Psalms 63 - Quichua Imbabura Bible

Almapaj cushijunaca Taita Diosllami(2 Sam. 15:23,28)Judá llacta jichushca pambapi cashpa, David rurashca Salmomi.

1Taita Dioslla, canga ñuca Taita Diosmi cangui.

Tutamandatami candaca mascasha.

Ñuca almaca, yacunayachinshnami candaca mascan.

Ñuca aichapash, candami shuyan.

Yacu illaj chaquishca alpapimi cani.

2Cambajlla huasipi ricushcashnallatami,

cambaj ushaitapash, can punchapamba

cajtapash ricungapaj munani.

3Can llaquijpi causanami,

cai causaitaca ashtahuan yali ali.

Ñuca shimica, candami alicachinga.

4Ñuca causaipica, cashnami canda alicachisha.

Cambaj shutipimi, ñuca maquitaca vichai churasha.

5Ñuca almaca, tullu ñutujuta, vira

aichata micushcashnami cushijunga.

Ñuca shimica, ninanda cushijushca

shimicunahuanmi, canda alicachinga.

6Ñuca camapipash, canda yarishpami alicachisha.

Tutapash, cuidangapaj yaicuna horascunapimi,

candaca aligutapacha yarishpa alicachisha.

7Canga, ñucata ayudajujpimi,

cambaj alas llandu ucupi cushijusha.

8Ñuca almaca, cambi llutarishcashnami.

Cambaj ali lado maquihuanmi shinllichihuarcangui.

9Ashtahuangarin ñuca causaita tucuchingapaj

mascajcunaca, alpa ucu pushtucunamanmi urmanga.

10Paicunataca, espadahuanmi tucuchinajunga.

Paicunaca, chacal nishca animalcuna micunami canga.

11Ashtahuangarin jatun mandajca,

Taita Dioshuanmi cushijunga.

Maijan cashpapash paipaj shutipi

juramentujmi, alicachi tucunga.

Ashtahuangarin llullata rimajcunapaj

shimica, vichashcami canga.