MARCOS 9 - Quichua Imbabura Bible

1Jesusca, cashnatapash nircarami:

—Na llullashpami, cangunataca cashna nini: Taita Dios ninan ushaihuan mandajujtami ricunguichi. Chaitaca, caipi shayanajuj puramanda huaquingunaca, nara huañushpallatami ricunguichi— nircami.

Jesusca, punchapamba tucushpami ricurishca(Mat. 17:14-21; Luc. 9:37-43)

2Shina villajushpami, sucta punlla jipaca Pedrotapash, Jacobotapash, Juandapash, paicunatalla pushashpa Jesusca urcuman rirca. Paicunapaj ñaupajpimi, punchapamba tucushpa Jesusca ricurirca.

3Pai churajushcapash, yura yura rasushna punchapamba tucushpami ricurirca. Cai pachapica, pipash na chashna yuraj yurajtaca tajshai ushanllu.

4Shinallata Eliaspash, Moisespash Jesushuan parlanajujtami, paipaj yachajujcunaca ricurca.

5Shina ricushpami Pedroca, Jesusta cashna nirca:

—Ñucanchica, alipajmari shamupashcanchi, Yachachij. Cunanga, quimsa chugllagutami rurapashun ninchi. Shujtaca canman, shujtaca Moisesman, shujtaca Eliasmanmi ruragrinchi— nircami.

6Chai quimsa yachajujcunaca, ninanda manllarishpa ricunajushpami, Pedroca paillata imata nijushcatapash na yachai usharca.

7Shina nijujpillatami, fuyu llandushpa paicunataca, ñapash quilparca. Chai fuyu ucumandaca, cashna rimajmi uyarirca:

—Caimi, ñuca juyashca Churigu. Paitami uyana canguichi— nircami.

8Shina nishca jipami, chai yachajujcunaca muyundi ricunajurca. Shina ricushpaca pipash illajpi, Jesuslla paicunahuan shayajushcatami ricunajurca.

9Chai urcumanda urai shamunajushpami Jesusca, chai quimsa yachajujcunataca cashna nirca:

—Canguna ricushcataca, pimambash na villanachu canguichi. Runa Aichayu tucushca ñucami, huañuchi tucushpapash, huañushcacunapaj chaupimanda causarina cani. Chai jipaca, canguna ricushcataca villanguichilla— nircami.

10Shina nishcata cazushpami, pimambash na villanajurca. Ashtahuangarin paicunapura parlarishpami:

—‘Huañuchi tucushpapash causarishami’ nishpaca, ¿imamandashi shina nijun?— ninajurca.

11Shina ninajushpami:

—Mandashca shimita yachachijcunaca, ¿imashpata: ‘Eliasrami punda shamunga’ ninajun?— nishpa, Jesustaca tapunajurca.

12Shina tapujpimi Jesusca, cashna nishpa tigrachirca:

—Na llullashpami nini: Elías ñaupashpa shamushpami, tucui imagutapash alichijunga. Runa Aichayu tucushca ñucata ninanda na ricunayachishpa llaquichinamandaca, ¿imashnata escribishca tiajun?

13Ashtahuangarin canguna yachachunmi, cashna villani: Eliasca ñami shamurca. Paitaca, escribishcapi nijunshnallatami, paicuna tucui ima munashcata ruranajurca— nijurcami.

Aya jundashca huambratami, Jesusca alichishca(Mat. 17:14-21; Luc. 9:37-43)

14Jesusca, paita shuyanajuj yachajujcunapajman chayamushpami, ashtaca gentecuna paicunataca chaupipi churashca shayanajujta ricurca. Chai yachajujcunahuanga, mandashca shimita yachachijcunapash fiñanajushpa rimarinajujtami ricurca.

15Chai tucuilla gentecunaca, Jesús shamujujta ricushpami, manllarishpa tuparingapaj calpanajurca. Paita tuparishpaca, alillachu shamujupangui ninajurcami.

16Chai jipami:

—¿Imatata chaicunahuanga nirinajunguichi?— nishpa Jesusca, paipaj yachajujcunata tapurca.

17Shina tapujpimi, chai gentecunamanda shuj runaca, Jesustaca cashna nijurca:

—Yachachij, ñuca churigutami upayachij aya jundashca cajpi, cambajman apamuparcani.

