HEBREOS 13 - Quichua Imbabura Bible

Crijcuna imashna causanatami villajun

1Caishuj chaishuj juyarishpa causanaca, cangunamandaca ama anchurishca cachun.

2Mingachinatapash, na cunganachu canguichi. Huaquingunaca, maijan cajta na rijsishpapash, cushijushpa mingachishpami, angelcunata mingachishca.

3Prezu tiajcunatapash, canguna paicunahuan prezu tiajunshnallatami yarina canguichi. Ninanda llaquichi tucujcunatapash, canguna llaquita apanajunshnallatami yarina canguichi.

4Cazaraipash tucuipi alicachi tucushca cachun. Ama mapayashpallata cazarachun. Nara cazarashpallata huainayashpa causajcunata, cazarashca jahua shujhuan causajcunataca, Taita Diosmi ninanda llaquichinga.

5Shinamandami, imata cashpapash charijyanata munashcamandalla na rurana canguichi. Cunan imaguta charishpapash, chaihuanlla cushijushpa causanguichi. Diosca cashnami nirca: “Candaca na jichushachu, na saquishachu” nircami.

6Shinamandami cushijushpa, cashna ni ushanchi:

“Ñucata ayudajca, Jatun Diosmi.

Shina cashcamandaca, gentecuna imata ruranatapash,

na manllashachu” ni ushanchimi.

7Cangunata michijcuna, Diospaj Shimita cangunaman villanajushcataca yariashpa causaichi. Paicuna crishpa causanajushpa imashna catijta aliguta ricuichi. Shina ricushpaca, paicuna causanajunshnallata causaichi.

8Jesucristoca pundacunapash, cunambash, causaita causaicamambash paillatami.

9Na uyashca shimicunata, shuj shuj yachajunacunata yachachishpa cangunata umachinajuchunga, na saquinachu canguichi. Diospaj ninan juyaihuan cangunapaj shunguta shinlliyachinaca alipachami. Imapash micunamanda yachachishcatalla catishpa shinlliyachinaca, napacha alichu. Chaitalla ricushpa catijcunapaca, chaica imapajpash na alichu.

10Ñucanchica, shuj altartami charinchi. Diospaj jatun carpapi paita servij curacunapash, chai altarmanda japishpa micuitaca na ushanllu.

11Ashtahuangarin animalcunapaj aichataca, gentecuna causanajuj carpacunamanda llujchishpami carupi rupachinajun. Chai animalcunapaj yahuartaca, curacunata mandaj curami, Diospajlla shicanyachishca ucuman apashpa, gentecunapaj juchamandaca Diosman cujun.

12Shinallatami Jesuspash, gentecunata Diospajlla cachun rurangapaca, pueblo ucumanda canllaman llujchi tucushpa, paipaj yahuarhuan maillangapaj, ninanda llaquichi tucushpa huañurca.

13Ñucanchipash, gentecuna causanajushcamanda llujshishpa, Jesús nalicachi tucushpa rimai tucushcashnallata, llaquichi tucushunchilla.

14Cai pachapica, na causaita causana llactata charishcamandami, shuj juyailla llactapi causanata shuyanajunchi.

15Shina cashpaca, Diosman animalta cushpa huañuchinshna, Jesusmandaca Taita Diosta punllandi alicachishunchi. Shina nishpaca, grano fucujunshna paipaj shutita ñucanchi shimihuan villanatami ninchi.

16Shinallata caishujman, chaishujman imagutapash carashpa aliguta ruranataca, na cunganachu canguichi. Shina rurashcatami, Taita Diosman carashpa rupachijpishna paica cushijun.

17Cangunata michijcunataca, cazushpa causaichi. Paicuna mandajpi causaichi. Paicunami, imata rurashcatapash Diosman villanata charishpa, cangunapaj almacunamandaca na puñunshna causanajun. Cushijuihuan na llaquirishpa, imatapash rurachunmi cazuna canguichi. Paicuna canguna llaquichijpi llaquirishpa chashna ruranajushpaca, cangunapaca napacha alichu.

18Ñucanchimandapash Diosta mañapanguichi. Ñucanchipash ali yuyaihuan, tucuita aliguta rurangapaj munashpami, chaita ruranata yariajlla causanajunchi.

19Ashtahuambachaca caimanda cangunapajman ñuca ucha tigrangapajmi, chashna ninanda mañapanguichi nipani.

Aliguta causapanguichi, Dios bendiciapachun nishpami tucuchishca

20Casilla ali causaiguta caraj Taita Diosmi, ñucanchi Apunchi Jesucristotaca, huañushcacunapaj chaupimanda causachirca. Jesucristoca, llamacunatashna ñucanchita jatun Michijmi. Diosca, Jesucristo yahuarta jichashpa huañujpimi, causaita causaicaman pai pactachirca.

21Diosllata, pai munashcashna canguna imagutapash tucuita aliguta rurai ushachun yachachijuchun, shinallata Jesucristomanda, pai munashcashna ñucanchi imatapash rurachun, yachachijuchun ninimi. Jesucristotaca, causaita causaicaman ninanda alicachishunchi. Shina cachun.

22Huauquicuna, panicuna, cangunata aliguta yarichishpa, cai asha shimicunatalla ucha escribimushcataca, ali shunguhuambacha uyapanguichi nipanimi.

23Ñucanchi huauqui Timoteotaca, ñami prezumanda cacharishca. Chaitaca yachachunmi munani. Pai uchalla shamujpica, cangunata ricungapaj shamushami.

24Cangunata michijcunatapash, Diospajlla causajcunatapash, tucuicunata alillachu capanguichi nijunmi nishpa villapaichi. Italia llactapi causanajuj crijcunapashmi, cangunataca alillachu capanguichi ninajun.

25Taita Diospaj ninan juyaica, tucui cangunahuan cachunmi munani. Shina cachun.