ISAÍAS 32 - Quichua Imbabura Bible

Imatapash cashcatapacha ruraj Jatun Mandajmandami villajun

1Ricuichi, jipa punllacunapica, imatapash cashcatapacha ruraj jatun mandajmi mandanga. Tucuita ali ricushpa mandajcunapashmi, mandashpa tianajunga.

2Chai jatun mandajca, ninan huairata pacajunashnami canga. Jatun acapanata pacajunashnami canga. Chaquishca pambapi yacu llujshishpa rijunshnami canga. Ninan rupai pambapi, jatun rumi llandushnami canga.

3Shinamandami ricujcunapaj ñavipash, na ashtahuan amsayanga. Uyajcunapash, yuyaita japishpapachami uyanajunga.

4Shinlli shungucunapash, yuyaita japishpami imata cashpapash yachanajunga. Jarcarishpa jarcarishpa rimajcunapash na pandashpallami, aliguta ñapash rimanajunga.

5Mitsa runataca, ña na caica alimi ninajungachu. Llulla runatapash, ña na alipachami ninajungachu.

6Mitsa runaca, nalitallami parlanga. Paipaj shungupipash, jatun nalita ruranatalla yarishpami, nalitalla ruran. Mandaj Diostapash, na cazushpami asin. Shinami yarjaihuan purijtapash, chushaj maquita saquin. Ninanda yacunayachishpa purijcuna ufianatapash, quichushpami saquin.

7Llullashpa urmachinatalla yarij runaca nalipachami. Imapipash umachingapaj pacalla yarishpami, na yachajushca runacunataca, llulla shimicunahuan llaquichin. Imagutapash na charij runataca, mandajcunapaj ñaupajpi llullashpami mishan.

8Ashtahuangarin imagutapash na mitsashpa caraj runaca, na mitsashpa caranatami yarin. Shinamandami, paica alicachi tucunga.

Jerusalenbi causaj huarmicunatami rimashca

9Imata ruranatapash na yarij huarmicuna jatarishpa, ñuca rimashcata uyaichiyari. Ima llaqui shamunatapash, na yarishpa causaj huarmicuna, ñuca imatalla yarishpa villashcata uyaichiyari.

10Ima llaqui shamunatapash na yarishpa causaj huarmicuna. Caimanda huata jipaca, jatun manllarinami shamunga. Uvasta pallanaca, na ashtahuan tiangachu. Imata cozechanapash illangami.

11Imata ruranatapash na yarijcuna, chujchurichiyari. Ima llaqui shamunatapash na yarishpa causanajuj huarmicuna, ninanda llaquirishpa, cangunapaj churajunata llujchishpa, cañamuta cinturaspi huatarichiyari.

12Cangunaca, juyailla fucuj pambacunamanda, ali uvas chagracunamandami, pechota huactarishpa huacanguichi.

13Ñuca agllashcacunapaj llactapi, cushijuna tucui huasi jahuacunapi, cushijuna pueblopica cashacuna, nali jihuacunami viñashpa jundanga.

14Mandashpa tiajuna huasicunapash, jichushcami siringa. Pueblopi causanajuj ashtaca gentecunapash tucuringangami. Shinlli pircahuan huasicunapash, torrecunapash, sacha burrocuna causana jatun utujucuna tucushpami, causaita causaicaman chashna canga. Huagracuna shayana pushtucunami tucunga.

15Jahua pachamanda Espirituta, ñucanchi jahuapi cachamungacaman, jichushca pambapash, ali fucuj pamba tucungacaman, shinallata chai fucushca chagracunaca, bosqueshna ricuringacamanmi, chashna canga.

16Jichushca pambapica, ima llaquichinapash na tiangachu. Ali fucuj chagrapipash, imatapash cashcatapachami ruranajunga.

17Imatapash cashcatapacha rurashcamandaca, casilla ali causaimi tianga. Imatapash cashcatapacha rurashpa chashna causashcamandaca samanapash, imata na manllashpa causanapash, causaita causaicamanmi tianga.

18Ñuca agllashca gentecunaca, casilla aliguta causana llactapimi causanajunga. Ima llaquipash illaj, cushilla samana huasicunapimi causanajunga.

19Rundu urmashpapash, urcucunapillami urmanga. Pueblopica, ninanda pingai tucushpami cumuringa.

20Tucui yacu manñacunapi tarpujcuna, huagrata, burrota cacharishpa saquijcuna, cushijuichiyari.