18Chai ayami, maipi cashpapash juizuta tucuchishpa alpapi urmachin. Quirutapash canirishpami, babasta shimiman shitapan. Shina cashpami, ashtahuan tulluyashpa catijupan. Ayata llujchipaichi nishpami, cambaj yachajujcunaman mingajuparcani. Ashtahuangarin paicunaca, na llujchi usharcachu— nijurcami.

19Shina nijpimi Jesusca, paicunata cashna nirca:

—¡Ñucata napacha ali crij miraicunalla. ¿Ima horascamanda cangunahuanga, cashna cashayari? ¿Ima horascamanda cangunahuanga llaquirijushallayari? Chai huambragutaca, caiman apamugrichi— nircami.

20Shina apamujpi chai aya, Jesusta ricushpaca, chai huambrataca alpapi urmachishpami, ninanda chujchuchirca. Chai huambraca, shimipash babasapami caiman chaiman shitarijurca.

21Shina sirijujpimi, chai huambrapaj taitataca:

—¿Ñachu unaita cashna causajun?— nishpa, Jesusca tapurca.

Shina tapujpimi chai taitaca, cashna nijurca:

—Huahuamandapachami cashna causajupan.

22Ayaca, huañuchingapaj munashpami ninacunapi, yacucunapi cutin cutin shitajunlla. Can imashnallapash alichi ushashpaca, ñucanchita llaquishpa ayudahuayari— nijurcami.

23Shina nijpimi Jesusca, cashna nirca:

—Can ali crijpica, ali tucungallami. Maijambash ali crijpaca, imatapash rurai ushanallami— nircami.

24Shina nijpimi chai huambrapaj taitaca, cashna nishpa caparirca:

—Ari, crinipachami. Ashtahuan tucui shunguhuambacha cringapaj ayudahuai— nircami.

25Jesusca, ashtaca gentecuna jundamujta ricushpami, mapata rurachij ayataca ninanda rimashpa cashna nirca:

—Cai huambrata upayachishpa, rinripash ama uyachun charij aya, candaca llujshi ninimi. Cutinga, na tigrashpa yaicunguichu ninimi— nircami.

26Shina nijpimi, chai huambrataca ninanda caparichishpa, ninanda chujchuchishpa ayaca llujshirca. Shina llujshijpimi, chai huambraguca huañushcashna sirijurca. Chashna sirijujta ashtaca gentecuna ricushpaca:

—Huañushcamari— ninajurcami.

27Chashna ninajujpipash chai huambragutaca, maquimanda aisashpami Jesusca jatarichirca. Shina jatarichijpica, aliguta shayarircallami.

28Chai jipami Jesusca, shuj huasiman yaicurca. Chaipimi:

—¿Imashpata ñucanchica, chai ayataca na llujchi usharcanchi?— nishpa, paipaj yachajujcunaca tapunajurca.

29Shina tapunajujpimi Jesusca, cashna tigrachirca:

—Na micushpa ninanda Diosta mañashpallami, chashna ayataca llujchi ushana— nircami.

Jesusca, cutinmi pai huañunata villajushca(Mat. 17:22-23; Luc. 9:43-45)

30Chaimanda llujshishpaca, Galilea llactatami yalinajurca. Chaita yalijujtaca, pipash ama yachachunmi Jesusca munarca.

31Jesusca, paipaj yachajujcunaman yachachishpandi rijushpami, cashna nirca:

—Runa Aichayu tucushca ñucataca, runacunapaj maquipi japichihuangami. Paicunami ñucataca huañuchihuanga. Huañuchijpipash, quimsa punllahuanga causarishallami— nircami.

32Ashtahuangarin imamanda chashna yachachijujtapash, paipaj yachajujcunaca na ali yachai usharcachu. Na yachai ushashpa manllashpami, na tapui ushanajurca.

¿Maijanshi ashtahuan yali ali canchi? ninajushcami(Mat. 18:1-5; Luc. 9:46-48)

33Jesusca, Capernaum shuti puebloman chayashpami, huasiman chayarca. Chai huasipi cashpami:

—Cangunaca, ¿imatata ñandaca parlashpandi catimurcanguichi?— nishpami Jesusca, paipaj yachajujcunata tapurca.

