LEVÍTICO 25 - Quichua Imbabura Bible

Alpacunata samachina huatamanda, mañashcata na tigrachi ushajpi cacharina huatamandapashmi villajun

1Mandaj Diosca, Sinaí urcupimi Moisestaca cashna nijurca:

2“Israelcunaman, cashna nishpa villai: ‘Cangunaman ñuca carashca llactaman ña yaicushpaca, alpacunapi na tarpushpa, Mandaj Dios ñucata alicachingapaj samachinguichi.

3Sucta huatacaman cambaj alpapi tarpungui. Yapalla viñashca uvas malquicunatapash sucta huatacaman fitishpa, uvas fucushcatapash pallangui.

4Ashtahuangarin canchis huatapica, cambaj alpataca, Mandaj Dios ñucapaj samana punlla cachun samachingui. Cambaj alpapica, na tarpunachu cangui. Uvas malquicunatapash, na fitinachu cangui.

5Cozechashca alpapi paimanda viñashpa fucushcatapash, ama cozechanguichu. Cambaj uvas chagrapi uvastapash, ama pallajunguichu. Chai huataca, alpacunata samachina huatami canga.

6Ashtahuangarin alpacunata samachijui huatapi fucushcacunami, cambash, canda servij jaripash, canda servij huarmipash, culquipaj servijpash, shuj llactamanda shamushpa cambaj llactapi causajuj runapash micungapaj canga.

7Cambaj animalpash, cambaj llactapi tiaj animalpash micuchunmi, chai huatapi fucushca tucui granocunaca canga.

8Shuj huatapica, canchis semanata cuentanguichi. Canchis huatataca, canchis viajecaman cuentanguichi. Shina cuentajpica, chai canachis semana punllacunaca, chuscu chunga iscun huatami tucunga.

9Shina cuentashpami, canchis quillapaj chunga punllapica, trompetata shinllita huacachishpa uyachijuchun mandana cangui. Juchamanda Diosman cuna punllapimi, cangunapaj tucui llactapi chashna huacachijuchun mandana cangui.

10Ña picha chunga huata tucujpimi, chai huatataca Diospajlla cachun shicanyachina canguichi. Shinallata Israel llactapi causajcunapaca, tucui imamandapash cacharirina huatami nishpami, chai llactapi villana canguichi. Chai huatapica, cutin tigrachina huatami. Shinamandami, tucuicuna cangunapaj alpacunaman tigranguichi. Shinallata tucuicunami, paicunapaj familiacunapajman tigranajunga.

11Picha chunga huatapica, cutin tigrachina huatami canga. Chai huataca, na tarpunachu canguichi. Paimanda fucushca granocunatapash, na cozechanachu canguichi. Cangunapaj uvas chagrapi, uvastapash na pallajunachu canguichi.

12Chai huataca, cutin tigrachina huata cashcamandaca, cangunapaca Diospajlla shicanyachishca huatami canga. Alpapi paimanda fucushcacunatami micunguichi.

13Cutin tigrachina chai huatapimi, tucuicuna cangunapaj alpacunaman tigranguichi.

14Cangunapaj cumba runaguman alpata jatushpa, na cashpaca paipaj alpata randishpapash, pipash paipaj huauquitallataca, na umachinachu canguichi.

15Cutin tigrachina huata yalishca jipamanda mashna huata tiajpipash, chaita ricushpa randingui. Shinallata jatuj runapash, mashna huatata tarpushpa fucuna cajpipash, cuentashpa ricushpami canman jatunga.

16Tauca huatata tarpuna cajpica, ashtaca culquita mañangui. Ashalla huatata tarpuna cajpica, ashalla culquita mañangui. Mashna huatata cozechana cajpipash ricushpami, jatuj runapash canman jatunga.

17Cangunapaj cumba runagutaca, pipash na umachinachu canguichi. Ashtahuangarin cangunapaj Taita Dios ñucatami, manllana canguichi. Ñucami, cangunata Mandaj Taita Dios cani.

18Pactachinajuchun ñuca cushca shimicunata pactachishpa, ñuca mandashcacunatapash yariashpa ruranguichi. Shina rurashpami, llactapica imatapash na manllashpa, aliguta causanguichi.

19Llactapica, aligutami granocunaca fucunga. Chai fucushcatami na munangacaman micushpa, chai llactapica imatapash na manllashpa, aliguta causanguichi.

