1Imatapash cashcatapacha ñucaman ruraj
Taita Dioslla, ñuca caparijpica tigrachihuayari.
Ñuca llaquihuan cajpica, canmi cushichihuarcangui.
Ñucata llaquihuayari, ñuca mañashcatapash uyahuayari.
2Huañuna aichayu runacuna, ¿ima horascamanda ñucata
alicachishcataca, nalicachinaman tigrachigringuichi?
¿Ima horascamanda yangacunatalla juyashpa,
llullanatalla mascagringuichi?
3Shujcunata juyaj runataca, paipajlla cachun
Mandaj Diosca, agllashcata yachaichiyari.
Paita ñuca caparishpa mañajpica,
Mandaj Diosca uyangallami.
4Paita manllashpa, juchata na ruranachu canguichi.
Camapi cashpapash, tucui shunguhuan
aligutapacha yarishpa upallaichi.
5Imatapash cashcatapacha rurashpami, animalcunata
carashpa huañuchina canguichi.
Mandaj Diostaca, yariashpami causana canguichi.
6Ashtacacunami: “¿Pita aliguta rurashpa
ñucanchiman ricuchingayari?” ninajun.
Mandaj Dioslla, michashna cambaj ñavigutaca,
ñucanchiman ricuchiyari.
7Ashtaca granota, llullu vinota charishpa
paicuna cushijushcatapash ashtahuan yalimi
ñuca shungupica, cushijuita cuhuarcangui.
8Casilla, ima manllaipash illajmi
siririsha, chashnallatami puñusha.
Can Mandaj Diosllami, ñucataca imatapash
na manllashpa causachun cuidahuangui.
Who We AreWhat We EelieveWhat We Do
2025 by iamachristian.org,Inc All rights reserved.
