ÉXODO 12 - Quichua Imbabura Bible

Pascua punllatami villajun

1Mandaj Diosca, Egipto llactapimi Moisestapash, Aarondapash, cashna nijurca:

2“Cai quillami cangunapaca, quillacunapaj callari quilla canga. Cangunapaca, cai quillami huatapaj callari quilla canga.

3Tucuilla tandanajushca israelcunaman, cashna nishpa villaichi: ‘Cai quilla chunga punllapica, cangunapaj taitacunapaj familiacuna imashna cashcashnallatami, tucuicuna shuj maltun llamaguta japina canguichi. Cada familiami shuj maltun llamaguta japina canguichi.

4Ashtahuangarin maijan familiapipash, llamaguta micungapaj na tauca tiajpica, huasiyu taitaca paipaj huasi ladollapi causajcunahuanmi mashna gentecuna cajpipash, shuj llamaguta japinga. Mashna puracuna micuna cajpipash, chaita ricushpami maltun llamataca huañuchina canguichi.

5Chai animalca, shuj huatata charij, imapash na tucushca, jari animalmi canga. Chaitaca, llamacunamanda cashpa, na cashpaca chivocunamandami japina canguichi.

6Chai llamagutaca, cai quilla chunga chuscu punlla tucungacaman alichinguichilla. Chai llamagutaca, tucuilla tandanajushca israelcunami, ña chishiyajujpi huañuchinga.

7Chai yahuarmanda ashata japishpami, aichata micushpa tianajuna huasi punguta charijuj ishcandi lado caspipipash, jahua caspipipash javinga.

8Chai tutaca, ninapi cusashca aichata, levadura illaj tandatami micunajunga. Chaitaca, jayaj jihuacunahuanmi micunajunga.

9Chai aichataca, imatallapash na chahuataca micunachu canguichi. Yacuhuan yanushcatapash, na micunachu canguichi. Llamapaj umatapash, chaquitapash, chunllulitapashmi, ninapi cusana canguichi.

10Chai aichataca, imatallapash cayapaca na puchuchinachu canguichi. Cayapaj puchushca tiajpica, ninapimi rupachina canguichi.

11Cangunaca, cashnami micuna canguichi: Ali chumbilirishcalla, chaquipipash churajushcalla, tauna caspitapash chaririajmi, ucha micuna canguichi. Chai tutaca, Mandaj Dios ñucapaj Pascua tutami canga.

12Chai tutallatami ñucaca, Egipto llactata yalijusha. Shina yalishpami, Egipto llactapi causajcunapaj punda churicunatapash, punda huachashca jari animalcunatapash tucuillata huañuchisha. Shinallata Egiptopi causajcunapaj tucui dioscunatapash, ninandapachami llaquichisha. Ñucami, Mandaj Dios cani.

13Canguna causanajuj huasicunapi javishca yahuarca, shuj ricuchinami canga. Chai yahuarta ricushpaca, cangunataca yalishallami. Shinamandami, Egipto llactapi causajcunata huañuchishpa llaquichijujpipash, canguna purapica ima llaquipash na tianga.

14Cai punllami cangunapaca, yarina punlla canga. Chai punllataca, mirai miraicunacaman, Mandaj Diosman jatun fiestata ruranguichi. Chai punllataca, tucui causaipi pactachinajuchun ñuca cushca shimipi nijunshnallatami rurana canguichi.

15Canchis punllacamanmi, levadura illaj tandata micuna canguichi. Chashna rurajpimi punda punllapica, cangunapaj huasicunapi levadura illanga. Maijan cashpapash, levadurahuan chapushcata punda punllamandallata callarishpa, canchis punllacaman micushpaca, tandanajushca Israel puramandaca anchuchi tucungami.

16Punda punllapica, ñucapajlla tandanajuimi canga. Shinallata canchis punllapipash, ñucapajlla tandanajuitami charinguichi. Chai punllacunapica, imatapash na ruranachu canguichi. Tucui canguna micunatallami yanuna canguichi.

17Levadura illaj tandata micuna fiesta punllataca, pactachinami canguichi. Chai punllapimi cangunataca, tandanajushca ashtaca gentecunata Egipto llactamanda llujchircani. Chashna cashcamanda cai mandashcataca, cangunapaj mirai miraicaman tucui causaipi rurashpa ricuchishpa catinajunallami canguichi.

