1 SAMUEL 26 - Quichua Imbabura Bible

1Zif shuti pueblopi causajcunaca, Gabaa puebloman Saulpajman shamushpami, cashna nishpa villanajurca: “Davidca, ¿nachu jichushca pambamandaca, indi llujshimuj ladoman tiaj Haquila shuti lomapi pacajushca tiajun?” ninajurcami.

2Shina nijpimi, Saulca jatarishpa, Zif shuti jichushca pambaman urai rirca. Paica, Israel puramandaca, quimsa huaranga agllashca runacunata pushashpami, Zif shuti jichushca pambapi Davidta mascangapaj rirca.

3Saulca, jichushca pambamandaca, indi llujshij ladoman tiaj Haquila shuti lomapimi, carpacunata shayachishpa tiajurca. Chai lomaca, ñan ladollami carca. Shinallata Davidpash, chai jichushca pambapillata cashpami, chai jichushca pambaman Saúl catishpa shamushcata yacharca.

4Chaimandami Davidca, pacalla chapajcunata cachashpa, Saúl chaiman shamushcataca alipacha yacharca.

5Shina yachashpami Davidca, Saúl maipi carpacunata shayachishpa tianajuj pushtumambacha shamurca. Chaipimi Saulpash, Saulpaj soldadocunata mandaj, Ner shuti runapaj churi Abner shuti runapash, maijan pushtupi puñunajujta Davidca ali ricurca. Carpacunata shayachishcapimi, Saulca puñujurca. Gentecunapash, paipaj muyundipimi carpacunata shayachishca carca.

6Chaimandami Davidca, heteopura Ahimelec shuti runatapash, Sarvia shuti huarmipaj churi, Joab runapaj huauqui Abisai runatapash cashna nirca: —Carpacuna shayanajuj pambaman ñucahuan, Saulpajman urai ringapaca, ¿pita munanguichi?— nishpa tapujpimi, Abisai runaca: —Ñucami, canhuan urai ringapaj munani— nirca.

7Shinami Davidpash, Abisai runapash, chai tutaca soldadocunapajman rinajurca. Saulca, carpacunata shayachishca pambapimi, puñushpa sirijushca carca. Paipaj lanzatapash, uma sauna ladopimi shayachishca carca. Shinallata Abner runapash, soldadocunapashmi, Saulta chaupipi churashpa muyundi puñushpa sirinajushca carca.

8Shinata ricushpami Abisai runaca, Davidta cashna nirca: —Cunanmi Taita Diosca, canda fiñajtaca cambaj maquipi churashca. Cunanga, ñucallata paita huañuchijuchun saquihuailla. Paitaca, lanzahuan alpaman yalijta shujta cushpalla huañuchishallami. Cutin shujtaca na cushachu— nircami.

9Shina nijpimi Davidca, Abisai runataca cashna nirca: —Na huañuchinachu cangui. ¿Maijanshi, Mandaj Dios agllashpa churashca jatun mandajta paipaj maquihuan huañuchishpaca, ima nalitapash na rurashcashna ricuringa?— nircami.

10Davidca cashnatapashmi nirca: —Mandaj Diosca causajujpipachami, cashna nini: Saulca, Mandaj Dios causaita na quichujpi, na cashpaca paipaj huañui punlla nara chayajpi, na cashpaca jatun macanajuiman urai rishpapash, na huañungachu.

11Shina cajpica, Mandaj Dios agllashpa churashca jatun mandajta ñuca maquihuan huañuchinamandaca, Mandaj Diosllata jarcahuachun. Ashtahuangarin cunanga, paipaj uma sauna ladopi shayajuj lanzata, yacuta japina jarratalla japishpa jaculla— nircami.

12Shina nishpami Davidca lanzatapash, yacuta japina jarratapash, Saulpaj uma sauna ladomanda apashpa rirca. Chaitaca pipash na ricurcachu, pipash na uyarcachu. Cuidaitallapash na cuidanajurcachu. Mandaj Diosllata, paicunapajman ninan puñuita cachamujpimi, tucuicunallata ninandapacha puñunajurca.

13Chai jipami Davidca, shuj ladoman chimbashpa, paicunapaj ladomandaca carumambacha shuj loma pundapi shayarirca.

