajunguilla. Ali villaita villashpa puringui. Diospajta ruranataca pactachingui.

6Ñucaca, ñami Diosman carashpa huañuchi tucunalla cani. Ñuca rina punllapash, ñami chayamujun.

7Alipacha jatun macanajuitami misharcani. Calpanshna rijunatami ña tucuchircani. Alipacha crishpami catijurcani.

8Imatapash cashcatapacha rurashpa causajushcamandami, coronataca ñucaman carangapaj alichishpa charijun. Chaitaca, imatapash cashcatapacha ruraj Apunchi Jesusmi, pai shamuna punllapi carahuanga. Chaitaca, na ñucamanlla carahuangachu. Ashtahuangarin pai shamunata juyashpa, tucui shuyajcunamambashmi caranga.

Imaguta rurachumbash Timoteomanmi, Pabloca yachachishca

9Ñucata ricungapaca, uchalla shamupanguiyari.

10Demas shuti runaca, ñucataca saquishpami, cai pachapi tiajtalla munashpa, Tesalónica puebloman rirca. Crescente shuti runaca, Galacia llactamanmi rirca. Titopash, Dalmacia shuti llactamanmi rirca.

11Lucas runagullami ñucahuan. Marcosta pushashpa shamupangui. Paica, Diospajta ñucahuan rurangapaj alimi capan.

12Tíquico shuti huauquitaca, Efeso pueblomanmi cachamurcani.

13Troas shuti pueblopi causajuj Carpo shuti huauquipaj huasipimi ruanata mingashpa shamurcani. Chaitaca librocunandi apamupangui. Escribingapaj alichishca caracunatacarin, ama cungashpa apamupangui.

14Jirruta imamambash tigrachishpa ruraj Alejandro runami, ñucataca ninandapacha llaquichihuarca. Pai imashna nalita rurashcashnami, Apunchi Jesusca tigrachinga.

15Chai runamandaca cuidaringui. Chai runaca, ñucanchi villanajuj Shimitaca nalicachishpami, na uyanayachirca.

16Cacharihuachun yashpa, mandajcunapaj ñaupajpi punda rimajujpica, shujllapash na ñucata ayudahuarcachu. Ashtahuangarin tucuillami, ñucata saquishpa rirca. Chaitaca, Diosca ama yaripachun ninimi.

17Ashtahuangarin Apunchi Jesusmi, ñucahuan carca. Paimi, villanata ñuca pactachijuchun ninan ushaita carahuarca. Chaimandami, na israelcunapash tucuicuna uyachun villajurcani. Chashnami ñucaca, leonbaj shimimanda cacharichi tucurcani.

18Apunchi Jesusllatami, tucui nalita ruranamandapash cacharichihuanga. Shinami, jahua pachapi pai mandashpa tiajuj llactaman alichishpa pushahuanga. Paitaca, causaita causaicaman ninanda alicachishunchi. Shina cachun.

Aliguta causapanguichi, Diospash bendiciachun nishpami tucuchishca

19Prisca shuti huarmitapash, Aquila shuti runatapash, Onesíforo shuti huauquipaj huasipi causajcunatapash, alillachu capanguichi nishcami nipangui.

20Erasto shuti huauquica, Corinto pueblopimi quedarca. Trófimo shuti huauquitaca huañujujpimi, Mileto pueblopi saquircani.

21Tamia quillacuna nara chayajpillata, ucha shamupangui. Eubulo, Pudente, Lino, Claudia shuti crijcunapash, shuj crijcunapash, tucuillami candaca alillachu capangui ninajun.

22Apunchi Jesucristoca, cambaj espirituhuan cachunmi munani. Diospaj ninan juyaipash, cangunahuan cachunmi munani. Shina cachun.