ÉXODO 32 - Quichua Imbabura Bible

1Israelcunaca, urcumanda Moisés na ucha uriajumujta ricushpami, Aaronbajman shamushpa cashna ninajurca:

—Ñucanchita ñaupashpa richun, ñucanchiman dioscunata rurangapaj jatari. Egipto llactamanda ñucanchita llujchimuj Moisés runaca, ima tucurcacha na yacharinllu— ninajurcami.

2Shina nijpimi Aaronga, cashna nirca:

—Cangunapaj huarmicunapaj, churicunapaj, ushicunapaj rinripi churajushca oro zarcillocunata llujchishpa apamuichi— nircami.

3Shina nijpimi, tucui israelcunaca paicunapaj rinripi churajushca oro zarcillocunata llujchishpa, Aaronbajman apamunajurca.

4Shina apamujpimi Aaronga, paicunapaj maquimanda oro zarcillocunata japishpa yacuyachishpaca, filo jirruhuan tacashpa, shuj shicuta rurarca. Shina rurajpimi, cashna ninajurca:

—Israelcunalla, caicunami Egipto llactamanda cangunata llujchimuj dioscuna— ninajurcami.

5Chashna ninajujta Aarón ricushpami, shuj altarta shicupaj ñaupajpi rurarca. Shina rurashpaca Aaronga:

—Cayapaca, Mandaj Diospaj jatun fiestami canga— nishpami caparijurca.

6Cayandi punllapaca tutamandata jatarishpami, chai shicuman animalcunata cushpa tucuillata rupachinajurca. Paihuan ali cangapaj caranacunatapashmi caranajurca. Israelcunaca micungapaj, ufiangapaj tiarishca jipami, cushijungapaj jatarinajurca.

7Shinamandami Mandaj Diosca, Moisestaca cashna nirca:

—Cunanga, urai rilla. Egipto llactamanda can llujchimushca, cambaj gentecunaca huaglishcami.

8Paicunaca, ali causachun ñuca mandashca ñanmandaca, ñapashmi anchurinajushca. Yacuyachishpa rurashca shicuta ninanda alicachishpa, animalcunata cushpa huañuchishpami, cashna ninajun: ‘Israelcunalla, caicunami Egipto llactamanda cangunata llujchimushca cangunapaj dioscuna’ ninajunmi— nircami.

9Mandaj Diosca, Moisestaca cashnatapashmi nirca:

—Cai gentecunataca, shinlliyashcapacha gentecuna cajtami ricuni.

10Cunanga, nina japirinshna paicunata fiñashpa, paicunata tucuchijuchun saquihuailla. Shina cashpapash canmandaca, shuj jatun llactatami rurasha— nircami.

11Shina nijpimi Moisesca, paita Mandaj Taita Diospaj ñaupajpi, cashna nishpa mañajurca:

—Mandaj Dioslla, ¿imashpata cambaj jatun ushaihuan, ninan ushaita charij cambaj maquihuan, Egipto llactamanda can llujchishca, can agllashcacunataca nina japirinshna fiñagringuiyari?

12Egipto llactapi causajcunaca, cashnami ninajunga: ‘Paicunataca, ¿nalipajchu llujchishca? ¿Urcucunapi huañuchingapaj, cai pachamanda chingachingapajchu llujchishca?’ ninajungami. Nina japirinshna fiñarishpa, can agllashcacunata llaquichingapaj munajushcamandaca llaquiripairi.

13Abrahamdapash, Isaactapash, Israeltapash, canda servijcunataca yaripairi. Paicunamanmi, canmandallata cashna nishpa juramentushcangui: ‘Ñucami, cangunapaj miraicunataca, jahua pacha luzerocunatashna mirachisha. Carashapachami nishca tucui cai llactata cangunapaj miraicunaman carajpimi, causaita causaicaman paicunapaj cachun japinajunga’ nircanguimi— nijurcami.

14Shina nijpimi Mandaj Diosca, pai agllashcacunata llaquichishami nishcamandaca, ninanda llaquirirca.

15Chai urcumanda Moisés tigrashpa urai shamushpaca, imashna causanata yachachishpa ishcandi ladoman escribichishca ishcai tabla rumita apashpami shamujurca. Chai tabla rumicunaca, caishuj ladomambash, chaishuj ladomambash, ishcandi ladoman escribishcami carca.

16Chai tablacunaca, Taita Dios rurashcami carca. Escribishcapash, tabla rumicunapi jirruhuan aspishcatashna rurashpa, Taita Dios escribishcami carca.

17Israelcuna ninanda caparinajujta, Josué uyashpami:

—Carpacunapica, macanajushpa caparinajujmi uyarin— nishpa, Moisesman villarca.