18Quilla callari punllapillatami, levadura illaj tandata micuna canguichi. Chaitaca, chunga chuscu punlla chishimanda, ishcai chunga shuj punlla chishicamanmi micuna canguichi.

19Canchis punllacamanmi, cangunapaj huasicunapica, ima levadurapash tiaitallata na tianga. Shuj llactamanda shamushca cashpapash, chai llactapi huacharishca cashpapash, maijan cashpapash levadurahuan chapushcata micushpaca, tandanajushca Israel puramandaca anchuchi tucungami.

20Levadurata chapushcataca, imatallapash na micunachu canguichi. Canguna causanajuj tucui huasicunapimi, levadura illaj tandata micuna canguichi’ nishpa villaichi” nijurcami.

21Shina nijpimi Moisesca, israelcunata mandaj rucucunata tucuillata cayashpa tandachishpa, cashna nijurca: “Cangunapaj familiacunamandaca, maltun llamata llujchishpa japinguichi. Chaitaca, Diosman cushpa pascua punllapi huañuchinguichi.

22Shinallata hisopo nishca malquicunata japishpami, bateapi tandachishca yahuarpi mutiyachina canguichi. Chaihuanga, pungu jahua caspipipash, punguta charijuj ishcandi lado caspipipash, bateapi tandachishca yahuarhuan javichi. Canguna puramandaca, maijanllapash cangunapaj huasi ucumandaca, punllayangacaman na llujshinachu canguichi.

23Mandaj Diosca, Egiptopi causajcunata huañuchishpami yalijunga. Pungu jahua caspipipash, punguta charijuj ishcandi caspipipash, yahuarta javishcata ricushpaca, chai pungutaca Mandaj Diosca yalingallami. Huañuchishpa purijujtapash, cangunapaj huasicunapi yaicuchunga na saquingachu.

24Cangunapash, cangunapaj miraicunapash pactachinajuchun ñuca cushca shimicunataca, tucui causaipimi pactachina canguichi.

25Mandaj Dios cangunaman carasha nishcashnallata, chai llactata carajpi chaiman chayashpaca, imashna rurachun mandashcataca pactachishpa catinguichilla.

26Cangunapaj huahuacunaca: ‘Cai ruranataca, ¿imashpata chashna ruranguichi?’ nishpami tapunga.

27Shina tapujpica, cashna nishpa tigrachinguichi: ‘Caica, Mandaj Diosman pascua punllapi huañuchishca animalmi. Mandaj Diosca, Egiptopi causajcunata huañuchijushpapash, Egiptopi causanajuj israelcunapaj huasi jahuata yalishpami, israelcunataca na huañuchirca. Shinami ñucanchi huasi ucu purataca, quishpichishpa saquirca’ nishpa parlanguichi” nijurcami.

Shina nijpimi israelcunaca, cungurishpa Diosta ninanda alicachinajurca.

28Israelcuna rishpaca, Moisestapash, Aarondapash imashna Mandaj Dios mandashcashnallatami, chai horaspacha pactachinajurca.

Punda huacharishcacunami huañushca

29Chaupi tutapica, cashnami tucurca: Mandaj Diosca, tucuilla punda churicunatami, Egipto llactapica huañuchirca. Mandashpa tiajunapi tiajuj Faraonbaj punda churimanda callarishpa, prezu tianajujcunapaj punda churicunacaman, punda huacharishca animalcunacamanmi tucuillata huañuchirca.

30Chai tutami, Faraonga paipash, paita servijcunapash, Egiptopi tucuilla causajcunapash jatarinajurca. Chai tutapica, shuj huasipillapash huañushcacunaca na illajpimi, Egipto llactapica ninanda caparinajui tiarca.

31Chai tutami Faraonga, Moisestapash, Aarondapash cayachun cachashpa, cashna nirca: “Cangunapash, israelcunapash, ñuca gentecunapaj chaupimanda llujshichilla. Canguna imashna nishcashnallata, Mandaj Diosta servingapaj richilla.

