LEVÍTICO 8 - Quichua Imbabura Bible

Aarondapash, paipaj churicunatapash Diospajlla cachunmi shicanyachishca(Éx. 29:1-37)

1Mandaj Diosca, Moisesmanmi cashna nishpa villarca:

2“Aarondapash, paipaj churicunatapash pushangui. Shinallata curacunapaj churajunacunatapash, talishpa javina aceitetapash, juchamanda cuna shicutapash, ishcai jari llamatapash, levadura illaj tandacuna tiajuj canastatapash japingui.

3Shinallata tandanajushca tucuilla israelcunatapash ñucahuan tuparina jatun carpa punguman tandachingui” nircami.

4Moisesca, Mandaj Dios mandashcashnallatami rurarca. Tucui israelcunami, Mandaj Dioshuan tuparina jatun carpa pungupi tandanajurca.

5Chaipimi Moisesca, tandanajushca israelcunataca: “Mandaj Diosmi, cashna rurachun mandahuarca” nirca.

6Shinamandami Moisesca, Aarondapash, paipaj churicunatapash carpa ñaupajman pushashpa armachirca.

7Aarondaca, túnica nishca jahualla churajunata churachishpami, cintahuan chumbilichirca. Chai jipaca, jahualla churajunata churachishpami, chai jahuapica, efod nishcata churachishpa, efodpillata tiaj cintahuan, aliguta shinlli chumbilichirca.

8Efod jahuapica, pectoral nishcatami churachirca. Chai ucupica, Urim nishca, Tumim nishcatami churarca.

9Chaipaj catipica, mitra nishcatami umapi churachirca. Mitra nishca jahuapica, orota tacashpa tablayachishpa rurashcatami, ñaupaj ladoman churachirca. Chaica umapi churana, Diospajlla shicanyachishca diadema nishcami carca. Chaitaca, Mandaj Dios imashna Moisesta mandashcashnallatami churachirca.

10Moisesca, talishpa javina aceiteta japishpami, jatun carpatapash, chai ucupi tucui imalla tiajcunatapash, aceiteta talishpa javirca. Chai jipaca, Diospajlla cachunmi shicanyachirca.

11Chai aceitehuanllatami, altar jahuapipash, canchiscaman tsirapachirca. Altartaca, chaipi tucui imalla tiajcunandimi, aceiteta talishpa javirca. Shinallata jatun pailatapash, chaita tiachina bazatapashmi, aceitehuan javirca. Diospajlla cachun shicanyachingapajmi, chashna rurajurca.

12Chai jipami Moisesca, talishpa javina aceiteta, Aaronbaj umapi talirca. Diospajlla cachun shicanyachingapajmi, aceiteta talishpa javirca.

13Chai jipami Moisesca, Aaronbaj churicunataca ashtahuan quimirichun mandashpa, túnica nishca jahualla churajunacunata churachishpa, cintacunahuan ali chumbilichirca. Mandaj Dios imashna Moisesta mandashcashnallatami, umapi churajuna tiara nishcatapash churachirca.

14Chai jipami Moisesca, juchamanda cuna shicuta apamuchun mandarca. Shina apamujpimi Aaronhuan, paipaj churicunahuanga, juchamanda cushca chai shicupaj umapi paicunapaj maquita churarca.

15Chai shicutaca, cungata muchushpa huañuchishpami Moisesca, chai yahuarta japishpa, altar muyundipi tiaj cachucunapipash, paipaj maqui dedohuan javirca. Shina rurashpami, ima mapapash illajta rurarca. Puchushca yahuartaca, altar chaquipi talishpami, Dioshuan ali tucungapaj rupachina altar cachun, Diospajlla altar cachun shicanyachirca.

16Chai jipami Moisesca, chunllulicunapi tiaj viratapash, yana shungupi tiaj viratapash, ishcandi riñondapash, chaicunapillata tiaj viratapash llujchishpa, altarpi rupachijurca.

17Ashtahuangarin shicupaj carata, aichata, huanutaca, Mandaj Dios mandashcashnallatami, carpacunamanda canllaman llujchishpa rupachijurca.

18Chai jipami, Diosman cushpa tucuillata rupachina jari llamata apamuchun mandarca. Shina apamujpimi Aaronbash, paipaj churicunapash, chai jari llamapaj umapi maquita churanajurca.

19Chai jipami Moisesca, chai jari llamataca cungata muchushpa huañuchishpa chai yahuartaca, altarpi tsirapachirca.

20Chai jari llamapaj aichataca, Moisesca asha asha fitishpami, chai fitishca aichacunatapash, umatapash, viratapash rupachijurca.