18Shina nijpimi Moisesca, cashna nishpa tigrachirca:

—Shinlli runacuna macanajuipi mishashpa caparishcapash, na canllu. Ushai illaj runacuna mishai tucushpa caparishcapash, na canllu. Ashtahuangarin ñucaca, cushijushpa candanajujtami uyani— nircami.

19Carpacunata shayachishca pushtuman Moisés chayajpimi, cashna tucurca: Moisesca shicutapash, chaipi bailanajujtapash ricushpami, nina japirinshna fiñarirca. Shina fiñarishpami, pai charijushca tabla rumicunata shitashpa, urcu chaqui ladopi faquirca.

20Shinallata paicuna rurashca shicuta japishpa, ninapi rupachishpami, ñutu ñututa cutarca. Shina cutashpami, yacucunapi tsirapachishpa, chai yacucunataca israelcuna ufiachun curca.

21Shina ufiachishpami Moisesca, Aarondaca cashna nirca:

—Cai gentecunapajman cai jatun juchata apamungapaca, ¿cai gentecunaca candaca imatata rurarca?— nircami.

22Shina nijpimi Aaronga, cashna nishpa tigrachirca:

—Ñucata mandajlla, ñucataca ama fiñahuaichu. Nalitalla rurangapaj munaj gentecuna cajtaca, canllata yachapanguimi.

23Paicunami cashna ninajuhuarca: ‘Ñucanchita ñaupashpa richun, dioscunata rurayari. Egipto llactamanda ñucanchita llujchimushca Moisés runataca, ima tucushcatapash na yachashcami tianajunchi’ ninajurcami.

24Shina ninajujpimi, cashna nishpa tigrachircani: ‘¿Pita orota charinguichi? Surcumuichi’ nircanimi. Shina nijpi orota ñucaman apamujpimi, chaicunataca ninapi churarcani. Shina churajpimi, cai shicuca llujshirca— nijurcami.

25Moisesca, Aaronllata na jarcashpa saquijpi israelcunaca, na jarcarishpa chashna rurashcata, shinallata paicunata fiñaj puracunapi pingai tucungapaj, chashna rurashcatami ricujurca.

26Moisesca, carpacunaman yaicuna pushtupi shayarishpami:

—¿Pita Mandaj Dioshuan canguichi? Ñucahuan tandanajumuichi— nirca.

Shina nijpimi Levipaj tucuilla miraicunaca, Moiseshuan tandanajurca.

27Shina tandanajujpimi Moisesca, cashna nirca:

—Israelcunata Mandaj Taita Diosca, cashnami nin: ‘Tucuicunallata cangunapaj espadata cangunapaj cinturaspi huatarichi. Shina huatarishpaca, pungun pungun yalishpa, carpacunaman yaicushpa cangunapaj huauqui cajpipash, cangunapaj cumba cajpipash, cangunapaj familia cajpipash, tucuicuna rishpa huañuchigrichi’ ninmi— nircami.

28Shina nijpimi Levipaj miraicunaca, Moisés mandashcashnallata ruranajurca. Israelcunaca chai punllapica, quimsa huarangashna runacunami huañurca.

29Shinamandami Moisesca, cashna nirca:

—Cunanga, cangunaca Mandaj Diospajllami tucushcanguichi. Tucuicunami, paipaj churi cajpipash, paipaj huauqui cajpipash huañuchishpa, Dios cangunata cunan bendiciachun, paipajlla tucushcanguichi— nircami.

30Chai jipami, cashna tucurca: Chai cayandi punllami Moisesca, israelcunataca cashna nirca:

—Cangunaca, jatun juchatami rurashcanguichi. Shina cajpipash, canguna juchata rurashcamanda Dios fiñarishcata yalichi ushashapashchari. Cunanga, Mandaj Diospajmanmi vichai rigrini— nircami.

31Chai jipami Moisesca, Mandaj Diospajman tigrashpa rishpa, cashna nirca:

—Cai gentecunami, oro dioscunata rurashpa, jatun juchata rurapashca. Chaimandami canda mañajupani.

32Cunanga, paicunapaj juchata cungapairi. Paicunapaj juchata na cungashpaca, ñuca shutita escribishca cambaj libromanda cunanda anchuchihuailla— nircami.

33Shina nijpimi Mandaj Diosca, Moisesman cashna nishpa tigrachirca:

—Maijan cashpapash ñucata fiñashpa juchata rurajtami, ñuca libromanda anchuchisha.

34Cunanga, cai gentecunataca, ñuca maiman pushashpa ri nircani, chaiman pushashpa rilla. Ricui ñuca angelmi, canda ñaupashpa ringa. Ashtahuangarin llaquichina punllapica, paicuna juchata rurashcamandaca ñucami llaquichisha— nircami.

35Shina nishpami, Mandaj Diosca israelcunataca, Aarón rurashca shicumanda ninanda llaquichirca.