ISAÍAS 19 - Quichua Imbabura Bible

Egipto llactata llaquichinatami villashca

1Egipto llactata llaquichinata Dios villashcatami, cashna villajurca: Ricuichi, Mandaj Diosca ñapash shamujuj fuyupi tiarishpami, Egipto llactaman yaicunga. Shina yaicujpimi, chai llactapi tiaj yanga dioscunaca, paipaj ñaupajpi chujchunga. Chai Egipto llacta runacunapash, paicunapaj shungupi ninanda manllarishpami, imatapash na rurai ushanajunga.

2“Egipto llactapi causajcunataca, pai purallata macanajuchunmi, yuyaita cusha. Huauqui purallatami, tucuicuna macanajunga. Cumba puracunami macanajunga. Shuj pueblopi causajcunaca, caishuj pueblopi causajcunahuan, shuj llactata mandajpash, caishuj llactata mandajhuanmi macanajunga.

3Shinamandami, Egiptopi causajcunapaj yuyaipash, yangalla tucushpa, paicunapillata tucuringa. Paicuna parlarishcatapash tucuchishami. Shina rurajpica, paicunapaj rurashcalla dioscunata, yumbucunata, huañushcacunahuan rimajcunata, yachajcunatami tapunajunga.

4Egiptopi causajcunataca, millai amopaj maquipimi churasha. Ninanda llaquichij jatun mandajmi, paicunataca shinllitapacha mandanga” ninmi tucuita Mandaj Jatun Diosca.

5Mama cucha yacucunapash ucuyangami. Jatun yacupash, chaquishpami tucuringa.

6Tucui jatun yacucunami chaquinga. Pugyucunamanda llujshishpa rijuj yacucunapashmi chaquinga. Chaipica sucuscunapash, totoracunapash cuchui tucungami.

7Jatun yacu manñapi tiaj michina pambacunapash, chai yacu manñapi tarpushca chagracunapash, tucuilla chaquishpa tucurishpami, ashtahuanga na tianga.

8Pijita japijcunapash, llaquillami tucunga. Jatun yacucunapi anzuelohuan pijita japijcunapash, ninandami llaquirinajunga. Linllicunahuan japijcunapash, ninandami llaquirinajunga.

9Ali lino puchata puchajcunapash, linllicunata rurajcunapash, imata ruraitapash na ushanajungachu.

10Paicunapaj linllicunaca, tucuillami liquiringa. Pijicunata viñachingapaj rurajcunapash, tucuillami llaquirinajunga.

11Zoán shuti pueblota mandajcunaca, juizu illajcunapachami. Alipacha yachajushcacuna, Faraonman ali yuyaita cujcuna yuyaita cushcapash, yangallami tucushca. ¿Imashnashi cangunaca, Faraonmanga: “Ñucanchica, ninan yachajushcacunapaj churicunami canchi. Punda jatun mandajcunapaj miraicunami canchi” ninguichi?

12Egipto llactata imatalla ruranatami, Mandaj Diosca yarijushca. Chaita cunan canman villashpa, yachaj chayachingapaca, cambaj ninan yachajushca runacunaca, ¿cunanga maipitayari?

13Zoán shuti pueblota mandajcunaca, yangallami tucushca. Menfis shuti pueblota mandajcunaca, paicunallatami umachirishca. Paicunaca, paicunapaj familiacunapaca, huasipaj callari rumishna cashpapash, Egipto llactataca umachishpami, llaquipi churanajushca.

14Mandaj Diosca, paicunapaj chaupipica, muspayachij espiritutami chapushca. Chaimandami Egiptopi causajcunataca, machashca runa shungu tigrachishpa urmagrijujtanshna, paicuna imatalla ruranapi pandachinajurca.

15Egiptopi causajcunaca umashna cashpapash, chupashna cashpapash, palmera yura malquishna cashpapash, sucus yurashna cashpapash, imatapash na rurai ushangachu.

16Tucuita Mandaj Diosca, Egiptopi causajcunata fiñashpa llaquichingapajmi, paipaj jatun maquita chutanga. Paicunaca chai punllapica, huarmicunashnami ninandapacha manllarishpa, paipaj ñaupajpica chujchunga.

17Judá llactapi causajcunaca, Egiptopi causajcunapaca, ninan manllarinami canga. Maijan cashpapash Judá llactapi causajcunata yarishpaca, tucuita Mandaj Dios paicunapaj llactata imatalla rurashapacha nishcata yarishpami manllarinajunga.

18Chai punllacunaca, Egipto llactapica, picha pueblocunapi causajcunami, Canaán llacta rimaita rimajcuna tianga. Paicunaca, tucuita Mandaj Diosta catingapajmi, ari nishpa juramentunajunga. Chai pueblocunamanda shujca, Herez shutimi canga.

19Chai punllacunapica, Egipto llacta chaupipica, Mandaj Diospaj shuj altarmi tianga. Egipto llactapaj lindero ladopica, Mandaj Diosta yarichij shuj rumi pircami tianga.

20Chaica, Egipto llactapi causajcunapaca, tucuita Mandaj Diosta yarichij shuj ricuchinami canga. Paicunata llaquichijcuna llaquichinajujpimi, Mandaj Diostaca caparishpa mañanajunga. Shina mañanajujpimi, chai llaquimanda llujchishpa quishpichij mandajta paica cachanga.

21Shinamandami Mandaj Diosca, Egiptopica rijsishca tucunga. Chai punllami, Egiptopi causajcunaca, Mandaj Diosta rijsinajunga. Shina rijsishpami, paiman animalcunata carashpa huañuchinajunga. Ima shuj caranacunatapashmi caranajunga. Mandaj Diosman imata rurangapaj, ari nishcataca pactachinajungami.

22Mandaj Diosca, Egiptopi causajcunataca chugrichingami. Shina chugrichishpapash, paillatami alichinga. Mandaj Diospajman paicuna tigrarijpica, Diospash paicunata llaquishpami alichinga.

23Chai punllacunapica, Egipto llactamandaca Asiria llactacamanmi, shuj ñan tianga. Asiriocunaca, Egiptomanmi yaicunajunga. Egiptopi causajcunaca, Asiria llactamanmi yaicunajunga. Egiptopi causajcunaca, asiriocunahuanmi Mandaj Diosta servinajunga.

24Chai punllacunapimi israelcunaca, Egiptopi causajcunahuan, Asiria llactapi causajcunahuan quimsa tucunga. Cai pachapi causajcuna bendiciai tucuchunmi, chashna canga.

25Tucuita Mandaj Diosmi, paicunataca cashna nishpa bendicianga: “Egiptopi causaj gentecunaca ñucapajmi, asiriocunapash ñuca maquihuan rurashcacunami. Israelcunacarin, ñucapajlla shicanyachishcami. Paicunatami bendiciani” ningami.