ISAÍAS 40 - Quichua Imbabura Bible

Sion shuti pueblopi causajcunatami, Mandaj Diosca cushichishca

1Cangunapaj Taita Diosca, cashnami nin: “Cushijuichi, ñuca agllashca gentecuna, cushijuichi.

2Jerusalenbi causajcunaman caparishpa, paicunapaj shunguman chayajta cashna nishpa villaichi: ‘Cangunapaj juchacunata cungana huatacunaca, ñami pactamushca. Cangunapaj tucui juchacunamandaca, ñami chaupi yalita, Mandaj Diospaj maquimandaca llaquita japircanguichi’ nishpa villaichi” ninmi.

3Jichushca pambapi caparij runaca, cashnami nin: “Mandaj Diosman ñanda alichipaichi. Chulunlla pambapi quingu ñandapash, ñucanchi Taita Diosman derechapaichi.

4Tucui pugru pambacunapica, alpata jundachichi. Jatun lomacunata, uchillalla lomacunata allaichi. Vishtu ñangunapash, huaicuyashca pambacunapash ali ñan tucuchun, allashpa alichipaichi.

5Chaipimi Mandaj Diosca, punchapamba ricuringa. Chaitaca, tucui gentecunami tandanajushpa ricunajunga” ninmi. Caitaca, Mandaj Diospaj shimihuambachami chashna nirca.

6“Capariyari” nishpa caparijuj uyarijpimi, ñucaca: “¿Imatata caparishpa villana caniyari?” nishpa tapurcani. Shina tapujpimi, cashna nirca: “Tucui gentecunami jihuashnalla. Paicuna juyailla cashcapash, pambapi tiaj sisashnallami.

7Mandaj Diospaj huaira fucujpica, jihuapash chaquinllami, sisapash anguyashpa urmanllami. Na llullashpami cashna nini, gentecunaca jihuashnallami.

8Jihuaca ña chaquichunlla, sisapash anguyashpa urmachunlla. Ashtahuangarin ñucanchi Taita Diospaj Shimica, causaita causaicaman causajunllami” nircami.

9Sion shuti urcupi villashpa causajlla, jatun lomaman vichai riyari. Jerusalenbi villashpa causajlla, shinlli caparishpa villayari. Judá llacta pueblocunapi causajcunamambash, na manllashpa cashna nishpa capariyari: “¡Cangunapaj Taita Diosta ricuichi, paica caipimari!

10Ricuichi, Mandaj Jatun Diosca, ninan ushaihuan shamushpami, paipaj maquihuan mandanga. Ricuichi, imata pai cuna cashcataca apashpami shamunga. Imata pai cunataca, paipaj ñaupajpimi apashpa shamunga.

11Paica, llamata michinshnami, paipaj llamagucunata michijunga. Huahua llamagucunatapash, paipaj rigrapi churashpami, marcashpa apanga. Chairalla huachashca llamagucunataca, aliguta cuidariashpami michijunga” niyari.

Israelcunapaj Taita Diosca, imahuambash na chimbapurai ushanallami

12¿Pita mama cuchataca, paipaj maqui tablahuan, jahua pachataca paipaj maqui dedohuan medirca? ¿Pita cai pachapi ñutu alpataca, paipaj quimsa dedohuan tandachirca? ¿Pita urcucunatapash, lomacunatapash, balanzahuan pezashpa churarca?

13Mandaj Diospaj Espiritutaca, ¿pita yachachirca? Na cashpaca, ¿pita ali yuyaita cushpa yachachirca?

14Ali yachajushca cangapaca, ¿pitata paica ali yuyaita cuchun mañarca? Paitaca, ¿pita imatapash cashcatapacha rurashpa mandanata yachachirca? Na cashpaca, ¿pita ali yachaj canata cushpa, aliguta yarishpa purina ñambi churarca?

