ECLESIASTÉS 8 - Quichua Imbabura Bible

1Alipacha yachajushca runashnaca, ¿pita tiangayari? Ima tucunatapash paishna villaj runaca, ¿pita tiangayari? Runapaj ali yachaica, paipaj ñavita punchayachinmi, fiña ñavitapash aliman tigrachinllami.

2Candaca, jatun mandaj mandashcata cazuchun, Taita Diospaj ñaupajpi juramentushcata pactachijuchunmi, aliguta yarichini:

3Jatun mandajpaj ñaupajmandaca, ama ucha llujshishpa ringapaj munanguichu. Ima nalitapash, ama chaitallata rurashpa catinguichu. Paica, tucui ima munashcata rurangallami.

4Jatun mandaj mandashca shimica, ushaita charinmi. “¿Imatata rurajungui?” nitaca, ¿pita ushangayari?

5Mandashcata pactachij runaca, ima llaquitapash na japingachu. Alipacha yachajushcapaj shungupica, ima punllacuna cajtapash, imatalla rurashcata Dios ricuchinatapash yachanmi.

6Tucui ima munashcata rurangapajpash, shuj punllami chayan. Tucui chaicunata ricuchina punllapash chayamungami. Runa nalita rurashcapash, paipajllata jatun llaquimi.

7Paicunaca, ima tucunatapash na yachanllu. Ima horas ima tucunatapash, ¿pita villangayari?

8Espíritu ama llujshichun jarcashpa, paipaj espirituta mandaj runaca na tianllu. Huañuna punlla chayamujpipash, na jarcai ushanllu. Chai punlla chayamujpica, ima macanajunahuambash na mishai ushanllu. Diosta na manllajtaca, chai na manllashcapash na quishpichingachu.

9Tucui caicunatami, indi punchayachijuj cai pachapi tucui imatalla ruranajushcataca, tucui shunguhuambacha ricujurcani. Runaca, paipaj llaquipajllata caishuj runata llaquichishpa charina punllami chayan.

Ali runapash, nali runapash chashnallatami tucun

10Shinallata nalita rurajcuna huañujpi alicachishpa pambanajujtami ricurcani. Ashtahuangarin Diospaj huasiman na cungashpa shamuj runagutaca, alita rurashpa pai causajushca pueblopica cunganllami. Chaipash yangallami.

11Nalita rurajpi na ucha llaquipi churajpica, huañuna aichayu runacunaca ashtahuanmi nalita ruranata shungupi yarianajun.

12Juchata ruraj runaca, patsajcaman nalita rurajushpapash, unaita causajunllami. Shina cajpipash Taita Diosta manllashpa causajcunapaca, tucui ali llujshinatami ñucaca yachani. Paipaj ñaupajpi manllajcunapajmi, chashna ali llujshinga.

13Ashtahuangarin Diosta na manllaj runapaca, imapash nali llujshinata, paipaj causai punllacunapash na unaicaman cashpa, llandushna ñapash chinganatami yachani. Taita Diospaj ñaupajpi na manllashcamandami, chashna tucunga.

14Cai pachapica, imapash yangacunata rurarinllami. Imatapash cashcatapacha rurajcunapash, Diosta na manllajcunashnami llaquita apanajun. Diosta na manllajcunarami, imatapash cashcatapacha rurajcunashna aliguta causanajun. Chaipash yangallami.

15Chaimandami ñucaca, cushijunata alicachijurcani. Indi punchayachijuj cai pachapica, runaca imatapash ashtahuan alitaca na charinllu. Ashtahuangarin micushpa, ufiashpa cushijunatallami charin. Indi punchayachijuj cai pachapi Taita Dios causaita carashcacamanga, pai imatalla rurashcamandaca, chaitami japi ushan.

16Ñucaca, ali yachaita yachangapajpash, cai pachapi causajcuna imatalla ruranajujta ricungapajpash, tucui shunguhuanmi yachajurcani. (Huaquingunaca tutapash, punllapash na samajcunami tian).

17Tucui imatalla Taita Dios rurashcatapashmi ricujurcani. Indi punllayachijuj cai pachapi imatalla rurashcataca, runaca na entendi ushanllu. Runaca, caita alipacha entendingapaj munashpa imata rurajushpapash, napacha entendi ushangachu. Alipacha yachajushca runa yachanimi nijushpapash, chashna yachajushca cashpalla na entendi ushangachu.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help