34Ashtahuangarin paicunaca: “¿Maijanshi ashtahuan yali ali canchi?” nishpandi, ñanda shamunajushca cashpami, upalla uyanajurca.

35Shinamandami Jesusca tiarishpa, paipaj chunga ishcai yachajujcunata cayashpa cashna nirca:

—Maijambash punda cangapaj munashpaca, tucuicunapaj jipa tucushpa tucuillapaj servij cachun— nircami.

36Shina nijushpami, shuj huahuata paicunapaj chaupiman churamurca. Chai huahuata marcashpami, Jesusca paicunata cashna nirca:

37—Maijambash ñuca shutipi, shuj huahuaguta cai huahuatashna chasquishpaca, ñucatami chasquin. Shina chasquishpaca, na ñucatalla chasquinllu. Ashtahuangarin ñucata cachamuj Taitatapashmi chasquin— nircami.

Ñucanchita na fiñajca, ñucanchi purami nishcami(Luc. 9:38-40)

38Shina nijujpimi Juanga, cashna nishpa tigrachirca:

—Yachachij. Cambaj shutipi rimashpami, shuj runaca ayacunata gentecunamanda llujchijurca. Paica, ñucanchihuanga na cumba tucushpa, canda catijunllu. Shinata ricushpami, ama chashna ruraichu nishpa jarcarcanchi— nircami.

39Shina nijpimi Jesusca, cashna nirca:

—Na jarcashpa saquinallami canguichi. Maijan runapash, ñuca shutipi rimashpa, pipash na rurai ushanallata rurashca jipaca, ñucata nalicachishpaca napacha rimai ushangachu.

40Maijambash ñucanchita na fiñashpa purijushpaca, ñucanchi purallatami.

41Canguna Cristopaj cajpimi, maijan cashpapash shuj pilchi yacugutallapash ñuca shutipi caranga. Na llullashpami, cangunataca cashna nini: Cangunaman chashna carajcunaca, Dios carajpi paicuna japinataca napacha chingachingachu.

Juchapi urmachinaca, jatun llaquimi(Mat. 18:6-9; Luc. 17:1-2)

42Maijambash cai uchillagucunashna ñucata crishpa catinajujta nitijachinshna pandachij runataca, molino jatun rumita cungapi huatashpa, mama cuchapi shitashpachari ashtahuan ali canman.

43Cambaj maqui imatapash nalita rurachingapaj munajpica, muchunguilla. Chashna shujlla maquihuan causaita causangapaj rinami, cambaca ashtahuan ali. Ashtahuangarin pipash na huañuchi ushanalla ucu pacha ninapi ishcandi maquihuan rupangapaj rinaca, napacha alichu.

44Ucu pachapica, jurucunapash na huañunllu, ninapash rupaita rupajunllami.

45Shinallata cambaj chaqui, nalita rurachun pushajujpica, chaquitapash muchunguilla. Chashna shujlla chaquihuan causaita causangapaj rinami, cambaca ashtahuan ali. Ashtahuangarin pipash na huañuchi ushanalla ucu pacha ninapi ishcandi chaquihuan rupangapaj shitai tucunaca, napacha alichu.

46Ucu pachapica, jurucunapash na huañunllu, ninapash rupaita rupajunllami.

47Shinallata cambaj ñavi, imatapash nalita rurachingapaj munajpica, surcushpa shitangui. Taita Dios mandajuj llactaguman, shujlla ñavihuan yaicunami, cambaca ashtahuan ali. Ashtahuangarin ishcandi ñavihuan, ucu pachaman shitai tucunaca, napacha alichu.

48Ucu pachapica, jurucunapash na huañunllu, ninapash rupaita rupajunllami.

49Ninahuanmi, tucuicuna cachihuan javi tucushcashna canga. Diosman animalta carashpa huañuchishpa, cachihuan javishcashnami canga.

50Cachica aligumi. Ashtahuangarin cachi amindayajpica, ¿imahuanshi mishquiyachi ushanguichiman? Cachigushnami, cangunallata aligutapacha causana canguichi. Caishuj chaishuj na fiñanajushpa, aligutapachami causana canguichi— nijurcami.