2 SAMUEL 22 - Quichua Imbabura Bible

Macanajuita mishachijpimi, David candajushca(Sal. 18:1-50)

1Davidca, paita tucui fiñajcunamandapash, Saulpaj maquimandapash Mandaj Dios quishpichishca punllami, Mandaj Diosman candashpa cai shimicunata,

2cashna nijurca:

“Mandaj Diosca, ñucapaca jatun Rumishnami.

Ñucaman ushaita cujpash, ñucata cacharichijpashmi.

3Ñuca Taita Diosca, ñucaman ushaita cujmi,

paitami yariajusha.

Ñuca jarcarina escudomi.

Ninan ushaihuan ñucata quishpichijmi.

Jahua jahuapi ñuca pacajunami.

Ñucata Quishpichijlla, ninanda llaquichi

tucunamandami quishpichihuarcangui.

4Mandaj Diostami mañasha.

Paimi, alicachi tucunatapacha charin.

Paita mañashpami, ñucata

fiñajcunamandaca quishpirisha.

5Huañuica, yacu jatarinshnami

muyundi pillushpa charihuarca.

Jatun nalicunapash, ninanda jatarij

huaicu yacushnami ninanda manllachihuarca.

6Seolca huatashpami, muyundi pillushpa charihuarca.

Ñuca jahuapica, huañuchij lazutami shitamurca.

7Chashna llaquihuan cashpami, Mandaj Diosta mañarcani.

Ñuca Taita Diostami caparircani.

Paimi, ñuca mañajujtaca,

paipaj huasimandapacha uyahuarca.

Ñuca caparishcapash, paipaj rinrimanmi uyarirca.

8Cai pachaca, ninanda cuyuchijpimi chujchurca.

Jahua pachata charijuj,

callari rumicunapashmi cuyurirca.

Pai Dios fiñarijpimi, chashna chujchunajurca.

9Paipaj singamandaca, cushni

llujshishpami vichai rijurca.

Paipaj shimimandaca, tucuchij ninami llujshijurca.

Carbongunapash, pai japichijpimi japirirca.

10Jahua pachata pascashpami, urai shamurca.

Paipaj chaqui ucupica, yana yanami carca.

11Paica, shuj querubín nishcapi

tiarishpami, jahuata rirca.

Huairapaj alascunapimi rijurca.

12Paita pacachunga, yana yana tutatami,

paipaj muyundipi churarca.

Tamianalla llashaj, yana yana fuyutami churarca.

13Pai punchapamba ricurijpimi,

ninayashca carbonguna japirirca.

14Mandaj Diosca, jahua pachamandami culun nirca.

Jahua pachapi causajuj Diosca,

chaimandallatami rimamurca.

15Paipaj flechacunata cachamushpami,

fiñajcunataca caita chaita cacharca.

Puchapamba shitamushpami, paicunataca tucuchirca.

16Shinamandami, mama cucha ucupi

jatarijuj yacucunapash ricurirca.

Cai pacha callaripi tiajuj rumicunapashmi ricurirca.

Mandaj Dios shinllita rimashpa,

paipaj singa samaihuan fucujpimi, chashna tucurca.

17Jahua pachamanda cachamujpimi, ñucataca

ashtaca yacu chaupimanda japishpa llujchihuarca.

18Ñucataca, ninan ushaita charij,

ñucata fiñajmandapash, ñucata millanayachij

runacunamandapashmi llujchihuarca.

Paicuna ñucata ashtahuan yali shinllicuna

cajpipash, llujchircallami.

19Ninan llaquihuan purijui punllami,

ñucataca ashtahuan cungashcapi llaquichinajuhuarca.

Ashtahuangarin Mandaj Diosmi,

ñucataca shinllichihuarca.

20Chaimandaca, jatun pambamanmi llujchihuarca.

Ñucata alicachishpami cacharichihuarca.

21Mandaj Diosca, ñuca imatapash cashcatapacha

rurashcashnallatami, alita carahuarca.

Ñuca maquihuan ima nalitapash na

rurashcashnallatami, alita tigrachihuarca.

22Ñucaca, Mandaj Dios mandashcacunatami cazurcani.

Ñuca Taita Diosmanda ama anchuringapaca,

paita manllashpami causarcani.

23Tucui imatalla pai yachachishcacunami,

ñuca ñaupajpi carca.

Pai escribichishca shimicunamandaca,

na anchurishcanichu.

24Paipaj ñaupajpica, aligutami ruran carcani.

Ima nalita ruranamandapash jarcarircanimi.

25Chaimandami Mandaj Diosca, imatapash

cashcatapacha ñuca rurashcashnallata alita carahuarca.

Ñuca maquihuan paipaj ñaupajpi,

ima mapatapash na rurashcashnallatami carahuarca.

