Psalms 31 - Quichua Imbabura Bible

Diosta yariashpa causajushcatami villashcaCandajcunata mandaj candachijuchun, David rurashca Salmomi.

1Mandaj Dioslla, canda yariashpami causajurcani.

Ñuca pandachi tucujuchunga, ima horapash

ama saquihuaichu.

Imatapash cashcatapacha rurashpa cacharichihuayari.

2Aliguta uyashpa, uchalla cacharichihuayari.

Ñuca shinlli, jatun Rumishna capairi.

Ñuca quishpirina shinlli torreshna capairi.

3Canmi, ñucapaca jatun Rumishna,

shinlli jatun huasishna capangui.

Cambaj shutimandami ñucataca,

cambaj ñambi cuidashpa pushahuangui.

4Ñuca urmachun, pacalla churashca

linllimandaca llujchihuayari.

Canmi, ñuca pacajuna capangui.

5Ñuca espiritutaca, cambaj maquipimi mingapani.

Na llullaj Mandaj Taita Dioslla,

canmi ñucataca quishpichihuarcangui.

6Napash imata rurai ushaj, yanga

dioscunata shuyajcunataca millanayachinimi.

Ashtahuangarin ñucaca, Mandaj Diostami shuyajurcani.

7Ñuca llaquilla cajta can ricushcamandami,

can llaquipi ninanda cushijujusha.

Ñuca ninan llaquihuan cai horascunami,

ñuca almataca rijsihuarcangui.

8Ñucataca, chai fiñajpaj maquipica,

na churahuarcanguichu.

Pipash na fiñachina pushtupimi shayachihuarcangui.

9Mandaj Dioslla, ninan llaquipimari

cani, ñucataca llaquihuayari.

Cai llaquihuanga ñuca ñavipash,

ñuca almapash, cuerpopash tucurishcamari.

10Ñuca causaica, nanaihuanmi tucurishpa catijun.

Aij nijuna ñuca huatacunapash,

tucurishpami catijun.

Jatun nalicunata ñuca rurashcamandami,

ñuca ushaicunapash tucurishpa catijun.

Ñuca tullucunapash tucurishcami.

11Ñucata tucui fiñajcunapaca,

asishpa ricunami cani.

Ñuca ladolla causajcunapaca, ashtahuan asinami cani.

Ñuca rijsishcacunapaca, manllarinayaimi cani.

Ñucata canllapi ricushpaca, pacajungapajmi calpanajun.

12Ñucaca, paicunapaj shungupica,

huañushcashnami cungai tucushcami.

Faquirishca vasoshnami tucushcani.

13Taucacuna nalicachinajujtami uyani.

Maita purijpipash, manllaimi japihuan.

Tandanajushpa ñucata fiñashpa parlanajushpaca,

causaita quichungapajpashmi yarinajun.

14Ashtahuangarin ñucaca, canda

yariashpami causajuni, Mandaj Dioslla.

Ñucaca: “Canmi, ñuca Taita Dios cangui” nijunimi.

15Ñuca causajui huatacunaca, cambaj maquipimi.

Ñucata fiñajcunapaj maquimanda, ñucata catiriashpa

llaquichij runacunamandapash cacharichihuayari.

16Canda servij ñucataca, cambaj ñavihuan

punchayachihuayari.

Can llaquij cashcamandaca quishpichihuayari.

17Mandaj Dioslla, canda mañashcamandaca,

ñuca pingai tucuchunga ama saquihuaichu.

Canda na manllajcunaca, pingai tucuchunlla

Seolpica, upacuna cachunlla.

18Llullaj shimicunaca, upaman tigrachun.

Imatapash cashcatapacha rurajtaca,

shinlli shimicunahuanmi riman.

Jariyashpa yangapi churashpami riman.

19¡Cambaj juyaica jatunmari!

Chaitaca, canda manllajcunamanmi alichishcangui.

Huañuna aichayu runacunapaj ñaupajpimi,

chai juyaitaca canda shuyajcunaman ricuchishcangui.

20Ñucata llujchingapaj runacuna pacalla

jatarijpipash, cambaj ñaupajpimi pacalla

pushtupi churahuangui.

Fiñanajuipi churaj jallumandapash,

jatun carpa ucupimi churahuangui.

21Mandaj Diosca, alicachi tucushca cachun.

Paica, muyundi jatun pircahuan pueblopica,

ñucata llaquishpami ninan juyaillacunata rurarca.

22Ñucaca, manllaihuan musparishpami:

“Cambaj ñaupajmandaca, anchuchi

tucushcamari cani” yajurcani.

Ashtahuangarin ninanda canda caparishpa

mañajujtaca uyahuarcanguimi.

23Mandaj Diospajlla causaj tucui

cangunaca, paita juyaichiyari.

Paita cazujcunatami, Mandaj Diosca huacaichin.

Ashtahuangarin jariyashpa imatapash

rurajcunamanmi, ashtaca llaquicunata cun.

24Mandaj Diosta tucui shuyajcunaca,

shinlli tucuichi.

Cangunapaj shungupipash, cushijuita japichi.