DEUTERONOMIO 29 - Quichua Imbabura Bible

Mandaj Diosca, Moab llactapimi israelcunahuan ari nijushca

1Israelcunata ari nichijuchun Mandaj Dios, Moab llactapi Moisesta mandashca shimicunaca, caicunami. Horeb shuti urcupi ari ninajushca jahuami, cutin ari ninajurca.

2Moisesca, tucui israelcunata cayashpami, cashna nijurca:

“Egipto llactapi Faraondapash, paita tucuilla servijcunatapash, paipaj llactapi tucui causajcunatapash, cangunapaj ñaupajpi Mandaj Dios imatalla rurajtaca, cangunallata ricushcanguichimi.

3Canguna imashna cajta ricungapaj jatun llaquicunata rurajujta, imapash ricuchinacunata ricuchijujta, jatun manllarinacunata rurajujtaca, cangunapaj ñavihuambachami ricurcanguichi.

4Shina cajpipash Mandaj Diosca, chaita canguna yachana shungutaca, cunangaman nara cushcachu. Ricuchun ñavitapash, uyachun rinritapash nara cushcachu.

5Jichushca pambataca, chuscu chunga huatatami cangunataca pushamujurcani. Chai tucui huatacunapipash, canguna churajushcacunaca na maucayashcachu. Cangunapaj chaquipi churajushcacunallapash na maucayashcachu.

6Tandatapash na micushpa, vinotapash, sidratapash na ufiashpami purircanguichi. ‘Ñuca, cangunata Mandaj Taita Dios cajta yachachunmi, chashna pushamurcani’ nircami.

7Cai llactaman chayamujpica, Hesbón shuti pueblota jatun mandaj Sehón shuti runapash, Basán llactata jatun mandaj Og shuti runapashmi, ñucanchihuan macanajungapaj llujshimurca. Paicunataca ñucanchimi misharcanchi.

8Shina mishashpa paicunapaj llactata japishpami, Rubenbaj, Gadpaj aillucunamambash, Manasespaj chaupi aillumambash, paicunapaj cachun paicunaman curcanchi.

9Shina cashcamanda ari ninajushca cai shimicunataca pactachishpami, tucuita rurana canguichi. Canguna tucui imata rurashcapash ali llujshichunmi, chashna pactachina canguichi.

10Cangunaca, cunanga tucuicunami, cangunata Mandaj Taita Diospaj ñaupajpi canguichi. Aillucunata umashna mandajcunapash, cangunata mandaj rucucunapash, cangunata caishuj mandajcunapash, tucui Israel jaricunapash, caipimi canguichi.

11Cangunapaj huahuacunapash, cangunapaj huarmicunapash caipimi canguichi. Shinallata shuj llactamanda shamushpa cangunapaj chaupipi causajcunapash, yamdata chijtajcunamanda callarishpa, yacuta ashtajcunacaman caipimi.

12Cangunata Mandaj Taita Dios cangunahuan ari nishcata chasquingapajmi, caipi canguichi. Cunanga, cangunata Mandaj Taita Dios ari nishpa juramentushcata pactachingapajmi, caipi canguichi.

13Cunanga, cangunapaj ñaupa taita Abrahamman, Isaacman, Jacoboman juramentushcashnallata, pai agllashca gentecuna cachun, shinllitapacha churangapaj, paipash cangunapaj Taita Dios cachunmi, chashna ari nichini.

14Cai ari nishcatapash, cai juramentushcatapash, na cangunahuanlla rurajunichu.

15Ashtahuangarin ñucanchita Mandaj Taita Diospaj ñaupajpi, cunan caipi ñucanchihuan tandanajushca gentecunahuambash, cunan caipi ñucanchihuan nara tandanajushca gentecunahuambashmi, chashna rurani.

16Egipto llactapi imashna causashcatapash, ñucanchi shamunajushpa llacta chaupicunata yalimushcatapash, cangunallata alimi yachanguichi.

17Chai llactacunapi causajcuna millanayaicunata ruranajujtapash, caspita, rumita, culquita, orota rurashca yanga dioscunata paicuna charijtapash ricurcanguichimi.

