ROMANOS 15 - Quichua Imbabura Bible

1Shina cajpica ñucanchi shinlli crijcunaca, nara ali yachajuj crijcuna imata nalita rurajpipash, ricunami canchi. Na ñucanchilla cushijunachu canchi.

2Cumba runagupash ali crishpa cushijuchunmi, ñucanchica tucuicuna paicunamambash aliguta rurana canchi.

3Cristopash na pailla cushijushpa causajurcachu. Ashtahuangarin escribishcapi cashna nijunshnallatami pactachirca: “Canda nalicachishpa rimajcuna ima nalita rimashcapash, ñucatami nalicachishpa rimahuarca” nijunmi.

4Ñucanchi yachajuchunmi, Diosca ñaupallata escribichishca. Chai escribishca Shimicunami, na ñapash fiñarishpa causanata ñucanchiman yachachijun. Shinamandami, japigrinata yariajlla shuyanajunchi.

5Na ñapash fiñarij, cushijuita caraj Taita Diosllata canguna purapipash, Cristo Jesús munashcashnallata, shujllashnalla yarishpa causanata carachun.

6Shujlla shimi rimanshna, ñucanchi Apunchi Jesucristopaj Taita Diosta ninanda alicachinajuchun, chashna carachun.

Na israelcunapash quishpirichunmi, ali villaita villajushca

7Shina cashcamandaca, Taita Diosta punchapambagumi cangui ninajuchun. Cristo ñucanchita chasquishcashnallatami, cangunapash caishuj chaishuj chasquirina canguichi.

8Cashna nishpami villajuni: Cristo Jesusca, circuncisión nishcata rurashcacunata servingapajmi shamurca. Shina shamushpaca, ñaupa taitacunaman Taita Dios carashami nishcataca, na llullashpa pactachishcatami ricuchimurca.

9Na israelcunapash, paicunata Taita Dios llaquishcamanda, punchapambagumi cangui ninajuchunmi, Jesusca shamurca. Escribishcapica cashnami nijun:

“Chaimandami, na israelcunapaj chaupipi canmandaca villajusha.

Cambaj shutitapash alicachishpami candajusha” nijunmi.

10Shinallata cutimbash cashnami nijun:

“Shuj llactacunapi causajcunapash,

Dios agllashcacunahuan cushijunguichi” nijunmi.

11Cashnatapashmi cutin nijun:

“Tucui llactapi causajcuna,

Jatun Diostaca ninanda alicachinguichi.

Tucuicunallata, paita jatunyachinguichi” nijunmi.

12Shinallata Isaiaspash, cutimbashmi cashna nijun:

“Isaí shuti taitapaj miraimandami,

tucui llactapi causajcunata mandangapaj jataringa.

Tucui na israelcunami, paita yariashpa shuyanajunga” nijunmi.

13Taita Diosllatami, japigrinata yariajlla shuyachun yarichimujun. Canguna paita crishcamandaca cushijuita, casilla ali causaitapash, paillata ninanda carachunmi munani. Diospaj jucha illaj Espíritu ushaita carajujpimi, japigrinataca yariajlla shuyanajunguichi.

14Shina cajpipash ñuca juyashca huauquicuna, panicuna, cangunamandaca aliguta yachanipachani. Canguna purapi ninanda llaquirishpa, alipacha causanata yachajushcatami yachani. Shina cashpami shujmanda, shujmanda yarichirishpa causanguichi.

15Huauquicuna, panicuna, ashtahuangarin huaquin shimicunataca shinllita rimashpami escribimuni. Taita Dios ñucaman ninan juyaita carajujpi cangunata yarichingapajmi, cashna cachamuni.

16Ñucaca, na israelcunaman villashpami, Jesucristopajta rurajuni. Na israelcunaca, Diosman animalta carashpa rupachishcashna, Diospaj jucha illaj Espiritumandaca, Diospajlla causanajuchunmi, Taita Diospaj ali villaita villajuni.

17Taita Diospajta rurashcamandaca, Cristo Jesusta crishcamandami ninanda cushijuni.

18Cristo ñucata villachun na mandajpica, ñucamandalla imata villaitapash na ushaimanllu. Imagutapash ñuca rurashpandi villajujpica, na israelcunapash paita crishpa cazunajuchunmi villajuni.

19Taita Diospaj Espíritu ushaita carajpi, jatun manllarinacunata rurashpa, imagutapash juyaillaguta rurashpami ricuchijurcani. Cristomanda ali villaita villashpaca, Jerusalenmanda callarishpa, tucui llactacunapipash villashpandimi, Ilírico shuti llactacaman chayarcani.

20Chashnami, Cristopaj shutita nara uyashca llactacunapipash, ali villaita ashtahuan shinllipacha yarishpa villajurcani. Ña shujcuna villai callarishca llactacunapica, na villarcanichu.

21Ashtahuangarin escribichishca Shimipi cashna nijunshnami rurarcani:

“Paimanda ima horapash villajta nara uyajcunami ricunajunga.

Paimanda ima horapash nara uyajcunarami yachanajunga” nijunmi.

Roma pueblomanmi, Pabloca ringapaj munashca

22Shina villajushpapash, cutin cutin cangunata ricungapaj shamusha yajushpapash, na shamui ushashcanichu.

23Ashtahuangarin cunanga, ñami cai llactacunapi villaita tucuchircani. Tauca huatacunatami, cangunata ricuj shamungapaj munarcani.

24España llactaman rijushpaca, cangunata ricushpandi yalingapajmi shamusha. Chaipi cangunahuan cushijushpa tiashca jipaca, chaimandaca cangunami imashnallapash ayudashpa, Españaman cachahuanguichi.

25Ashtahuangarin cunanga Jerusalenmanmi, Diospajlla causajcunata ayudangapaj rijuni.

26Macedonia shuti, Acaya shuti llactacunapi causanajuj crijcunaca, Jerusalenbi, Diospajlla causajcuna purapi imagutapash na charijcunaman carangapajmi, aligutapacha yarinajushca.

27Chashna ruranaca, paicunapaj ali cajpimi, paicunaman caranatapacha charirca. Israelcunaman aliguta Dios carajpimi, na israelcunapash japinajunga. Chaimandami, cutin paicunaman imagu illajpipash, caranata charin.

28Shinamandami, tandachishca culquita alichishpa paicunaman saquigrishca jipaca, cangunata ricushpandi Españaman yalisha.

29Cangunapajman ñuca shamushpaca, Cristomanda ali villai ninanda caramujujtaca, cangunapash charichun villajungapajmi shamusha. Chaitaca, aligutami yachani.

30Shina cajpipash huauquicuna, panicuna, ñucanchi Apunchi Jesucristomanda, Diospaj Espíritu ninan juyaita caramujushcamandaca, Taita Diosta ninanda ñucamandapash mañapanguichi nipanimi.

31Judea llactapi causaj na cazujcuna, ama imatapash ñucata rurachun mañapanguichi. Shinallata ñuca saquigringapaj culquitapash, Jerusalenbi Diospajlla causajcunaca aliguta chasquishca cachun mañapanguichi nipanimi.

32Taita Dios munajpica, cangunapajman cushijushpa chayamuchumbash mañapanguichi. Chayamushpaca, cangunahuan aligutami samasha.

33Casilla ali causaita caraj Taita Dios tucui cangunahuan cachun ninimi. Shina cachun.