MARCOS 4 - Quichua Imbabura Bible

Tarpuj runahuan chimbapurashpami, Jesusca yachachishca(Mat. 13:1-23; Luc. 8:4-15)

1Jesusca, cutin cucha manñapi yachachijujpimi, ashtaca gentecuna paipajman tandanajumurca. Shinamandami, cuchapi tiajuj canoata japishpa Jesusca chaipi tiarirca. Chai gentecunaca, tucuillami cucha manñapi carca.

2Chaipimi Jesusca, ashtaca parlocunahuan chimbapurashpa yachachijurca. Paicunata yachachishpaca, cashnami nijurca:

3“Aliguta uyahuaichi. Shuj tarpuj runami, tarpungapaj llujshirca.

4Chai runa tarpujpica, huaquin muyucunaca ñambimi urmarca. Ñambi urmashca muyutaca, alasyu animalcunami shamushpa micurca.

5Shinallata huaquin muyucunaca, ashalla alpa tiaj rumilla alpapimi urmarca. Na jundu alpa cajpimi, ñapash viñarca.

6Ashtahuangarin uchilla sapita charishpami, ninanda indijpica, anguyashpa chaquirca.

7Shinallata huaquin muyucunaca, casha viñana chaupipimi urmarca. Cashacuna yalishpa viñashpa ismuchijpimi, imallapash na fucurca.

8Ashtahuangarin huaquin muyucunaca, ali alpapi urmashpami, juyailla llujshimushpa viñashpa, aliguta fucurca. Huaquingunaca shujmandallami quimsa chungata, huaquingunaca sucta chungata, huaquingunaca patsajta granurca” nijurcami.

9Jesusca, chashna nishpallami:

“Uyangapaj rinrita charishpaca, aliguta uyaichi” nirca.

10Gentecuna tucuilla rijpimi Jesusca, paipaj chunga ishcai yachajujcunandi, caishuj cumbashpa purijcunandi chaipi quedarca. Paicunami, imashpa Jesús chimbapurashpa parlashcacunata tapunajurca.

11Shina tapujpimi Jesusca, cashna nijurca:

—Taita Diosca, pai mandajuj llactagumandaca pipash na yachai ushashcatami cangunamanlla yachachin. Ashtahuangarin chaishuj gentecunataca, parlocunallahuan chimbapurashpami imatapash yachachijuni.

12Ricushpapash na ricushcashna cachun, uyashpapash na uyashcashna cachunmi, cashna yachachijuni. Paicuna yuyaita japishpa ama Diospajman tigrarichun, paicunapaj juchatapash Diosca ama cungachunmi, cashna yachachijuni— nijurcami.

13Jesusca, paita tapujcunatami cashna nijurca:

—Chimbapurashpa parlashcataca, ¿narachu cangunapash yachai ushanguichi? Shuj parlocunahuan chimbapurashpa yachachijpicarin, ¿imashnashi yachajui ushanguichi?

14Tarpuj runaca, Diospaj Shimita villaj runami.

15Ñambi urmashca huaquin muyucunaca, caicunami: Haquin gentecunaca, Diospaj Shimita villajujpica, paicunapaj shungupi tarpujpishnami uyanajun. Ashtahuangarin chai uyashcataca, Satanás shamushpami, ñapash cungachin.

16Shinallata rumilla alpapi urmashca muyucunaca, caicunami: Huaquin gentecunaca, Diospaj Shimita villajujpica, ninanda cushijushpami chasquin.

17Ashtahuangarin shina chasquishpapash, sapita na charij yurashna cashpami, ashacamanlla catinajun. Paicunaca, jatun llaquicuna japijpi, na cashpaca Diospaj Shimita catinajujpi catiriashpa llaquichijpica, nitijanshna pandanllami.

18Casha chaupipi urmashca muyucunaca, caicunami: Huaquin gentecunaca, Diospaj Shimita villajujpica, aligutami uyanajun.

19Shina uyashpapash, cai causaipajlla imatapash charingapajmi munanajun. Ña charishpapash, ashtahuan charingapaj munashpami, pandachi tucunajun. Diospaj Shimitaca, chai tucui munaicuna shamushpami cungachin. Shinamandami paicunaca, grano na fucunshnalla tucunajun.

20Ali alpapi tarpushca muyucunaca, caicunami: Huaquin gentecunaca, Diospaj Shimita uyashpami shungupi alichinajun. Shina cashpami huaquingunaca, shujlla muyumanda quimsa chungata fucunshna mirachin. Shujcunaca, sucta chungata fucunshnami mirachin. Ashtahuan shujcunaca, patsajta fucunshnami mirachin— nijurcami.

Michaman na llujchi tucuna imapash pacallacunaca, na tianllu nishcami(Luc. 8:16-18)

21Jesusca cashnatapashmi nirca: “¿Michataca cajón ucupi, na cashpaca cama ucupi churangapachu japichin? ¿Nachu candeleropi churangapaj japichin?

