PROVERBIOS 14 - Quichua Imbabura Bible

1Alipacha yachajushca huarmica,

paipaj huasi ucu purataca,

aliguta huasichinshnami charin.

Ashtahuangarin shinlli shungu huarmica,

paipaj maquihuan urmachinshnami charin.

2Aligutalla rurashpa causaj runaca,

Mandaj Diosta manllanmi.

Ashtahuangarin jatun nalita ruraj

runaca, yangapimi churan.

3Shinlli shungu runapaj shimimandaca,

jariyashpa jatun tucunami, varahuan

llaquichinshna llujshin.

Ashtahuangarin alipacha yachajushcacunapaj

shimica, imamandapash huacaichingami.

4Yapungapaj huagracuna illajpica,

granota alichinapash chushajmi.

Ashtahuangarin shinlli huagracuna tiajpimi,

granocunataca llashajta tandachin.

5Shinapacha cashcata villaj runaca, na llullangachu.

Ashtahuangarin llulla runaca,

llullacunatallami villanga.

6Na cazushpa asij runaca,

ali yachaita mascashpapash, napacha tarinllu.

Ashtahuangarin ali yachajushca runapaca,

ali yachaita yachajunaca fangallami.

7Shinlli shungu runapaj ñaupajmandaca anchuringuilla.

Paipica, ali yachajuchun rimashcataca na taringuichu.

8Aligutapacha yarishpa purij runapaj

yachajushcahuanga, pai imashna

causajushcatami aliguta yarijun.

Ashtahuangarin shinlli shungu runacunaca,

nalicuna cashpami umachishpalla causanajun.

9Shinlli shungu runacunaca,

ima juchata rurashpapash asinllami.

Ashtahuangarin aliguta ruraj purapica,

alita ruranatami munan.

10Alma llaquilla cajpipash,

paipaj shungupillami yachan.

Cushijui tiajpipash, na rijsishcacunaca

na yachai ushangachu.

11Diosta na manllajcunapaj huasica,

llaquinayaitami tucuchi tucunga.

Ashtahuangarin aliguta rurajcunapaj

carpaca, sisajunshnami ricuringa.

12Runapaj causaipica, ali ñanshnallami ricurin.

Ashtahuangarin tucuripica, huañuiman apaj ñanmi.

13Asijushpapash shungupica, llaquitallatami charinga.

Cushijushca jipaca, llaquillami quedanga.

14Shinlli shungu runaca, paipaj nali

causaitallatami millanayachinga.

Ashtahuangarin ali runaguca,

paipaj causaimandaca cushijungami.

15Na yachajushca runaca,

imata nijpipash tucuita crinllami.

Ashtahuangarin ali yachajushca runaca,

imata rurangapajpash aliguta yarinrami.

16Alipacha yachajushca runaca, nalita

ruranata manllashpa caruyanmi.

Ashtahuangarin juizu illaj runaca,

yapata jariyashpami purin.

17Ñapash fiñarij runaca, juizu illaj

runashna imapash cachun rurangallami.

Jatun nalita ruraj runaca, millanayachi tucungami.

18Na yachajushcacunaca, shinlli

shungu canatallami japinga.

Ashtahuangarin aligutapacha yarishpa

purijcunaca, ali yachaitami

coronata churajunshna japinga.

19Nalita ruraj runacunaca, ali shungu

runacunapaj ñaupajpimi cumurinajunga.

Diosta na manllajcunaca, imatapash cashcatapacha

rurajpaj huasi pungupimi cumurinajunga.

20Imagutapash na charij runagutaca, paipaj

cumbapashmi na ricunayachin.

Ashtahuangarin charij runataca, taucacunami juyan.

21Paipaj cumba runaguta yangapi

churashpaca, juchatami ruran.

Ashtahuangarin imagutapash na charijcunata

llaquij runaca, ninandami cushijun.

22Nalita yarijcunaca, ¿nachu pandarinajun?

Alita yarijcunaca, juyai tucunata,

na llullaj canatami japinga.

23Tucui imata rurashcamandapash, japina tianmi.

Ashtahuangarin yanga parlotalla parlashpa

causajcunaca, imapash illajmi tucunajun.

24Alipacha yachajushca runacunapaca, imata

charishcapash coronashnami.

Ashtahuangarin juizu illaj runacunaca, shinlli

shungu cashpami muspayanajun.

25Na llullashpa villaj runaca, almata quishpichinmi.

Ashtahuangarin umachij runaca, llullacunatami villajun.

26Mandaj Diosta manllajcunaca,

paita ninandapacha yariashpami causanajun.

Paicunapaj churicunapash, imaguta

shuyanatapash charingami.

27Mandaj Diosta manllanaca,

causaita cuj yacu llujshijunshnami.

Shina manllanaca, huañuchij lazucunamanda

caruyachingapajmi ali.

28Jatun mandajca, ashtaca gentecunata

mandajushpami cushijun.

Ashtahuangarin huaquinlla gentecuna

tiajpica, mandajca ushaita na charinllu.

29Na ñapash fiñarij runaca,

ali yuyaitapachami charin.

Ashtahuangarin shungupi ñapash fiñarij runaca,

shinlli shungu cajtami ñapash ricuchijun.

30Cushilla shunguca, cuerpomambash causaita cunmi.

Ashtahuangarin imatapash ñucapaj cashcanman

yashpa ricunaca, tullucunata ismuchinshnami.

31Imagutapash na charijcunata llaquichishpa

charij runaca, paita Ruraj Diostami llaquichijun.

Ashtahuangarin imagutapash na charijcunata

llaquij runaca, Diostami alicachijun.

32Diosta na manllaj runaca, paillata jatun

nalita rurashcamandami, llaquiman shitai tucunga.

Ashtahuangarin imatapash cashcatapacha ruraj runaca,

huañushpapash alita japinatami shuyan.

33Ali yachaica, aligutapacha yarishpa

purij runapaj shungupimi tian.

Ashtahuangarin shinlli shungu

runacunaca, na rijsinllu.

34Imatapash cashcatapacha rurajcunami,

llactataca jatunyachin.

Ashtahuangarin juchaca, llactacunataca

pingaipimi churan.

35Jatun mandajca, paita servij runa

ali yuyaita charijpica juyanmi.

Ashtahuangarin paita pingaichij

runataca fiñashpami llaquichin.