OSEAS 4 - Quichua Imbabura Bible

Mandaj Diosca, israelcunata fiñashpami rimashca

1Israelcunalla, Mandaj Dios rimashca shimicunata uyaichi. Mandaj Diosca, cai llactapi causajcunataca fiñashpami rimarca. Cai llactapica, na llullaj canapash, llaquij canapash, Diosta rijsij canapash na tianllu.

2Ashtahuangarin umashpalla ari nina, llullana, huañuchina, shuhuana, huainayanallami jundashca. Cati cati huañuchishpa causanallami tian.

3Chaimandami cai llactaca, yana churajunata churajushcashna quedanga. Cai llactapi tucui causajcunapash, sacha animalcunapash, jahuata rij alasyu animalcunapash chaquinshnami tucuringa. Mama cuchapi causaj pijicunapashmi huañunajunga.

4“Runaca shuj runataca, napacha juchachishpa jarcashpa rimanachu. Cambaj llacta puracunaca, curata na cazungapaj munajcunashnallatami.

5Shina cashcamanda canga, punllami llaquichi tucungui. Profetapash, tutami canhuanllata llaquichi tucunga. Cambaj mamatapashmi causaita quichusha.

6Ñuca agllashca gentecunaca, na yachaimandami tucuchi tucurca. Ñuca mandashcata yachashpapash yangapi churashcamandami, candaca cura canamanda anchuchisha. Cambaj Taita Dios mandashcata cungashcamandami, cambaj huahuacunataca ñucapash cungasha.

7Paicunaca, imashna mirashcashnallatami, ñucata fiñashpa juchata ruranajurca. Chaimandami ñucapash, paicuna alicachi tucushcataca, rimajpi pingai tucunaman tigrachisha.

8Curacunaca, ñuca agllashca gentecuna, juchamanda cushcacunatami micushpa causan. Chaimandami, ashtahuan juchata rurachumbash, tucui shunguhuan munanajun.

9Gentecunata llaquichinshnallatami, curacunatapash llaquichisha. Paicuna imashna causashcashnallatami llaquichisha. Paicuna imatalla rurashcashnallatami cusha.

10Mandaj Diosta servinata saquishcamandami, micushpapash na vijsa pactanga. Huainayashpa causashpapash, na ashtahuan miranajungachu.

11Huainayana, vinota ufiana, llullu vinota ufianami, ali yuyaihuan causanataca chingachin.

12Ñuca agllashcacunaca, paicunapaj yanga diostami, imata cashpapash tapunajun. Chai yamda caspimi, tapushcataca tigrachin. Paicunataca, huainayachij ayami pandachirca. Huainayangapajmi, paicunapaj Taita Diostaca saquinajurca.

13Urcu jahuacunapimi, animalta cushpa huañuchinajurca. Inciensotapash loma jahuacunapi, encina nishca, álamo nishca, olmo nishca ali llanduj quiru ucucunapimi cushnichinajurca. Shinamandami cangunapaj ushicunaca huainayanajunga. Cangunapaj jachungunapash, cazarashca jahuami shujcunahuan causanajunga.

14Chashna huainayajpica cambaj ushicunataca, na llaquichishachu. Cambaj jachungunatapash, cazarashca jahua shujcunahuan causajushcamandaca, na llaquichishachu. Curacunallatami, culquimanda huainayaj huarmicunahuan, nali huarmicunahuan rishpa, animalcunata cushpa huañuchinajun. Shinamandami gentecunaca, na yachashpallata chinganajunga.

15Israelcunalla, canguna huainayanajujpipash Judá llactapi causajcunallapash, na juchata rurashpami ali canman. Gilgal shuti pueblomambash, na yaicunachu canguichi. Bet-avén shuti pueblomambash, na vichai rinachu canguichi. ‘Mandaj Diosca causajumbachami’ nishpapash, na juramentunachu canguichi.

16Israelcunaca, millai malta shicushnami ñucamandaca anchurinajurca. ¿Mandaj Diosca cunanga, maltun llamacunatashnachu, jatun pambapi michinga?

17Efraín shuti ailluca, yanga dioscunatallami mañanajun, saquilla.

18Paicunapaj ufianaca huaglircami. Paicunaca, huainayanatapash napacha shaijunajurcachu. Paicunata mandajcunapash, pinganayaita ruranatallami munanajurca.

19Chaimandami paicunaca, huaira apashcashna tucunajurca. Animalcunata dioscunaman cushpa huañuchishcamandami, pingai tucunajunga.