AMÓS 6 - Quichua Imbabura Bible

Israelcunata tucuchinatami villajun

1Sion shuti pueblopi cushijushpa samajcunalla, Samaria urcupi imatapash na manllashpa causajcunalla, ¡aij imachari tucunguichi! Cangunaca, llacta puracunapica alicachi tucushcacuna, mandajcunami canguichi. Chaimandami israelcunaca, cangunapajmanlla shamunajun.

2Cangunaca, Calne shuti puebloman yalishpa ricugrichi. Chaimandaca, Hamat shuti jatun pueblomambash ringuichilla. Chai jipaca, filisteocuna causanajuj Gad shuti puebloman urai ringuichi. ¿Chai pueblocunachu cangunapaj llactacunatapash yali ali, na cashpaca chai llactacunachu yali jatun? Chaita ricugrichi.

3Llaqui punllacuna ama ucha chayamuchun caruyachingapaj munajcunalla, cangunaca nalita rurajcunahuan tandanajushpami tianajunguichi.

4Paicunaca, marfilta churashpa rurashca camacunapimi puñunajun. Paicunapaj camacunapimi samanajun. Paicunaca, llamacunamanda maltun jari llamacunata, virayachinajuj animalcunamandaca, maltun shicucunatami micunajun.

5Gaitata tocajpipash, maitapashmi candanajun. Ima tocanacunata tocashpapash, Davidshnami shuj mushujta tocanajunchi yashpami tocanajun.

6Vinotapash, jatun tastacunapimi ufianajun. Shinallata ninan valishca, mishquillagu ashnajuj jambicunatami javirinajun. Josepaj miraicuna llaquita apanajujpipash, na llaquirinllu.

7Cunanga, chashnamandami prezu rij puramandaca, cangunara pundapi ringuichi. Ima munashcata rurashpa cushijujcunapajpash, jatun llaquica ñami chayamugrijun.

8Mandaj Jatun Diosca, paipaj causaimandallata juramentushpami, cashna nirca: Tucuita Mandaj Jatun Diosca, cashnami nin: “Jacobopaj miraicunataca, yapa jariyashcacuna cajpimi, na ricunayan. Mandashpa tiajuna paicunapaj huasicunatapash millanayachinimi. Chaimandami chai pueblotaca, chaipi imalla tiajcunandi, paicunata fiñajcunapaj maquipi churasha” ninmi.

9Chai punllapica, cashnami tucunga: Chunga runacuna shuj huasipi quedashpapash, huañungami.

10Chai huañushcacunataca, shuj aillullami tucuicunata tandachinga. Shina tandachishpaca, tullucunata huasimanda llujchishpa shitangapajmi, tucuillata rupachinga. Chai huasi ucu juchucunapi tiajtaca: “¿Nachu maijambash canhuan quedarca?” nishpami tapunga. Shina nijpica chai runaca, cashnami ninga: “Na pipash quedarcachu, ashtahuangarin upalla cai. Mandaj Diospaj shutitaca, na rimai ushashpami causanajunchi” ningami.

11Ricuichi, Mandaj Diosmi mandanga. Paica, jatun huasicunapaj, uchilla huasicunapaj patacunatapash jatun chijtacunata rurashpa utujushpami saquinga.

12¿Caballocunaca, jaca rumicunata calpai ushangachu? Chai rumicunapica, ¿huagrahuan yapui ushangachu? ¿Imashpata cangunaca, aliguta ricushpa mandanataca, venenomanshna tigrachircanguichi? ¿Imashpata imatapash cashcatapacha rurashpa ricuchinataca, jayaj ajenjomanshna tigrachircanguichi?

13Yangamanda cushijuj cangunaca: “Mandanatapash, ñucanchi ushaimandami charinchi” ninguichimi.

14Shina cashcamanda israelcunalla, uyaichi. Tucuita Mandaj Taita Diosca, cashnami nin: “Ñucaca, cangunata llaquichijuchunga, shuj llactatami jatarichisha. Chai llactaca, Hamat shuti puebloman yaicuna ladomandaca, Arabá llactapi tiaj jatun larca yacu ladocamanmi llaquichinga” ninmi.