2 CRÓNICAS 15 - Quichua Imbabura Bible

Diosta yarinajuchunmi, Asa shuti runaca mushujyachishca(1 Rey. 15:13-15)

1Obed shuti runapaj churi Azarías shuti runapajman, Taita Diospaj Espíritu shamujpimi,

2Asa shuti runahuan tuparingapaj llujshishpa, cashna nijurca: “Can Asa shuti runapash, Judá llacta, Benjamín llacta tucui soldadocunapash, uyaichi. Cangunapash Mandaj Dioshuan cajpica, paipash cangunahuanmi canga. Canguna paita mascashpaca, cangunaca paita taringuichimi. Ashtahuangarin canguna paita saquijpica, paipashmi cangunata saquinga.

3Israelcunaca, tauca punllacunatami na llullaj Taita Diospash illaj, yachachij curapash illaj, Dios mandashcapash illaj causanajurca.

4Ashtahuangarin paicuna jatun llaquipi cashpami, israelcunata Mandaj Taita Diospajman tigrarishpa, paita mascanajurca. Shina mascashpami, paicunaca, paita tarinajurca.

5Chai huatacunapica llujshishpa rijcunapajpash, cutin tigramujcunapajpash, casilla ali causaica na tiarcachu. Ashtahuangarin tucui llactacunapi causajcunapajmi, ninan llaqui tiarca.

6Shuj gentecunaca, caishuj gentecunatami huañuchishpa tucuchinajurca. Shuj pueblopi causajcunaca caishuj pueblopi causajcunatami huañuchijurca. Tucui llaquicunata Taita Diosllata cachamushpa muspachijpimi, chashna ruranajurca.

7Ashtahuangarin cangunaca, shinlli tucuichi. Cangunapaj maquipash ushai illanshnaca, na quedanachu canguichi. Canguna imaguta rurashcamandaca, japina tianmi” nijurcami.

8Asa shuti runaca, Dios ima nishcata villaj Azarías runa villashca shimicunata uyashpami, cushijuita japirca. Azarías runaca, Obed shuti runapaj churimi carca. Chai jipami, millanayai yanga dioscunataca, tucui Judá llactamanda, Benjamín llactamandapash anchuchirca. Shinallata Efraín urcucunapi tiaj, pai quichushca pueblocunamandapashmi anchuchirca. Shina rurashpami, Mandaj Diospaj altartapash cutin alichirca. Chai altarca, huasi corredor ñaupajpimi carca.

9Chai jipaca, tucui Judá llactapi, Benjamín llactapi causajcunatapash, Efraín llactamanda, Manasés llactamanda, Simeón llactamanda shamushpa, chai Judá llactapi purinajuj gentecunatapashmi tandachirca. Israelcunaca, ashtacacunami paihuan tandanajushca carca. Paicunata Mandaj Taita Diosca, Asa shuti runahuan cajta ricushpami, paicunaca chashna tandanajushca carca.

10Asa shuti runaca, Judá llactataca, ñami chunga picha huatata mandajurca. Chai huatapaj quimsa quillapimi, Jerusalenbi tandanajunajurca.

11Chai punllallatami macanajuipi quichushpa apamushca canchis patsaj huagracunata, canchis huaranga llamacunata, Mandaj Diosman cushpa huañuchinajurca.

12Shina huañuchishpami, aligutapacha yarishpa, paicunapaj ñaupa taitacunata Mandaj Taita Diosta tucui shunguhuan, tucui almahuan mascangapaj ari ninajurca.

13Israelcunata Mandaj Taita Diosta na catingapaj munajcunaca, rucu cashpa, huahua cashpa, jari cashpa, huarmi cashpapash huañuchi tucunapachami carca.

14Trompetata, bocinata huacachinajujpimi, cushijushpa ninanda caparishpa, Mandaj Diosman juramentunajurca.

15Chashna juramentushpami, Judá llactapi tucui causajcunaca cushijunajurca. Paicunaca, tucui shunguhuanmi juramentunajurca. Paicunapaj tucui munaihuan mascashcamandami, Diostaca tarirca. Chaimandami Mandaj Diosca, paicuna maipi cajpipash casilla ali causaita cararca.

16Jatun mandaj Asa shuti runaca, Maaca shuti paipaj mamatapashmi, jatun mandajshna tiajushcamandaca paillata anchuchirca. Asera shuti huarmi diosman rijchajta rurashcamandami, chashna anchuchirca. Asa shuti runaca, chai diostapash faquishpa ñutushpami, Cedrón shuti ninanda rijuj huaicu yacu manñapi rupachirca.

17Tucuita chashna rurashpapash Israel llactamandaca, lomacunapi tiaj altarcunataca na anchuchircachu. Shina cashpapash Asa shuti runaca, paipaj tucui causaipimi, Diosta tucui shunguhuan cazushpa causajurca.

18Paica culquita, orota, imalla tiashcacunata paipash, paipaj taitapash, Diospajlla cachun shicanyachishcataca, Taita Diospaj huasimanmi apamurca.

19Quimsa chunga picha huatata, Asa shuti runa mandajushcacamanmi, jatun macanajuica na ashtahuan tiarca.