EZEQUIEL 17 - Quichua Imbabura Bible

Jatun angacunamanda, uvasmanda chimbapurashpa parlashcami

1Mandaj Diosca, cai shimicunatami cashna nishpa villahuarca:

2“Huañuna aichayu runa. Shuj ricuchinata ricuchishpa, imahuambash chimbapurashpa parlanata israelcunaman alichingui.

3Chai jipaca, cashna villangui: Mandaj Jatun Diosca, cashnami nin: ‘Shuj jatun alasyu, tauca color pluma junda, jatumbacha angashnami, cedro quirupaj ñavita, Líbano shuti urcumanda apangapaj shamurca.

4Chai quirupaj ashtahuan ali ñavita fitishpaca, randishpa jatujcunapaj llactamanmi aparca. Chaitaca jatujcunapaj, randijcunapaj pueblopimi saquirca.

5Alpapi tarpushca muyutapash, alipacha alpapi tarpungapajmi aparca. Chai muyutaca, sauce quiruta tarpunshnami, ashtaca yacu manñapi tarpurca.

6Chai muyu viñashpaca, fanga jundashca, uchillalla uvas yurami tucurca. Paipaj malquicunaca, chai jatun angata chimba purami ricujurca. Chai yurapaj sapica, alpa ucupi cashpami, uvas yura tucushpaca, uchilla malquicuna viñarca.

7Shinallata jatun alascunata charij, plumasapa shuj jatun angashnapashmi tiarca. Chai jatun angashnapaj ladomanmi, uvas yura sapicunapash, malquicunapash chayajta viñarca. Chai uvas yurata tarpushca huachupi yacuta cacharichunmi, paipaj ladoman viñajurca.

8Chai uvas yurataca, malquisapa viñashpa, ali granota fucuchun, ali racu yura cachunmi, ashtaca yacu manñapi tiaj ali alpapi tarpushca carca’ ninmi ningui.

9Cashnatapash ningui: Mandaj Jatun Diosca, cashnatapashmi nin: ‘¿Chai uvas yuraguca, ali viñajungallachu? ¿Nachu paipaj sapicuna fitirijpica, muyupash chingashpa tucuilla chaquinga? Paipaj juyailla fangacunaca anguyashpami, tucuilla chaquinga. Paita sapimanda surcungapaca, tucui ushaihuan, ashtaca runacunahuanga na surcushachu.

10Chai tarpushca yurata ricuichi. ¿Aliguta viñajungallachu? Indi llujshimuj ladomanda rupajlla huaira chayamujpica, ¿nachu anguyashpa tucuilla chaquinga? Verdella yura cashpapash, tarpushca huachupillatami chaquinga’ ninmi ni” nihuarcami.

11Mandaj Diosca, cai shimicunatami cashna nishpa villahuarca:

12“Chai na cazuj runacunataca, cunanga cashna ni: ‘Caicuna ima cajtaca, ¿nachu yachanguichi?’ ningui. Shinallata cashnatapash ningui: ‘Ricuichi, Babilonia llactata jatun mandajca, Jerusalenman shamushpami, cangunata jatun mandajtapash, pai churashca mandajcunatapash, Babilonia llactaman paihuan aparca.

13Shinallata jatun mandajpaj mirai puramanda shuj mandajta japishpami, paihuan ari ninajuchun juramentuchirca. Cai llactapi causanajuj ninan ushaita charijcunatapashmi, paihuan apashpa rirca.

14Jerusalenda mandajcuna ama cutin mandangapaj jatarishpa, ñavita urai cumuchishpa causachunmi, shina rurarca. Paihuan ari nishcata pactachishpa, paita cazushpa catichunmi, shina rurarca.

15Ashtahuangarin ari nij runaca paita jariyashpami, jatun mandajpaj randi rimajcunata Egiptoman cachashpa, caballocunatapash, ashtaca runacunatapash mañarca. ¿Shina ruraj runaca, imapipash ali llujshishpa quishpiringachu? ¿Ari ninajushcata na pactachij runaca quishpiringachu?

16Ñucaca causajunipachami. Mandaj Jatun Dios ñucami, cashna nini: Chai runaca, paita mandaj cachun churashca jatun mandajpaj Babilonia llacta chaupipimi huañunga. Paihuan ari nishpa juramentushcata yangapi churashpami, na cazurca.

17Ashtaca gentecunata huañuchingapajmi alpata pircata rurashpa, torrecunata shayachinga. Chai macanajuipica, ashtaca runacunahuan, ashtaca soldadocunahuan cashpapash, Faraonga paimandaca imata ruraitapash na ushangachu.

18Ricuichi, maquita cushpa ari ninajushpa juramentushcataca, yangapi churashpami na cazurca. Cai tucui nalicunata chashna rurashcamandaca, napacha quishpiringachu’ ningui” nihuarcami.

19Chaimanda Mandaj Jatun Diosca, cashnami nin: “Ñucaca causajunipachami. Ñucahuan ari ninajushpa juramentushcata yangapi churashpa na cazushcamandami, paipaj jahuapillata ninan llaquita cachamusha.

20Ñuca linllita paipaj jahuapi shitajpimi, ñuca lazupi prezu japi tucunga. Shina japishpami, Babiloniaman pushamusha. Chai llactapimi, yachashpata ñucata na cazushcataca ricuchi callarisha.

21Shinallata calpashpa tucui pacajujcunapash, paicunapaj soldadocunapash, tucuillami espadahuan huañuchi tucunajunga. Huaquin puchushcacunataca, caita chaita huairapi cachanshnami cachasha. Shina rurajta ricushpami, Mandaj Dios ñucapacha rimashcataca yachanguichi” ninmi.

22Mandaj Jatun Diosca, cashnatapashmi nihuarca: “Jatun cedro quirumanda retoñajuj ñavita fitishpami tarpusha. Punda malquishcata japishpami, juyailla jatun urcu jahuapi tarpusha.

23Chai caspitaca, Israel llactapi tiaj jatun urcupimi tarpusha. Malquicuna viñajpimi, granota fucushpa juyailla cedro quiru tucunga. Chai quiru ucupimi, tucui alasyu ashtaca animalcunaca causanga, llandulla quiru malqui ucupimi causanajunga.

24Jatun quiruta urmachishcatapash, uchilla yurata viñachishcatapash, verdella yurata chaquichishcatapash, chaquishca yurata verdeyachishcatapash, Mandaj Dios ñucallata chashna rurashcatami, sachapi tiaj tucui shuj quirucunaca yachanajunga. Mandaj Dios ñucallatami, chashna nircani. Chaitaca pactachishapachami” nircami.