2 CORINTIOS 9 - Quichua Imbabura Bible

1Diospajlla causajcunaman culquita carangapaj tandachijcunataca tandachipaichi nishpaca, na cutinga escribinachu cani.

2Paicunaman canguna carangapaj munashcataca, alimi yachani. Shina cashpami, Acaya shuti llactapi causajcunaca, caina huatallatami carangapaj munaihuan carca nishpa, Macedonia llactapi causanajuj crijcunaman cushijushpa parlajurcani. Chaita yachashpami, paicunapash ashtacacuna carangapaj munarca.

3Chaimandami, canguna carangapaj munashcata ñuca cushijushpa parlajushcapash ama yanga cachun, cai huauquicunataca cachamujuni. Cangunamanda ñuca parlashcashnallatami, carangapaj shuyachun munani.

4Macedonia llactamanda huaquinguna ñucahuan shamushpa, canguna narapash alichishca cajpillata shamujpica, ñucanchimi pingai tucushun. Ña tandachishcami canga nishpa, ñucanchi cushijushca cajpita narapash tandachishca cashpaca, cangunacarin ashtahuanmi pingai tucunguichi.

5Ama chashna tucuchunmi, ñuca yachachishca ali cana cajpi, cai huauquicunataca ñaupapaichi nishpa, cangunapajman pundata cachamuni. Cangunaca, na ñucanchi mandajpillata cushijushpa carangapaca, pundata ari nishpa yarishcallami carcanguichi. Chaita tandachishpa cachanalla shuyachunmi, paicunataca cachamuni.

6Ashtahuangarin ñucami, cashna nini: Ashallata tarpushpaca, ashallatami japinga. Shinallata ashtaca muyuta tarpushpaca, ashtacatami japinga.

7Tucuicunallata cangunapaj shungupi yarichishcatami, carana canguichi. Na llaquirishpami carana canguichi. Mandajpillapash na caranachu canguichi. Taita Diosca, cushijushpa carajtami juyan.

8Taita Diosca ninan ushaita charishpami, ninanda juyajun. Shina cashpami, canguna imata charichumbash, tucui causaipi ninanda caramujun. Shina caramujpimi ima alita rurangapajpash, imapash na illaj canguichi.

9Escribishcapica cashnami nijun:

“Chaupishpami, imagutapash na charijcunaman cararca.

Imatapash cashcatapacha ruraj canaca,

paipaca causaita causaicaman na tucuringachu” nijunmi.

10Diosllatami, muyutapash tarpuchumbash, micuchumbash caramujun. Paillatami, canguna tarpushcatapash ashtahuan ali mirachinga. Shinallata imatapash cashcatapacha canguna rurashcatapash mirachingami.

11Imaguta ashtahuan charishpa, na llaquishpa imagutapash carachunmi, chashna mirachinga. Canguna carashcata ñucanchi saquigrijpimi, paicunaca Taita Diosta pashi ninajunga.

12Canguna cashna carashpa Diospajta rurashcacunaca, Diospajlla causajcuna imaguta na charijpilla carangapaca na canllu. Ashtahuangarin chai carashcamanda, Taita Diosta ninanda pashi ninajuchumbashmi caranga.

13Cristomanda ali villaita cazushpa, chashna carashpa aliguta Diospajta rurashcamandami, paicunapash Taita Diostaca punchapambagumi cangui ninajunga. Paicunamambash, ashtahuan shujcunamambash na llaquishpa carajpimi, chashna ninajunga.

14Shinallata cangunamambash, Taita Dios ninanda juyashpami aliguta caramujun. Canguna carashcata paicuna japishpami, cangunata juyashpa Diosta mañanajunga.

15¡Na parlai ushanallata caramushcamandami, Taita Diostaca pashi ninajushunchi!