14Chaipi cashpami, Davidca soldadocunatapash, Ner shuti runapaj churi Abnertapash, cashna nishpa caparirca: —Abner, ñuca caparijujtaca, ¿nachu uyahuangui?— nijpimi, Abner runaca cashna nirca: —Jatun mandajta caparingapaca, ¿canga pita canguiyari?— nircami.

15Shina nijpimi Davidca, Abnertaca cashna nijurca: —¿Nachu canga tucuita yali shinlli runa cangui? Shina cashpaca, ¿imashpata jatun mandaj cambaj amotaca, na cuidarcangui? ¿Israel purapica, canshnaca pita tianyari? Soldado puracunamanda shuj runami, jatun mandaj cambaj amotaca, huañuchingapaj yaicurca.

16Chashna na cuidashpaca, nalitami rurashcangui. Mandaj Diosca causajumbachami. Cangunaca, huañunapachami canguichi. Mandaj Dios churashca cangunata jatun mandajtami, nali cuidashcanguichu. Cunanga ricui. ¿Jatun mandajpaj uma sauna ladopi tiajushca lanzapash, yacuta japina jarrapash maipitayari?— nijurcami.

17Shina nijpimi Saulca, David rimashcata rijsishpa: —¿Nachu ñuca huahua David, chashna rimajungui?— nijpi Davidca, cashna nishpa tigrachirca: —Ñuca amo jatun mandajlla, ari, ñucallatami rimajupani.

18¿Imashpata ñucata mandajca, canda servij ñucataca, chashna catiriajuhuangui? ¿Imatata rurashcani? ¿Ima nalitata, ñuca maquihuanga rurapashcani?

19Jatun mandaj ñuca amolla, canda servij ñuca rimashca shimicunata uyapairi. Ñucata llaquichijuchun, Mandaj Diosllata canda yarichijushpaca, ñuca imata carajpipash paica chasquipachunlla. Ashtahuangarin huañuna aichayu runacunalla, chashna yarichinajushca cashpaca, paicunaca Mandaj Diospaj ñaupajpica, ninandapacha llaquichi tucushca cachun. Paicunami ñucataca, Mandaj Dios carashca llactata ama japichun: ‘Shuj dioscunata servingapaj ri’ nishpa llujchishpa cachahuashca.

20Ñucaca, Mandaj Diospaj ñaupajmanda caru llactapi ñuca yahuar jicharichunga, na munapanichu. Ashtahuangarin israelcunata jatun mandajllatami, piquita mascangapajshna llujshimushcangui. Sacha atalpata, sacha ucupi catinshnallatami purijungui— nijurcami.

21Shina nijpimi Saulca, cashna nirca: —Ñuca huahua Davidlla, ñucaca juchatami rurashcani. Cunanga tigrailla, ashtahuanga na llaquichishachu. Canga, ñuca causaita ninanda juyashpami, cunanga na huañuchihuashcangui. Ricui ñucaca, juizu illaj runashnami, nalita rurashpa ninanda pandarishcani— nircami.

22Shina nijpimi Davidca, cashna nijurca: —Ricui, jatun mandajpaj lanzaca caipimi. Servij puracunamanda shuj runata caiman apachun cachamuilla.

23Mandaj Diosca, imatapash cashcatapacha rurajmambash, ali cazujmambash cuna cashcatapachata cushpami ali canman. Cunanga, Mandaj Diosllatami candaca, ñuca maquipi churarca. Ashtahuangarin ñucami, Mandaj Dios agllashpa churashca jatun mandajta ñuca maquihuan huañuchingapaca, na munarcani.

24Ricui, cunanga cambaj causaita ninanda juyashpa, ñuca na huañuchishcamandaca Mandaj Diosca, ñucatapash shinallata juyashpa, tucui llaquimandapash llujchihuachun— nijurcami.

25Shina nijpimi Saulca, Davidtaca cashna nirca: —Ñuca huahua David, canga alicachi tucushcami cangui. Canga imata rurashpapash, alipacha jatungunata rurashpa, tucuita mishanguipachami— nircami. Chai jipaca Davidca, pai maita rijushca ñandallata rircallami. Saulpash, paipaj huasiman tigrarcallami. Davidca, filisteocunapaj llactapimi cashca