EZEQUIEL 44 - Quichua Imbabura Bible

1Shinallata Diospajlla huasi canlla pungumanmi, cutin tigrachihuarca. Chai punguca, indi llujshimuj ladomanmi tiajurca. Chai punguca, vichashcami carca.

2Mandaj Diosca, cashnami nihuarca: “Cai pungutaca, israelcunata Mandaj Taita Dios yaicushcamandami, pipash na yaicui ushanga, pipash na pascai ushanga. Chaimandami, cai punguca vichariajungalla.

3Shuj mandajmi, pai mandaj cashcamandaca, Mandaj Diospaj tandata micungapaj chaipi tiaringa. Paica, corredor punguta yaicushpaca, chaitallatami llujshinga” nihuarcami.

4Chai jipami, Diospaj huasi chimba purapi tiaj jahua lado punguman pushahuarca. Chaipimi Mandaj Diospaj huasipica, pai Mandaj Diospaj punchapamba jundashcata ricurcani. Chaita ricushpaca, alpaman chayajtami cumurircani.

5Chaipimi Mandaj Diosca, cashna nihuarca: “Huañuna aichayu runa. Aliguta uyashpa, cambaj ñavihuambacha ricui. Mandaj Dios ñuca huasipi imatalla ruranamanda tucui mandashcacunata canman villashcatapash, mandashca shimicunatapash, cambaj rinrihuambacha aliguta uyangui. Diospajlla huasiman yaicunacunatapash, Diospajlla huasimanda llujshinacunatapash aliguta ricungui.

6Chai na cazuj israelcunaman, cashna nishpa villangui: Mandaj Jatun Diosca, cashnami nin: ‘Israelcunalla, chai tucui millanayaicunataca, ña chashnalla saquichi.

7Cangunaca shungupipash, aichapipash, circuncisión nishcata na rurai tucushca, caru llactamanda runacunatami, ñuca huasiman pushashpa, ñuca huasitaca mapayachircanguichi. Cangunaca viratapash, yahuartapashmi, ñucaman cuhuarcanguichi. Ñucahuan ari ninajushcata yangapi churashpami, cangunaca tucui millanayaicunata rurarcanguichi.

8Shinallata ima cashpapash ñucapajlla cashcacunata cuidachun mandashcatapash, na pactachircanguichica. Ashtahuangarin ñucapajlla huasipi cuidachun, ñuca mandashcacunata pactachinajuchunga, shuj llactamanda runacunatami churarcanguichi’ ninmi nishpa villai” nihuarcami.

9Mandaj Jatun Diosca, cashnatapashmi nijurca: “Israel puracunapi causanajuj shuj llactamanda runacunaca, shungupipash, aichapipash circuncisionda na rurashcacunaca, napacha ñuca huasiman yaicungachu.

10Shinallata israelcuna, paicunapaj yanga dioscunata mañashpa ñucamanda caruyajta ricushpaca, levitacunapashmi ñucamanda anchurinajurca. Chashna nalita rurashcamandaca, paicunapash llaquichi tucunajungami.

11Paicunaca, ñuca huasipica pungucunapi cuidashpa, imatapash rurashpallami causanajunga. Paicunami, Diosman cushpa tucuilla rupachina animalcunatapash, israelcuna ñucaman cushca animalcunatapash huañuchinajunga. Israelcuna imatapash rurachun nishcatami rurashpa servinajunga.

12Paicunaca, paicunapaj yanga dioscunapaj ñaupajpi servishpami, israelcunapaca nitijachinshna pandachishpa, jatun nalita rurachingapajlla carca. Mandaj Jatun Diosca, shina nalita rurachishcamandami llaquichi tucunga nishpami, ñuca maquita alsashpa juramenturcani” ninmi.

13“Chai levitacunaca, na ñucata servij curacunashna ñucata servingapaj shamungachu. Imalla ñucapaj cajtapash, imatalla ñucapaj shicanyachishcatapash, napacha tacari ushangachu. Ashtahuangarin nalicunata rurashcamandaca, pingaichi tucungapachami.

14Paicunataca, ñuca huasita cuidaj soldadocuna cachun, ñuca huasipi imatalla servina cajpipash, tucui chaitalla rurajcuna cachunmi, mingashpa chaipi churasha.