22Michaman na llujchi tucuna imapash pacallacunaca, na tianllu. Michaman na llujshichun, pacashcallapash na tianllu.

23Maijambash uyangapaj rinrita charishpaca, aliguta uyaichi” nircami.

24Jesusca cashnatapashmi nijurca: “Ñuca imata villajujtapash, aliguta uyashpa yaringuichi. Shujcunaman canguna imashna carajpipash, chashnallatami Diosca cangunamambash caranga. Ñuca villajujta canguna uyashpa cazujpicarin, ashtahuanmi caranga.

25Ashtacata charijcunamanmi, ashtahuan caranga. Ashtahuangarin na charijpica, ashaguta charishcatapash quichungami” nijurcami.

Tarpujpi na viñajuj muyuhuan chimbapurashpami parlashca

26Jesusca, ashtahuan cashnatapash nircarami: “Taita Dios mandajujca, shuj runa paipaj alpapi muyuta tarpujpi viñajunshnami.

27Chai tarpuj runaca, tutayajpica puñushpa, punllayajpica jatarishpami causan. Ashtahuangarin chai tarpushca muyu llujshishpaca, chai runaca na yachajtami, viñashpa viñashpa catin.

28Chai muyutaca, alpami viñachin. Pundaca, jihuashnallami llujshimun. Shina viñajpica, espigami llujshimun. Chai jipaca, caspagu tucushpa granogumi jundan.

29Ña fucujpica, granocunata tandachina punllacuna chayamujpimi, cuchungapaj rinlla” nijurcami.

Mostaza muyuhuan chimbapurashpami parlashca(Mat. 13:31-32; Luc. 13:18-19)

30Jesusca, cashnatapashmi nijurca: “Taita Dios mandajujtaca, ¿imahuanda chimbapurashun, na cashpaca ima parlohuan chimbapurashpata, chaitaca yarishunchi?

31Diosca, mostaza nishca muyuguta, shuj runa tarpushcatashnami mandajun. Chai muyuguca, cai pachapi tucui tiashca muyucunatapash yali jamzi jamzigumi.

32Ashtahuangarin chai muyuta tarpujpi viñashpaca, tucui jihuatapash yali jatundami viñan. Chashna viñashpa malquicunapash jundajpimi, alasyu animalcuna llanduna tucun” nijurcami.

Imashpa chimbapurana parlocunahuan Jesús yachachijushcatami villajun(Mat. 13:34-35)

33Jesusca chimbapurashpa, tauca parlocunahuanmi Diospaj Shimitaca yachachijurca. Gentecuna yachajui ushangacamanllami parlajurca.

34Paicunataca, chimbapurana parlocunahuanllami Jesusca, imagutapash yachachijurca. Paipaj yachajujcunamanllami, imashpa chashna parlashcatapash tucuita yachachijurca.

Ninan huairahuan cucha jatarijujtami, Jesusca casillata rurashca(Mat. 8:23-27; Luc. 8:22-25)

35Chai punllallata ña tutayagrijujpimi, paipaj yachajujcunataca Jesusca: “Cuchata chimbashunchi” nirca.

36Shina nijpimi, tucuilla gentecunata cayacaman nishpa paipaj yachajujcunaca, Jesús tiajuj canoallapita tiarishpa rinajurca. Huaquingunaca, shuj canoacunapi tiarishpami, Jesustaca cumbashpa rinajurca.

37Ña rinajujpica, ninan huaira ñapash jatarishpami, yacutaca caiman chaiman shitajurca. Shinamandami, canoaman jundamui callarijpi, canoaca ña huashajugrijurca.

38Jesusca, huashaman saunata churashpami, chai canoa ucupi puñujurca. Shina puñujujpimi, rijcharishpa cashna ninajurca:

—¡Ñucanchica, ñami huashajushpa huañugrinchi! Ñucanchitaca, ¿nachu llaquingui, Yachachij?— ninajurcami.

39Shina nijpimi Jesús jatarishpaca, huairatapash cuchatapash jarcashpa rimashpa, cashna nirca:

—Upalla, casilla caichi— nircami.

Shina nijpimi huairapash chulunyashpa, cuchapash casilla tucurca.

40Chashna tucujpimi Jesusca, paipaj yachajujcunata cashna nirca:

—¿Imashpata cashna ninanda manllaringuichi? ¿Imashpata ñucataca, na crihuanguichi?— nircami.

41Shina nijpimi ninanda manllarishpa, caishuj chaishuj parlarishpa cashna ninajurca:

—Cai runataca, ¿ima cajpita huairapash, cuchapash cazun?— ninajurcami.

Gadara shuti llactapica, aya jundashca runatami Jesusca alichishca(Mat. 8:28-34; Luc. 8:26-39)