1Shinamandami ñuca shunguca, pai tiajushca pushtumandaca, ña llujshinashna jahuata fahuajun.
2Pai rimajpi culun nijtaca, ali uyaichiyari. Paipaj shimimanda culun nishpa llujshijtapash uyaichiyari.
3Chai culun nishcataca, jahua pacha tucui ucucunamanmi cachamun. Pai punchayachishcataca, cai pacha tucuri manñacunacamanmi cachamun.
4Chaita cachamushca jipaca, ninanda culun nijunllami. Pai shinllita rimashcami, culun nishpa uyarin. Pai rimashcata ña uyajpipash, na upallayanllu.
5Taita Diosca pai rimashpami, manllanayaita culun nichin. Paica, ñucanchi na yachai ushanalla jatun juyaillacunatami ruran.
6Paica rasutapash, paramutapash, manllanayai tamiatapash: ‘Alpaman uriajui’ nishpami uriajuchin.
7Chashnami, tucui runacunata imatalla ruranata saquichin. Pai imatalla rurashcacunata, tucuicuna yachachunmi chashna ruran.
8Animalcunapash, paicuna pacajuna utujucunaman yaicushpami, paicuna causaj pushtupi tianajun.
9Urai ladomandaca, jatun acapanami shamun. Jahua ladomandaca, chiri huairami shamun.
10Taita Dios fucujpimi, rasu tucun. Shinamandami jatun yacucunapash, rumishna shinlliyan.
11Yana fuyuta yacuyachishpami, alpapi yacuta jichan. Paipaj michahuanmi, fuyutapash caita chaita cachan.
12Shinallata pai mandajpimi, fuyuca muyundi muyujun. Cai pacha jahuacunapi, cai alpapi pai mandashcata rurangapajmi, chashna muyunajun.
13Diosca, huaquimbica llaquichingapaj, huaquimbica pai rurashca alpata juyashpa, huaquimbica llaquishcata ricuchingapajmi, chashna cachamunga.
14Job, caita ali uyai. Cashna juyaillacunata Taita Dios rurashcataca, ali yaringui.
15Taita Diosca, imata cashpapash cati cati aliguta churaj cajtapash, ¿jahua fuyupi micha imashna punchayachijtapash yachanguichu?
16¿Canga, shican shican fuyu tiajtapash, ali yachaita alipacha charij Dios, juyaillacunata imashna Rurajtapash yachanguichu?
17Cai pachata, urai lado huairahuan chiriyachijpipash, ¿imashpata cambaj churajunacunaca cunujlla?
18¿Cambash, Dioshuanllu jahua pachataca, jirruta yacuyachishpa rurashca espejota mandanshna shinllita rurarcangui?
19Paita imata ninatapash, ñucanchiman yachachiyari. Ñucanchica, yana yana tutapi causashcamandami, ima ali yuyaita japitapash na ushanchi.
20¿Ñuca rimajushpaca, paimambash villashpachu ali canman? Runaca, imata ali yarijushpapash, manllanayai ucu ucupishnallatami causajunga.
21Ashtahuangarin cunanga, jahua pachapi punchalla michataca, na ricui ushanallachu. Huaira shamushpa fuyucunata fichajpimi,
22jahua ladomanda quillulla micha shamujta ricunalla canga. Taita Diospaj punchapambaguca, manllanayaipachami.
23Paimi, Tucuita Rurai Ushaj Dios. Chai ninan jatun ushaitaca, na yachai ushashpami causanchi. Imatalla rurashcata ricujushpaca, imatapash cashcatapacha ruraj cashpami, na yangamanda llaquichinga.
24Chaimandami runacunaca, paita manllanajunga. Paicunapaj shungupilla ali yachaj tucushcacunataca, na alicachinllu” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