32Cangunapaj llamacunatapash, cangunapaj huagracunatapash, canguna imashna nishcashnallata apashpa richilla. Ña rishpaca, ñucatapash bendiciahuanguichi” nircami.

33Egiptopi causajcunaca: “Tucuillamari huañugrinchi” ninajushpami israelcunataca, chai llactamanda ucha llujchishpa cachanajurca.

34Israelcunaca, levaduratapash nara churashpallatami paicuna masashcataca, fachacunahuan pillushpalla, rigrapi churashpa apanajurca.

35Israelcunaca, Moisés mandashcashnallatami, Egiptopi causajcunataca culquita, orota rurashca juyailla charishcacunata, churajunacunatapash mañanajurca.

36Mandaj Diosca israelcunataca, Egiptopi causajcunapaj ñaupajpi ali ricurichun rurajpimi, paicuna mashnata mañashcata cunajurca. Chashnami israelcunaca, Egiptopi causajcunataca quichushpa apanajurca.

Israelcuna Egiptomanda llujshishcatami villajun

37Israelcunaca, Ramesés shuti pueblomanda llujshishpaca, Sucot shuti pueblomanmi chayarca. Paicunaca, chaquilla purijcunallami sucta patsaj huarangashna jaricuna carca. Huahuacunataca na cuentashcachu carca.

38Paicunahuanga, shican shican ashtaca ashtaca gentecunapash, llamacunapash, ashtaca ashtaca shuj animalcunapashmi vichai rinajurca.

39Egiptomanda paicuna apamushca tanda masatami, levadura illaj mishqui tandata rurashpa cusashpa micunajurca. Paicunaca, Egiptopi causajcuna Egiptomanda ucha llujchijpimi, levadurata churaitallapash, yanushpa micuitallapash na ushashca carca.

40Israelcuna Egiptopi causanajushca huatacunaca, chuscu patsaj quimsa chunga huatami carca.

41Chuscu patsaj quimsa chunga huata yalijpica, chai punllallatami Mandaj Diospaj tandanajushca ashtaca gentecunaca, Egipto llactamanda tucuilla llujshimunajurca.

42Israelcunata, Egipto llactamanda cai tutapi llujchimushcamanda, Mandaj Diostalla yarina tutami. Cai tutatami tucuilla israelcunaca, paicunapaj mirai miraicunacaman, Mandaj Diostalla yarishpa pactachinajunga.

43Mandaj Diosca Moisestapash, Aarondapash cashnami nijurca: “Pascua punllapica, cashna rurachunmi mandashca. Chai micuitaca, shuj llactamanda cashpaca, na micui ushangachu.

44Ashtahuangarin randishca tucui servijcunami, circuncisión nishcata rurashca jipaca, chai micunata micui ushanga.

45Shuj llactamanda shamushpa cangunahuan causajuj runa, na cashpaca shujpi shujpi trabajaj runa cashpapash, na micui ushangachu.

46Chaitaca, shujlla huasipimi micuna. Chai micuna aichataca, chai huasimandaca na canllaman apanachu canguichi. Chai aichapi tiaj tullutapash, na faquinachu canguichi.

47Tucuilla tandanajushca israelcunami, chaitaca ruranga.

48Ashtahuangarin maijan runa cashpapash, shuj llactamanda shamushca cangunahuan causajushpa, paipash Mandaj Diospaj pascua punllapi, jatun micuita micungapaj munashpaca, circuncisionda rurashca cachun. Chai jipami, cangunapaj llacta purashnallata cashpa, chai jatun micuitaca micunga. Ashtahuangarin circuncisionda na rurashca cashpaca, maijanllapash na micui ushangachu.

49Chai llactapillata huacharishca runapajpash, shuj llactamanda shamushpa cangunapaj chaupipi causajuj runapajpash cai mandashcallatami canga” nijurcami.

50Shina nijpica, chashnami tucuilla israelcunaca, Mandaj Dios imashna Moisesman, Aaronman mandashcashnallata ruranajurca. Chai pascua punllapi micuitaca chashnatapachami ruranajurca.

51Chai punllallatami, Mandaj Diosca israelcunataca, tandanajushca soldadocunatashna Egipto llactamanda llujchirca.