2 REYES 6 - Quichua Imbabura Bible

Eliseoca, jachataca yacu jahuamanmi huambuchishca

1Dios ima nishcata villangapaj yachajujcunami, Eliseotaca cashna ninajurca:

—Ricui, canhuan causanajunchi cai huasica uchillagumari.

2Chaimanda cunanga, Jordán yacu ladoman jacuchi. Chaipi vigas caspicunata shuj shuj fitishpa, chaipi causangapaj huasita rurashunchi— nijpimi, Eliseoca:

—Shina cashpaca richilla— nirca.

3Shina nijpimi pai puramanda shuj runaca, cashna nirca:

—Canda servij ñucanchihuan ripashun nipanchimi— nijpimi, Eliseoca:

—Ñucapash rishallami— nirca.

4Eliseopash paicunahuan rishpami, Jordán yacuman ña chayashpaca, quirucunata cuchurca.

5Quiruta shuj runa ña urmachigrijujpimi, cashna tucurca: Chai runapaj jachami, yacuman huashajurca. Shina huashajujpimi:

—¡Aij, ñucata mandajlla, chai jachaca mañashcallamari carca!— nishpa caparirca.

6Shina caparijpimi, Taita Diospaj runaguca:

—¿Maipita urmarca?— nishpa tapujpi chai runaguca, maipi jacha urmashcata ricuchirca.

Shina ricuchijpimi Eliseoca, shuj caspita fitishpa jacha urmashca ladoman shitajpi, chai jacha jirruca, yacu jahuaman huambumurca.

7Chashna huambumujpimi:

—Jachata japi— nishpa mandajpi, chai runaguca jachata japirca.

Eliseomandapash, siriocunamandapashmi villajun

8Siria llactata jatun mandajca, israelcunahuan macanajuita charishpami, paita servij soldadocunahuan parlarishpa: “Ñuca carpacunaca, cai pushtupi, chai pushtupimi shayaringa” nijurca.

9Shinamandami Taita Diospaj runaguca, Israel llactata jatun mandajman cashna nichun cacharca: “Ricungui. Chai pushtutaca, ama yalinguichu. Siriocunami chaiman rigrinajun” nichunmi cacharca.

10Shina nijpimi Israel llactata jatun mandajca, Taita Diospaj runagu villashca pushtuta chapachun cacharca. Paicunata ama llaquichij shamuchunga chashnami cutimbash, cutimbash cachajurcalla.

11Chaimandami Siria llactata jatun mandajca, paipaj shungupi musparijushpallata, paita servijcunata cayashpa cashna nirca:

—Ñucanchi puramandaca, ¿pita Israel llactata jatun mandajpaj lado tucushpa purin? Chaitaca, ¿nachu villanguichiman?— nircami.

12Shina nijpimi servij puramanda shuj runaca, cashna nirca:

—Jatun mandaj ñuca amolla, na chashnachu. Ashtahuangarin Dios ima nishcata villaj, Israel llactapi causajuj Eliseomari, Israel llactata jatun mandajman villajun. Can puñuna pacalla ucupi imata parlajushcatapash tucuitami villajun— nircami.

13Shina nijpimi jatun mandajca, cashna nirca:

—Chai runata prezu japichun cachangapaj, chai runa maipi causajtapash ricungapaj richi— nircami.

Shina nijpimi paicunaca:

—Ricui, paica Dotán shuti pueblopimi causan— nishpa villanajurca.

14Shina villajpimi, chai jatun mandajca caballocunapi, carretacunapi purij soldadocunata, shinallata chaquilla purij ashtaca soldadocunata, chai puebloman cacharca. Paicunaca tuta shamushpami, chai pueblotaca chaupipi churanajurca.

15Chai tucui soldadocunapash, caballocunapi, carretacunapi tiarishca gentecunapash chai pueblota chaupipi churashpa muyundi shayanajujtaca, Taita Diospaj runaguta servij runa tutamandata jatarishpa llujshishpami ricurca. Chaita ricushpami, chai servij runaca:

—¡Aij, ñucata mandajlla! Cunanga, ¿imatashi rurashun?— nirca.

16Shina nijpimi Eliseoca, cashna nirca:

—Ama manllaichu. Ñucanchimi, paicunatapash ashtahuan yali ashtacacuna canchi— nircami.

17Shina nishpami, Eliseoca: “Mandaj Dioslla, pai ricuchun paipaj ñavita pascapai” nishpa mañarca.

Chashna mañajpimi Mandaj Diosca, chai servij runapaj ñavita pascarca. Chashna pascajpimi Eliseopaj muyundipica, caballocunapi tiarishca gentecuna, nina rupajuj carretacuna, chai loma junda shayanajujta ricurca.

18Siria llactamanda soldadocuna ña uriajumui callarijpimi Eliseoca, Mandaj Diostaca: “Cai gentecunata ñausata rurapai” nishpa mañarca. Shina mañajpimi, Eliseo mañashcashnallata paicunataca ñausata rurarca.