20Cangunaca cashnami ninguichi: Ricuichi, imatapash na tarpuna, ima granotapash na cozechana cashpaca, samana canchis huatapica, ¿imatashi micushunchi? ninguichimi.

21Shinamandami ñucaca, sucta huatapica ninanda bendiciamusha. Chai bendiciashcami, granocunataca quimsa huatacaman fucuchinga.

22Ña pusaj huatapi tarpushpami, chai huatapi fucushca granotaca, cati iscun huatacaman alichishpa micunguichi. Iscun huatapi tarpushca granocuna fucungacamanmi, chai granocunata alichishpa micunguichi.

23Alpaca ñucapaj cashcamanda, na tucui causaipaj jatunachu. Cangunaca ñucapaca, shuj llactamanda purij runashna, caru llactamanda shamushca runashnami canguichi.

24Shinamandami, alpata maijanda randishca cashpapash, chai jatuj runallata tigrashpa randichun saquina canguichi.

25Cambaj huauqui purallatami, imagupash illaj tucushpa, paipaj alpata ashaguta jatunga. Shina jatujpica, chai jatuj runapaj ashtahuan ladolla familia purami, paipaj huauqui purallata jatushca alpamandaca, alpata randij runaman culquita tigrachishpa japinga.

26Alpata jatushca runaca, paipaj randi culquita tigrachishpa ayudaj familiata na charingachu. Shina cashcamanda chai alpamanda tigrachi pactanata culquita tandachishpaca,

27chai alpata ima hora jatushca huatamandapachami cuentanga. Shinami, cutin tigrachina huatacaman cuentashpa mashnata cuna cajpipash, chaita cunga. Shina cushpaca, paipaj alpamanllatami tigranga.

28Ashtahuangarin alpata jatuj runaca, randij runaman culquita tigrachingapaj na pactanata charishpa, na tigrachi ushajpica, alpaca cutin tigrachina huata chayangacamanmi randij runapajllata quedanga. Cutin tigrachina huata chayajpimi, paipaj alpamanllata tigranga.

29Maijan cashpapash, muyundi pircashca pueblopi tiajuj huasita jatushpaca, jatushca punllamanda shuj huatacamanllami, chai huasimandaca, culquita tigrachishpa cutin japi ushanga. Shuj huatacamanllami, culquita cutin tigrachishpa japi ushanga.

30Ashtahuangarin muyundi pircashca pueblopi charishca huasita jatuj runaca, shuj huata tucungacamambash, randij runaman culquita na tigrachi ushajpica, chai huasica randij runapaj, paipaj miraicunapajmi tucui causaipaj quedanga. Cutin tigrachina huata pactajpipash, na tigrachingachu.

31Ashtahuangarin muyundita na pircashca uchilla llactacunapi tiaj huasicunata jatushca cashpaca, chaicunaca alpacunata jatushcashnallatami canga. Chai huasicunataca cacharichi ushangami, cutin tigrachina huata chayajpipash tigrachi ushangami.

32Ashtahuangarin levitacunapaj pueblocunapica, paicuna jatushca huasicunataca, paicunapaj huasicuna cashcamandaca, ima horapash cacharichi ushangallami.

33Maijan cashpapash, levitacunapaj huasita randishca cashpaca, cutin tigrachina huata chayajpica, chai huasimandapash, na cashpaca paicunapaj cachun cushca pueblomandapash, Israel puracunapica chai pueblocunapi tiaj huasicuna levitacunapaj cachun cushcamandami, chashna llujshinata charin.

34Ashtahuangarin levitacuna causanajuj pueblo muyundipi tiaj michina pambacunataca, na jatui ushangachu. Chaicunaca, paicunapaj tucui causaipi paicunapaj cachun cushcami.

35Cambaj huauqui purallata imagupash illaj tucushpa, cambajman mingaringapaj shamujpica, can ayudangui. Paica, shuj llactamanda purij runashna, shuj llactamanda shamushca runatashnami canhuan causanga.

36Mama culqui mirashcamanda yalishpapash, culquita mañachishcamanda mirachishpapash, na japinachu cangui. Ashtahuangarin cambaj Taita Diostami, manllana cangui. Cambaj huauquipura runaguca, canhuanmi causanga.

37Culquita mañachishpaca, ama mama culqui mirashcamanda yalishpa japinguichu. Ima micunata mañachishpapash, na mirachishpa japinachu cangui.

