2 SAMUEL 10 - Quichua Imbabura Bible

Amonitacuna, siriocunami mishai tucushca(1 Crón. 19:1-19)

1Chai jipami, cashna tucurca: Amón shuti llactata jatun mandaj huañujpica, paipaj churi Hanún shuti runami, paipaj randi mandajurca.

2Chaita yachashpami Davidca: “Ñucami, Nahas shuti runapaj churi Hanún runahuanga, paipaj taita ñucahuan ali cashcashnallata, alicunata ruragrini” nirca. Shina nishpami, Hanún shuti runapaj taita huañushcamanda imatallapash nishpa cushichinajuchun, Davidca cacharca. Ashtahuangarin Davidpaj servijcuna, Amón llactaman chayajpica,

3Amón llactata cati mandajcunaca, paicunapaj amo Hanún runamanmi, cashna ninajurca: “¿Davidca, cambaj taita huañushcamanda imatallapash nishpa cushichinajuchunmi cachamushca yanguichu? ¿Nachu cai pueblota tucuchingapaj, ali ricuchun Davidca, paipaj servijcunata cachamushcanga?” ninajurcami.

4Shina nijpimi Hanún runaca, Davidpaj servijcunata japishpaca, lado barbastalla ruturca. Paicunapaj churajunatapash, cinturasmanda uraiman cuchushpami, cayacaman nishpa cacharca.

5Chashna rurashcata Davidman villajpimi, paicunata tuparichun cacharca. Paicunaca, ninanda pinganayachijpimi jatun mandajca, cashna nichun cacharca: “Barbas viñangacaman, Jericó pueblopi shuyaichilla. Chai jipaca tigramunguichillami” nichunmi cacharca.

6Amonitacunata David na ricunayachishcata yachashpami, paicunaca Siria llactapi tiaj Bet-rehob shuti, Soba shuti pueblocunamandaca, chaquilla purij ishcai chunga huaranga siriocunata, Maaca llactata jatun mandajpajmandaca, huaranga runacunata, Is-tob shuti llactamandaca, chunga ishcai huaranga runacunata culquita cushpa pushamuchun cachanajurca.

7Davidca, chaita uyashpami Joab runataca, macanajunata ali yachaj tucuilla soldadocunandi cacharca.

8Amón llactamanda runacuna llujshishpaca, puebloman yaicuna pungu ladopimi macanajungapaj alichirinajurca. Ashtahuangarin Soba shuti llactapi, Rehob shuti pueblopi causaj siriocunaca, Is-tob shuti llactamanda, Maaca shuti llactamanda runacunandimi, shuj lado pambapi shuyanajurca.

9Ñaupa ladotapash, cuidaj soldadocunapaj huasha ladotapash shamunajujta yachashpami Joab runaca, agllashca tucui Israel puracunamanda ashtahuan ali soldadocunata agllashpa, siriocunahuan macanajungapaj alichirirca.

10Chai jipami, agllajpi puchushca soldadocunataca, paipaj huauqui Abisai shuti runa pushachun cushpa, amonitacunata tuparigrichun, jilapi ali shayachishpa cacharca.

11Paitaca cashnami nirca: “Siriocuna ñucata mishai callarijpica, can ayudahuangui. Shinallata amonitacuna canda mishai callarijpica, ñucami ayudasha.

12Shinlli shayaringui. Ñucanchi gentecunamanda ñucanchi Taita Diospaj pueblocunamandaca, shinllitapacha shayarishun. Mandaj Diospash, paipaj imashna ali cana cajpipash chaita rurachunlla” nircami.

13Shinami Joab runaca, paipaj runacunandi, siriocunahuan macanajungapaj chayagrirca. Ashtahuangarin siriocunaca, paicunapaj ñaupajmanda pacajushpami calpanajurca.

14Shinallata siriocuna pacajushpa calpashcata Amón llacta runacuna ricushpami, paicunapash Abisai shuti runapaj ñaupajmandaca pacajushpa calpashpa pueblopi pacajugrirca. Joab runaca, amonitacunahuan macanajushpa tigrashpami, Jerusalenman shamurca.

15Ashtahuangarin siriocunaca, israelcunahuan mishai tucushca cashpami, cutin tandanajunajurca.

16Hadad-ezer shuti runaca, Eufrates yacu chimba ladomanda siriocunata llujchimuchunmi cacharca. Paicunaca, Hadad-ezer runapaj soldadocunata mandaj Sobac shuti soldadotami, paicunata mandaj cachun churashpa, Helam shuti puebloman shamunajurca.

17Chaita Davidman villajpica, tucuilla israelcunata tandachishpami, Jordán yacuta chimbashpa, Helam shuti puebloman shamurca. Siriocunapash, Davidhuan macanajungapaj alichirishpami, paihuan macanajurca.

18Ashtahuangarin siriocunaca, israelcunapaj ñaupajmandaca manllashpami calpanajurca. Davidca, carretapi purij canchis patsaj runacunata, caballopi rij chuscu chunga huaranga runacunatami huañuchirca. Soldadocunata mandaj Sobac shuti runatapash chugrichijpimi, paica chaipillata huañurca.

19Hadad-ezer shuti runata ayudaj tucui jatun mandajcunaca, israelcunahuan imashna mishai tucushcata ricushpami, israelcunahuan ali tucushpa, paicunata servinajurca. Siriocunaca, chai punllamandapachami amonitacunata ayudangapaca manllarca.