26Llaquij runahuanga, cambash llaquij cajtami ricuchingui.

Ima nalitapash na rurajhuanga,

ima pandatapash na ruranguichu.

27Ima mapapash illaj runapaca, cambash

ima mapapash illajtami ricuchingui.

Shinallata jatun nalita rurajhuanga,

shinllipachami cangui.

28Canga, ninan llaquihuan causaj

gentecunataca quishpichinguimi.

Ashtahuangarin cambaj ñavica,

jariyashcacunata urai cumuchingapajmi ricuriajun.

29Mandaj Dioslla, canmi ñuca lamparagushna capangui.

Ñuca yana yana tutacunatapash,

ñuca Taita Diosmi punchayachinga.

30Canhuanga, ashtaca soldadocunatapash mishashallami.

Ñuca Taita Dioshuanga, jatun

pircacunatapash urmachishpa yalishallami.

31Taita Diosta ricujpica, ima pandapash na tianllu.

Mandaj Dios rimashca shimica, culquita

rupachishpa tucui mapata anchuchishcashnami.

Paita shuyajcunataca, escudoshnami pacashpa charin.

32Shina cashpaca, ¿pita Taita Dios?

Mandaj Diosllami tian.

Jatun Rumishna, ñucanchi Taita

Diosmanda shujca, ¿pita tian?

33Taita Diosmi, chumbilichinshna ushaita cuhuan.

Paillatami, ñuca purina ñanmandaca,

ima nalitapash anchuchin.

34Paimi ñuca chaquitaca, tarugashna

ucha calpajta ruran.

Urcu jahuacunapipash, paimi shinllita shayachihuan.

35Paimi, jatun macanajuipi macanajuchumbash,

ñuca maquita yachachin.

Bronce arcota ñuca rigrahuan binguyajta

chutachumbashmi yachachihuan.

36Shinallata quishpirina cambaj

escudotapashmi cuhuarcangui.

Cambaj juyaihuanmi jatunyachihuashcangui.

37Ñuca purina ñandaca anchuyachishpami,

purinallaguta rurapashcangui.

Chaimandami, ñuca chaquipash na llucharca.

38Ñucata fiñajcunataca, catishpa rishpami tucuchisha.

Paicunata tucuchingacaman, na tigramushachu.

39Paicunataca, na jatari ushangacamanmi

chugrichishpa tucuchisha.

Ñuca chaqui ucupimi urmanajunga.

40Ñuca macanajuchunmi, chumbilichinshna

ushaita cuhuarcangui.

Ñucata fiñajcunataca, ñuca ñaupajpimi

urai cumuchishcangui.

41Ñucata fiñajcunataca, ñuca ñaupajmanda

tigrachishpami calpachircangui.

Ñucata na ricunayachij runacunata ñucallata

tucuchijuchunmi, chashna rurarcangui.

42Caparinajujpipash, paicunata quishpichijca

pipash na tiarcachu.

Mandaj Diostapashmi mañanajurca.

Ashtahuangarin paica na uyarcachu.

43Pambapi ñutu alpatashnami, paicunataca ñuturcani.

Ñambi sirij turutashnami, sarushpa tucuchircani.

44Fiñashpa rimaj gentecunamandaca quishpichihuarcanguimi.

Llactacunapaj umashna cachunmi charihuarcangui.

Ñuca na rijsishca gentecunami, ñucata servinajunga.

45Na rijsishca gentecunapaj churicunami,

ñuca mandajpi causanajunga.

Ñuca rimajta uyashpami, ñucata cazunajunga.

46Na rijsishca gentecunaca, ushai illaj

tucushpami, paicuna pacajushca ucumandaca,

chujchushpa llujshinajunga.

47Mandaj Diosca causajupachunlla.

Ñuca jatun Rumishna Diosca, alicachi tucushca cachun.

Ñucata quishpichij Taita Diosca,

jatunyachi tucushca cachun.

48Ñucata llaquichishcamandaca, chashnallata

llaquichij Taita Diosmi.

Gentecunataca, ñucata cazuchunmi,

ñuca chaqui ucupi churashpa charin.

49Paimi, ñucata fiñajcunamandaca cacharichihuan.

Ñucata llaquichingapaj jatarinajujpipash,

ashtahuan alipi churashpami jatunyachihuan.

Ninanda llaquichij runapaj maquimandapashmi

cacharichihuarcangui.

50Mandaj Dioslla, chaimandami shuj

llactacunapipash, canmanda villajusha.

Cambaj shutitapashmi candajusha.

51Paimi, pai agllashca jatun mandajtaca,

cushijushpa quishpichin.

Pai agllashpa, aceiteta talishpa javishca

mandajtaca llaquinmi.

Davidta, paipaj miraicunatapash, causaita

causaicamanmi chashna charin” nijurcami.