18Canguna purapica, pactarallapash jari cashpa, huarmi cashpa, na cashpaca maijan familia cashpa, na cashpaca maijan aillupura cashpapash, ñucanchita Mandaj Taita Diosta cunanda paicunapaj shungupi cunganman. Shina cungashpara, chai llactacunapi causajcunapaj dioscunata servingapaj rinman. Canguna purapica, imapash jayajta, ajenjota fucuchij sapita charij yurashna tianman.

19Shina tiashpara, ninanda nalicachishca cai shimicunata uyashpapash, paillata bendiciarishpa paipaj shungupi cashna nijunman: ‘Shinlli shungu cashpapash, machashpa, yacunayaita yalichishpaca, casilla ali causaitami charisha’ nijunman.

20Chashna nalita rurashcataca, Mandaj Diosca napacha cungangapaj munangachu. Ashtahuangarin ninanda cushnijunshna fiñarishpami, Mandaj Diosca paipajlla cachun munashpa, chai runataca llaquichinga. Shina rurashpaca, ninanda nalicachishca shimicunata cai libropi escribishca tiajunshnallatami, Mandaj Diosca chai runataca llaquichinga. Shinami Mandaj Diosca, chai runapaj shutitaca, cai pachamanda chingachinga.

21Mandaj Diosca chai runata llaquichingapajmi, tucui Israel aillucunamanda shicanyachinga. Ninanda nalicachishca shimicunata uyashpami, ari nircanguichi. Chai shimicunata, cai mandashca libropi escribishca tiajunshnallata llaquichingapajmi, chashna shicanyachinga.

22Cangunapaj cati miraicunapash, cangunapaj jipa churicunapash, caru llactacunamanda shamuna runacunapashmi imatapash ninajunga. Paicunaca, huañuchij llaquicunata cai llactaman cachamujta ricushpa, Mandaj Dios cachamushca jatun ung:uicunata ricushpami, chashna rimanajunga.

23(Paicunapaj tucuilla llactaca, azufrehuan, cachihuanmi rupachi tucunga. Chaipica, imatallapash na tarpungachu, imapash na fucungachu. Chaipica, jihuallapash na viñangachu. Sodoma, Gomorra, Adma, Zeboim shuti pueblocunashnallatami tucunga. Chai pueblocunataca, Mandaj Diosmi ninandapacha ñapash fiñarishpa tucuchirca).

24Ashtahuangarin tucui llactacunapi causajcunapashmi, cashna ninajunga: ‘Mandaj Diosca, ¿imashpashi cai llactataca cashna llaquichirca? Nina japirinshna chashna ninanda fiñarishpa llaquichishcacunaca, ¿imatashi ricuchijun?’ ninajungami.

25Shina ninajujpimi shujcunaca, cashna nishpa tigrachinajunga: ‘Paicunapaj ñaupa taitacunata Mandaj Taita Diosmari, Egipto llactamanda llujchimushpaca, paicunatapash ari nichirca. Chaita na pactachishpa saquishcamandami, chashna rurashca.

26Chashna saquishpamari, shuj dioscunatara servingapaj rishpa, chai dioscunatara cungurinajushca. Paicuna na rijsishca dioscunata, imatallapash na caraj dioscunatami cungurinajushca.

27Chaimandami Mandaj Diosca, cai llactapi causajcunahuanga nina japirinshna fiñarishca. Shina fiñarishpami, ninanda nalicachishca tucui shimicunata cai libropi escribishca tiajunshnallata, paicunapaj jahuapi cachamushca.

28Chashna ninandapacha ñapash fiñarishpa, napacha ricunayachishpami Mandaj Diosca, paicunapaj llactamandaca sapimanda aisanshna llujchishpa, shuj llactaman cachashca. Chaitami cunangaman ricunajunguichi’ ninajungami.

29Imapash pacallacunaca, ñucanchita Mandaj Taita Diospajmi. Ashtahuangarin imatalla ricuchishcacunaca ñucanchipajpash, ñucanchi huahuacunapajpash, causaita causaicaman pactachingapajmi. Tucui cai mandashca shimicunata ñucanchi pactachishpa causanajuchunmi, chashna tianajun.