38Cangunata Mandaj Taita Dios ñucami, Canaán llactata cangunaman carangapaj cangunataca, Egipto llactamanda llujchimurcani. Cangunapaj Taita Dios cangapajmi llujchimurcani.

39Cambaj huauqui purallata canhuan causajushpa, imagupash illaj tucushpa canman jaturijpica, ama gañandashna servichishpa charinguichu.

40Paitaca, culquipaj trabajaj runagutashna, shuj llactamanda shamushca runagutashna canhuan charingui. Paica, cacharina huata chayangamanmi canda servishpa causajunga.

41Chai jipaca, cambaj huasimandaca cacharirishpa llujchingallami. Paipash, paipaj huahuacunapashmi, paipaj familiacunapajman tigranga. Paipaj taitapaj alpatallata cutin japishpami, chaipi causagringa.

42Paicunaca, ñucata servijcunami. Paicunatami, Egipto llactamandaca llujchimurcani. Chaimanda paicunaca, gañanshnaca na jaturingachu.

43Paicunataca, na llaquinayaita llaquichishpa, mandashpa charinachu cangui. Ashtahuangarin cambaj Taita Diostami manllana cangui.

44Cambaj gañangunaca, jari cashpa, huarmi cashpapash, cangunapaj llacta muyundipi causanajuj gentecunami canga. Paicunatami, jari gañangunatapash, huarmi gañangunatapash randi ushanguichi.

45Shinallata shuj llactamanda shamushpa cangunahuan causajcunapaj huahuacunatapashmi, gañan cachunga randi ushanguichi. Cangunapaj llactapi huacharishca paicunapaj familiacunatapash randinguichilla. Paicunatami, cangunapaj cachun chari ushanguichi.

46Paicunataca, cangunapaj huahuacunamambash, paicunapaj cachun carashcatashna saqui ushanguichimi. Paicunataca, tucui causaipimi servichishpa chari ushanguichi. Ashtahuangarin cangunapaj huauqui purallata israelcunataca, pitapash na llaquinayaita llaquichishpa, mandashpa charinachu canguichi.

47Shuj llactamanda purij runa, na cashpaca shuj llactamanda shamushpa, canhuan causajuj runa charij tucujpi, chai runapaj ladollapi causajuj cambaj huauquira imagupash illaj tucungapashchari. Shina tucushpaca, shuj llactamanda purij runaman, na cashpaca shuj llactamanda shamushpa canhuan causajuj runaman, na cashpaca shuj llactamanda shamushca runapaj familiaman cashpapash jaturingapashchari.

48Shina jaturishca cajpipash, culquita cushpaca cacharichi ushanmi. Paipaj huauqui purallata shuj runami, paitaca cacharichi ushanga.

49Paipaj tío cashpa, chai tiopaj churi cashpa, na cashpaca paipaj familia purallata maijan cashpapash cacharichi ushanmi. Na cashpaca paillata culquita tigrachi ushashpaca, paillata cachariri ushanmi.

50Randij runahuanga, cashnami ruranga: Jaturishca punllamandapacha cuentashpa, cacharina huata chayangacaman mashna huata illajtami cuentanga. Mashnapaj jaturishcatapash, jaturishca punllamanda mashna huatata servijushcatami cuentanga. Mashna huatatapash servishcataca, cangunapaj llactapi culquipaj servij runaman, punllandi mashna culquita cuj cashcashnallatami cuentanga.

51Jaturij runapaca, ashtaca huatata servinara cajpica, randij runamanga, chai randishca tucuilla culquitallatami tigrachinga.

52Cacharina huata chayangapaj ashalla tiajpica, chai huatacunamandalla mashnata tigrachina cajpipash, chaita ricushpallami tigrachinga.

53Paitaca, huatandi culquita japingapaj ari nishca servij runatashnallata rurachun. Cambaj ñaupajpica, na manllanayaita llaquichishpa mandangachu.

54Chai huatacunapillata culquita na tigrachi ushashpa na cacharichijpica, cacharina huata chayapimi, paipash, paipaj huahuacunapash llujshinga.

55Israelcunaca, ñucata servijcuna cashcamandami, shina llujshinga. Paicunaca, Egipto llactamanda ñuca llujchimushca, ñucata servijcunami. Ñucami, cangunata Mandaj Taita Dios cani.