15Ricuichi, paipaca gentecunaca, asha paramupi tejamanda yacu shutujunshnami. Ñutu ñutu alpata pezangapaj, balanzapi churashcashnami. Ricuichi, yacu chaupipi tiaj llactacunatapash, ñutu alpatashnami chingachin.

16Chashnata ruraj Diosman animalta carashpa rupachingapaca, Líbano shuti urcupi tiaj yamdacunapash, chaillapita tiaj animalcunapash, na pactangachu.

17Paipaj ñaupajpica, tucui shuj llactacunapash, imapash illashcashnallatami. Paihuan chimbapurangapajpash, imapash na canllu. Imapash illashcashnallatami.

18¿Imatashi Taita Diosman rijchajtaca, rurai ushanguichi? Na cashpaca, ¿imaman rijchajtashi ruranguichi?

19Jirruta tacashpa, imatapash ruranata yachajca, jirrutami diosta ruran. Culquita imatapash ruranata yachajca, orota yacuyachishpa jahualla churashpami, culqui cadenacunata ruran.

20Imagutapash na charij runaca, imata carangapajpash, na polillaj caspitami mascan. Chai jipaca, imamambash rijchajta rurachunmi, ali yachaj runata mascashpa, na cuyurij diosta rurachin.

21Cangunaca, ¿nachu yachashcanguichi, nachu uyashcanguichi? Callarimandapacha ima horallapash, ¿pipash nachu villarca? Cai pachata rurashca punllamandapacha, ¿nachu pipash yachachirca?

22Diosca, cai pacha tucui muyundipimi tiajun. Chaipi causajcunaca, langosta jurucunashnami. Paimi, jahua pachataca, telata mandanshna churarca. Chaipi causana carpatashnami shayachirca.

23Paica, ninan ushaita charijcunatapash, yangacunatami ruran. Cai pachapi jatun mandajcunatapash, yangapimi churan.

24Ima horallapash malquimanda na tarpushcatashna, ima horallapash na muyuta tarpushcatashna, ima horallapash alpa ucuman sapita na charishca yuratashnami ruran. Shinamandami huaira fucujpica, ñapash chaquin. Chaquijpica, acapana shamushpami, jupatashna apan.

25Jucha illaj Diosca, cashnami nin: “¿Imatata ñucaman rijchajta rurai ushanguichiyari? Na cashpaca, ¿imahuanda ñucataca chimbapurai ushanguichiyari?” ninmi.

26Cai tucuita pi rurashcataca, cangunapaj ñavihuan vichai alsarishpa ricuichi. Paimi, tucui ima tiashcatapash cuentashpa llujchin. Paimi, tucuita shutipi cayan. Pai cayajpica, shujllapash na illangachu. Paica, chashna tucuita rurai ushaj, tucuita mandai ushajmi.

27Jacobopaj mirai israelcunalla, ¿imashpata cangunaca, cashna ninajunguichi?: “Mandaj Diosca, ñucanchi imata rurajtapash na yachanllu. Ñucanchi Taita Diosca, ñucanchiman alita ruranataca, yaritapash na yarinllu” ninajunguichimi.

28Causaita causajuj Taita Dios, Mandaj Dios cajtaca, ¿nachu yachashcanguichi, nachu uyashcanguichi? Paimi, tucui cai pachataca rurarca. Paica na ushai illanshna tucunllu, na shaijunllu. Paipaj jatun yachaitaca, pipash na yachai ushanllu.

29Shaijushcacunamambash, paimi ushaita cun. Ima ushai illajcunamambash, ashtaca ushaitami cun.

30Huambracunaca shaijushpa, na ushanllami. Chairalla viñaicunapash, shaijushpa urmanllami.

31Ashtahuangarin Mandaj Diostalla shuyashpa causajcunaca, mushuj ushaitami japinga. Jahuata rij jatun angashna jatarishpa calpashpapash, na shaijungachu. Mashnata purishpapash, na shaijungachu.