21Chai jipami Moisesca, chunllulicunatapash, changacunatapash maillashpa, chai jari llamataca, tucuillata altarpi rupachijurca. Mandaj Diosman cushpa rupachijujpi mishquillagu ashnachunmi, chashna rupachijurca. Mandaj Dios imashna Moisesta mandashcashnallatami rupachijurca.

22Chai jipami, Diospajlla shicanyachishcata ricuchingapaca, shuj jari llamata apamuchun mandarca. Chai jari llamapaj umapica Aaronbash, paipaj churicunapashmi, paicunapaj maquita churarca.

23Chai llamataca, cungata muchushpa huañuchishpami Moisesca, chai jari llamataca huañuchishpa, asha yahuarta japishpa, Aaronbaj ali lado rinri pundapipash, ali lado maqui mama dedopipash, ali lado chaqui mama dedopipash churarca.

24Shinallata Aaronbaj churicunatapash ashtahuan quimirichun mandashpami Moisesca, paicunapaj ali lado rinri pundapipash, ali lado maqui mama dedopipash, ali lado chaqui mama dedopipash, chai yahuartallata churarca. Chai puchushca yahuartaca, altar jahua muyundipimi tsirapachirca.

25Chai jipami viratapash, chupatapash, chunllulipi tiaj viratapash, yana shungupi tiaj viratapash, ishcandi riñondapash, chaicunapi tiaj viratapash, ali lado rigra aichatapash llujchirca.

26Shinallata levadura illaj tandahuan, Mandaj Diospaj ñaupajpi tiajuj canastamandapashmi, levadura illaj mishqui tandata, aceitehuan rurashca shuj mishqui tandata, shuj tortillatapash japirca. Chaicunataca virahuan, ali lado rigra aichahuanmi churarca.

27Tucui chaicunataca Aaronbaj maquipi, paipaj churicunapaj maquipimi curca. Paicunami, Mandaj Diospaj ñaupajpi vichai cuyuchishpa cunashnallata, vichai cuyuchishpa Diosman cunajurca.

28Chai jipami Moisesca, tucui chaicunata paicunapaj maquimanda japishpa, Diosman animalta cushpa tucuillata rupachijuj altarpi churashpa rupachirca. Diospajlla cachun shicanyachijujpi mishquillagu ashnajuchunmi, Mandaj Diosman cushpa rupachijurca.

29Moisesca, jari llamapaj pecho aichata japishpami, Mandaj Diospaj ñaupajpi vichai cuyuchishpa, cunshnallata vichai cuyuchishpa Diosman cujurca. Mandaj Dios imashna Moisesta mandashcashnallata, Diospajlla cachun shicanyachingapaj cushca jari llama aichatami, pai japina carca.

30Chai jipami Moisesca, talishpa javina aceitetapash, altarpi tiajuj yahuartapash japirca. Shina japishpami, Aarondapash, paipaj churajunatapash, paipaj churicunatapash, paicunapaj churajunacunatapash chaicunahuan tsirapachirca. Shinami Aarondapash, paipaj churajunacunatapash, paipaj churicunatapash, paicunapaj churajunacunatapash, Diospajlla cachun paihuanllata shicanyachirca.

31Chai jipami, Moisesca Aarondapash, paipaj churicunatapash cashna nijurca: “Aichataca, Dioshuan tuparina jatun carpa pungupi micunguichi. Chaipica, Diospajlla cachun shicanyachishpa cuna tanda tiajuj canastamanda tandahuan micunguichi. Chaicunataca, ñuca mandashcashnallata micunguichi. Chaitaca, cashna nishpami mandarcani: ‘Chaicunataca Aaronhuan, paipaj churicunahuanmi micunga’ nircanimi.

32Puchushca aichata, puchushca tandataca tucuillata rupachinguichi.

33Diospajlla cachun cangunata shicanyachijushca, canchis punlla chayangacamanmi, Dioshuan tuparina jatun carpa pungumandaca maimambash na llujshina canguichi. Canchis punllacamanmi, Diospajlla cangapaj shicanyachi tucunguichi.

34Imashna cunan rurashcashnallata rurachunmi Mandaj Diosca, juchamanda cuchun mandarca.

35Dioshuan tuparina jatun carpa pungupimi, tutapash punllapash, canchis punllacaman chaipi cana canguichi. Canguna ama huañungapajmi, cai mandashcataca, Mandaj Diospaj ñaupajpi cazuna canguichi. Shina nishpami, ñucataca mandahuarca” nijurcami.

36Mandaj Dios mandashpa, Moiseshuan villachishcashnallatami Aaronbash, paipaj churicunapash tucuita ruranajurca.