15Ashtahuangarin Sadoc shuti curapaj mirai levita curacunaca, ñucamanda israelcuna anchurijpipash, paicunaca na anchurishpami, ñucapajlla huasipi imatalla rurachun mandashcataca pactachinajurca. Paicunami, ñucata servingapaj ñuca ñaupajman quimirinajunga. Shinallata ñucaman cushca viratapash, yahuartapashmi, ñuca ñaupajpi cunajunga. Mandaj Jatun Dios ñucami, chashna nini.

16Paicunami, ñucapajlla huasimambash yaicunga. Ñuca meza ladoman quimirishpami servinajunga. Ñuca mandashcacunatapash pactachinajungallami.

17Ñuca huasi ucu patioman yaicungapajpash, ñucapajlla huasi ucupi servingapajpash, lino churajunatami churajunajunga. Milma churajunataca, na churajunajungachu.

18Umapica, lino turbante nishcacunatami churajunajunga. Shinallata linota rurashca calzoncillotami churajunajunga. Cinturaspica, imapash sudachinallahuanga, na chumbiliringachu.

19Diospaj huasimanda canlla patiopi gentecunapajman llujchishpaca, ñucata servingapaj churajushca churajunataca llujchinami. Chai churajunacunataca, Diospajlla huasipi tiaj uchilla ucucunapimi alichinajunga. Chai churajunacunahuan llujshishpa, canllapi gentecunata ama ñucapajlla cachun rurangapajmi, shuj churajunahuan llujshina.

20Umataca, ama lluchu lluchuta rutuchinajuchun, ajchatapash ama viñachinajuchun. Ashtahuangarin ashatalla ruturinajuchun.

21Ñuca huasi ucu patioman yaicungapaca, maijan cura cashpapash, ama vinota ufiachun.

22Shinallata sapalla huarmitapash, cusa jichushcatapash ama cazarachun. Ashtahuangarin Israel aillu puracunamanda, jarihuan nara tacarishca cuitsata cashpa, na cashpaca cura huañujpi sapalla quedashca huarmita cazarachun.

23Shinallata ñuca agllashcacunataca, Diospajlla canatapash, na Diospajlla canatapash shicanyachinatami yachachinga. Shinallata imalla mapa cajtapash, imalla na mapa cajtapash agllanatami yachachinga.

24Fiñanajushcacuna tiajpica, chai curacunami aliguta ricushpa alichinajunga. Aliguta ricushpa alichinajuchun ñuca mandashcashnallatami, aliguta ricushpa alichinajunga. Tucui jatun fiesta punllacunapica, ñuca mandashcacunata, imata rurachun ñuca mandashcacunata pactachishpami, ñuca samana punllacunatapash, ñucapajlla cachun shicanyachinajunga.

25Ama mapayangapaca, huañushca runapajmambash, na quimiringachu. Ashtahuangarin taita cajpi, mama cajpipash, na cashpaca churi cajpi, ushi cajpipash, na cashpaca huauqui cajpi, na cazarashca pani huañujpica, tacarishpa mapayai ushangami.

26Mapayashcamanda armashpa mapa illaj quedashcamandaca, canchis punllata shuyachun.

27Ñucata servingapaj ñucapajlla huasiman yaicuna huasi ucu patioman yaicui punllapica, juchamanda animalta ñucaman cuchun. Mandaj Jatun Dios ñucami, chashna nini.

28Shina rurajpimi, paicunapaj cachun paicuna japina alpa tianga. Ñucami paicunapaj cachun, paicuna japina alpashna cani. Ashtahuangarin Israel llactapi tiaj alpacunataca, na cunachu canguichi. Ñucami, paicuna causana alpashna cani.

29Chai curacunami, ñucaman imaguta carashcacunatapash, juchamanda animalta cushcatapash, ñucaman animalta cushpa huañuchishcatapash micunajunga. Tucuilla israelcuna imatapash ñucapajlla cachun carashcacunaca, paicunapajmi canga.

30Shinallata punda fucushca tucui granocunapash, ñucaman imatalla tucui carashcacunapash, tucuillami curacunapaj canga. Cangunapaj huasicunapi bendiciai tucushca cachunga, canguna masai callarishca masatapashmi, curaman cuna canguichi.

31Curacunaca, paimanda huañushca animalcunatapash, shuj animalcuna huañuchishca animalcunatapash na micungachu. Chaicunataca, alasyu animalcuna cajpipash, shuj animalcuna cajpipash na micungachu.