1Bel shuti diosca, alpaman urmashpami, chaipi sirijun. Nebo shuti diospashmi, alpaman urmashca. Imamambash rijchaj paicunapaj dioscunataca, aparij animalcunamanmi apachirca. Canguna apashpa purishca chai dioscunataca, shaijushca animalcunamanmi apachishpa purin.
2Chai dioscunahuan tandachishcami, pingai tucushpa urai cumurinajurca. Chai llashachij llaquicunamandaca, na quishpiri usharcachu. Ashtahuangarin paicunallatami, prezu rinajurca.
3Jacobopaj miraicunalla, uyahuaichi. Huaquin puchushca israelcunalla, tucuicuna uyahuaichi. Ñucami, mamapaj vijsapi canguna tiajushcamandapacha cuidashpa charini. Mamapaj vijsapi canguna tiajushcamandapachami, tucuimanda huacaichishpa pushamurcani.
4Rucuyangacamambash, ñucallatami cuidashpa charini. Ñucaca, imata rurashpa fiñachijujpipash, yuraj ajcha tucungacamanmi na fiñarishpa cuidasha. Ñucami cangunataca rurarcani, ñucallatami cuidasha. Imata rurashpa fiñachijujpipash, ñucallatami na fiñarishpa huacaichishpa charisha.
5Ñucataca, ¿pihuanda chimbapuranguichi? ¿Piman rijchajmi yanguichita? Ñucataca, ¿piman rijchaj cajpita chimbapuranguichi?
6Orota, culquita muchilamanda llujchishpami, balanzacunapi pezan. Chai jipaca, culquita ruraj runaman culquita cushpami, paicunapaj shuj diosta rurachin. Chai diostami, cungurishpa mañan.
7Chai diostaca, rigra jahuapi churashpa apashpami, shuj pushtupi churan. Chai pushtupica tiajunllami, chai pushtumandaca maimambash na cuyurinllu. Caparishpa mañajpipash, na tigrachinllu. Jatun llaquimandapash, na quishpichinllu.
8Chaita rurashcata yarishpa pingai tucuichiyari. Yachashpata na cazujcuna, ali tucuichiyari.
9Yalishca punda huatacunapi, ñuca imata rurashcacunatapash yarichiyari. Ñucami Taita Dios cani, ñucamanda shuj Taita Diosca na tianllu. Ñucaman rijchajca, imapash na tianllu.
10Jipa punllacuna ima tucunatapash, ñucami callarimandapacha villani. Nara imapash tiajpillatami, pundamandapacha villarcani. Ñuca yuyaita cushcacunaca, tucui causaipajmi canga. Ñuca munashcataca, tucuilla rurashapachami ninimi.
11Ñucami, indi llujshimuj ladomanda, alasyu animalta cayanshna, caru llactamanda ñuca yarishca shuj runata cayarcani. Ñucami cayarcani, paitaca pushamushami. Ñuca yarijushcataca, pactachishapachami.
12Shinlli shungucuna, uyahuaichi. Cangunaca, imatapash cashcatapacha ruranamanda, carupimi causanguichi.
13Imatapash cashcatapacha ruranataca ñami pactachigrini. Chaita ruranaca, na caruyangachu. Ñuca quishpichinaca, na jarcaringachu. Sion shuti pueblopimi quishpirinataca churasha. Ñuca punchapambatapash, Israel llactapimi churasha.
Who We AreWhat We EelieveWhat We Do
2025 by iamachristian.org,Inc All rights reserved.
