1Moisesca, Moab llacta pambacunamandaca, Nebo shuti urcuman vichai rishpami, Jericó shuti pueblo chimba purapi tiaj Pisga shuti urcuman rirca. Mandaj Diosca, tucui Galaad llactatami, Dan aillupaj llactacaman ricuchirca.
2Neftalí aillupaj tucuilla llactata, Efraín aillupaj, Manasés aillupaj tucuilla llactacunata, Judá aillupaj tucuilla llactatapashmi, indi huashajuj lado mama cuchacaman ricuchirca.
3Shinallata Neguev pambatapash, Jordán yacu pugru pambatapash, palmera quirucuna tiaj Jericó pambatapash, Zoar shuti pueblocamanmi ricuchirca.
4Chai tucuita ricuchijushpami Mandaj Diosca, cashna nirca:
“Abrahamman, Isaacman, Jacobomambash carashami nishpa juramentushca llactaca, cai llactami. Paicunamanmi: ‘Cangunapaj miraicunamanmi carasha’ nishpa juramenturcani. Cambaj ñavihuambacha ricuchunllami saquini. Ashtahuangarin chaiman chimbaitaca, na ushanguichu” nircami.
5Chai jipami, Mandaj Diosta servij Moisesca, Mandaj Dios imashna nishcashnallata, Moab llactapi huañurca.
6Paitaca, Moab llactapillatami, Bet-peor shuti pueblo chimba purapi tiaj, pugru pambapi pambarca. Moisesta maipi pambashcataca, cunangaman pipash na yachanllu.
7Moisesca, patsaj ishcai chunga huatata charishpami huañurca. Paipaj ñavica, ima horapash na amsayarcachu. Paica, ali shinllipachami carca.
8Israelcunaca, Moisés huañushcamandaca, quimsa chunga punllacamanmi, Moab pambacunapi huacanajurca. Shinami, huañui tiajpi imashna huacan cashcashnallata, Moisés huañushcamanda ninanda llaquirishpa, huacashpa pactachirca.
9Nun shuti runapaj churi Josueca, paipaj umapi Moisespaj maquita churajpimi, ali yachaita cuj espirituhuan junda tucushpa, alipacha yachajushca tucurca. Chaimandami israelcunaca, Mandaj Dios imashna Moisesta mandashcashnallata, Josuetapash cazunajurca.
10Israel llactapica, Moisés runashna shuj villaj runaca, ima horapash na tiarcachu. Mandaj Diosca, Moisesta rijsishcamandami, ñavi ñavi rimajurca.
11Tucui ricuchinacunata, jatun manllarinacunata, Egipto llactapi rurachun Mandaj Dios cachajpi Moisés rurashcashnaca, pipash na rurarcachu. Chaicunataca, Faraonbaj ñaupajpi, tucui paita servijcunapaj ñaupajpi, paipaj tucui chai llactapimi chashna rurajurca.
12Moisesca, ninan ushaita charishpami, jatun manllarinacunata, manllanayai ruranacunatapash, tucuilla israelcuna ricujta rurajurca.
Who We AreWhat We EelieveWhat We Do
2025 by iamachristian.org,Inc All rights reserved.
