1Mandaj Diosca, cashnami nirca: “Pimambash aliguta rurashpa pactachishpa, imatapash cashcatapacha ruraichiyari. Cangunata quishpichinaca, ñami chayamugrin. Ñuca imatapash cashcatapacha rurashpa ricuchinapash, ñami chayamugrin.
2Chaita ruraj runaca, ninandami cushijun. Ugllarishcashna chaita yariajlla causajuj huañuna aichayu runaca, ninandami cushijun. Samana punllatapash, na yangapi churashpami alichin. Tucui nalita ruranamandapash jarcarishpa causashpami cushijun” nircami.
3Shuj llactamanda cashpapash, Mandaj Diosta catij cashpaca, ama cashna nichun: “Mandaj Diosca, pai agllashca puracunamandaca, ñucata shitahuangapachami” nitaca, ama nichun. Shinallata eunuco nishca runapash: “Ricuichi, ñucaca chaquishca yurashnami cani” nitapash, ama nichun.
4Mandaj Diosca, cashnami nin: “Eunuco runacunapash, ñuca shicanyachishca samana punllacunata huacaichishpa, ñuca munashcashna causanajuchun. Ñucahuan ari ninajushcatapash, ugllarinshna chaita yariajlla causanajuchun.
5Shina causajpica, pircahuan rurashca ñuca huasipimi causachun saquisha. Churicunata, ushicunatapash yali aligutami carasha. Paicunapaj shutitaca, ima horasllapash na tucurij tucui causaipaj cachunmi cusha.
6Caru llactamanda runacunapaj churicunapash, Mandaj Dios ñucata servingapaj catichunlla. Shinallata Mandaj Dios ñuca shutita tucui shunguhuan juyashpa ñucata servij tucuchunlla. Samana punllatapash na yangapi churashpa, tucuicuna huacaichinajuchunlla. Ñucahuan ari ninajushcatapash ugllarinshna, chaita yariajlla causanajuchunlla.
7Chashna causajpica, ñucapajlla urcumanmi pushasha. Ñucata mañana huasipimi samachisha. Animalcunata huañuchishpa, ñuca altarpi churashpa tucuillata rupachishpa carashcatapash chasquishami. Ñuca huasica, tucui gentecuna Diosta mañana huasi ni tucushcami canga” ninmi.
8Caita, chaita rishca israelcunata tandachij Mandaj Jatun Diosca, cashnami nirca: “Ñucapaj tucushpa tandanajujcunatapash, caiman cutin pushamusharami” nircami.
9Sachacunapi causanajuj tucui animalcuna, bosquepi causanajuj millai animalcuna micushpa tucuchingapaj shamuichiyari.
10Paicunapaj chapaj runacunaca tucuilla ñausacunami, imatallapash na yachajcunami. Tucui paicunami, upa alcucunashna na huacashpa sirinajun. Puñushpa sirinatallami, juyashpa causan.
11Paicunaca, mashnata micushpapash, napacha sajsaj alcucunashnami. Michijcunallatapash, imatallapash na entendinllu. Tucui paicunami, paicuna munashcata rurashpa causanajun. Paicunapaj alitallami, tucuicuna mascanajun. Imata rurangapajpash, paicuna munashcatallami ruranajun.
12Paicunaca, cashnami ninajun: “Shamuichi, vinota, sidrata ufiashpa machashunchi. Cayapash, cunan punllashnallatami canga. Na cashpaca, ashtahuan alipachami canga” ninajunmi.
Who We AreWhat We EelieveWhat We Do
2025 by iamachristian.org,Inc All rights reserved.