19Chai jipami Eliseoca, chai gentecunataca cashna nirca:

—Na cai ñanllu, canguna mascajushca pueblopash na caichu. Ñucata catihuaichi, ñucami canguna mascajushca runapajman saquigrisha— nircami.

Shina nijpimi, Samaria puebloman catishpa rinajurca.

20Ña chai puebloman chayashpami Eliseoca, cashna nirca: “Mandaj Dioslla, cai gentecuna ricuchun paicunapaj ñavita pascapai” nircami. Shina nijpimi Mandaj Diosca, paicunapaj ñavita pascarca. Shina pascajpi paicuna ricushpaca, Samaria pueblo chaupipi shayanajushcatami ricurca.

21Israel llactata jatun mandajca, paicunata ricushpami Eliseotaca:

—Ñuca taitalla, ¿paicunataca huañuchishallachu?— nirca.

22Shina nijpimi paica, cashna nishpa tigrachirca:

—Na huañuchinachu cangui. ¿Cambaj espadahuan, cambaj arcohuan macanajushpa prezu japimushcacunataca huañuchinguimanllu? Ashtahuangarin paicunaca micushpa, ufiashpa, paicunata mandajcunapajman tigrachun micunata, yacuta carai— nircami.

23Shina nijpimi, jatun micuita rurarca. Chaita ña micushca, ufiashca jipa, chai soldadocunata cachajpimi, paicunaca paicunata mandajcunapajman tigrarca. Siria llactamanda tandanajushca shuhua runacunaca, chai punllamandapachami Israel llactaman cutinga na shamurca.

Eliseomandapash, Samaria pueblota chaupipi churashcamandapashmi villajun

24Chai jipami, cashna tucurca: Siria llactata jatun mandaj Ben-adad shuti runaca, tucuilla paipaj soldadocunata tandachishpa vichai shamushpami, Samaria pueblota chaupipi churarca.

25Chashna chaupipi churashcamandami, Samaria pueblopica ninan yarjai tiarca. Chaimandami shuj burro umataca, pusaj chunga culquipaj jatunajurca. Paloma huanutaca, chaupi libratallami, picha culquipaj jatunajurca.

26Chai punllacunallatami, Israel llactata jatun mandajca, jatun pirca jahuata yalijurca. Chaita yalijujpimi, shuj huarmica:

—Ñuca amo, jatun mandajlla, quishpichihuayari— nishpa caparirca.

27Shina caparijpimi jatun mandajca, cashna nirca:

—Mandaj Diospash na quishpichijpica, ¿ñucacarin imashnata quishpichishayari? ¿Granota alichinamanda surcushpa, na cashpaca uvasta cutana pushtumanda surcushpachu cusha?— nircami.

28Jatun mandajca: “¿Imashcatayari?” nircami. Shina nijpimi chai huarmica, cashna nishpa tigrachirca:

—Cai huarmimari, ñucataca cashna nihuarca: ‘Cambaj churita cunan huañuchishpa micungapaj apamui. Ñuca churitaca, cayapaj micushunllami’ nihuarcami.

29Shina nijpimi, ñuca churitaca yanushpa micurcanchi. Ña cutin cayandi punllapaca ñucami: ‘Cambaj churita apamui, micushun’ nircani. Ashtahuangarin paica, paipaj churitaca pacashcami charijun— nircami.

30Chai huarmi chashna nijta jatun mandaj uyashpami, pai churajushcata liquishpa, chai liqui churajunahuanllata pirca jahuata yalijurca. Chaita yalijujpimi gentecunaca, cañamuta ucuman churajushcata ricunajurca.

31Chai jipami, jatun mandajca cashna nirca: “Safat shuti runapaj churi Eliseopaj umaca, cunambash paipaj cuerpopillata quedajpica, Taita Diosllata ninandapacha llaquichihuachun” nircami.

32Eliseoca, paipaj huasipimi tiajurca. Mandaj rucucunapash, paihuanmi tianajurca. Jatun mandajca, chaimanmi shuj runata cacharca. Ashtahuangarin villangapaj shamuj chai runa nara chayajpillatami Eliseoca, mandaj rucucunataca cashna nirca:

—Ñuca umata fitichun, chai huañuchij runapaj churi cachamujujtaca, ¿nachu ricushcanguichi? Ricuichi, villangapaj shamuj runa chayamujpica, punguta vichashpa na yaicuchun saquinachu canguichi. ¿Nachu paita mandajash, paipaj huashata catishpa shamujuj uyarin?— nircami.

33Eliseo paicunahuan chashna parlajujpillatami, Eliseopajman urai shamuj chai villaj runaca ñapash chayamurca. Pai chayamushpaca, cashnami nirca:

—Na llullashpami nini. Cai llaquicunaca, Mandaj Diosmandami shamun. Shina cashpaca, ¿imapajta ashtahuanga Mandaj Diosta shuyashayari?— nircami.