EZEQUIEL 8 - Quichua Imbabura Bible

Millanayaicunata Jerusalenbi rurashcataca, muscuipishnami ricushca

1Sucta huata, sucta quillapaj picha punllapimi, cashna tucurca: Ñucaca, ñuca huasipimi tiajurcani. Judá llactata mandaj rucucunaca, ñuca ñaupajpimi tianajurca. Chaipi tiajujpimi, Mandaj Jatun Diosca paipaj maquita ñuca jahuapi churahuarca.

2Chaipi ñuca ricujujpimi, runaman rijchajca ñapash ricurirca. Chai runaca, cinturasmanda uraica ninami carca. Cinturasmanda vichaica, punchayachijuj bronceshnami punchapamba ricurijurca.

3Runaman chai rijchajca, maquita chutashpami, ñuca uma ajchamanda japihuarca. Chai jipami, Diospaj Espirituca, cai pachamanda jahuaman apashpa Taita Diosca, muscuicunapishna ricuchishpa Jerusalenman apahuarca. Paica, jahua ladoman tiaj ucu punguman yaicuna ladomanmi apahuarca. Chaipica, Mandaj Diosta fiñachij, imamambash rijchaj diospaj ucumi tiashca carca. Paimi, ninanda fiñachin carca.

4Ricui, israelcunapaj Taita Diospaj punchapambaguca, chaipimi carca. Pambapi cashpa, muscuipishna ñucaman ricurishcashnami carca.

5Chaipimi: “Huañuna aichayu runa. Cunanga, jahua ladota vichai ricui” nihuarca.

Shina nijpimi, jahua ladota vichai ricurcani. Chaipica, altarman yaicuna pungu ladopimi, Mandaj Diosta ninandapacha fiñachij imamambash rijchaj dios tiajushca carca.

6Chai jipaca, cashnami nihuarca: “Huañuna aichayu runa. Ñucapajlla huasimanda ñucata anchuchingapajmi, israelcunaca jatun millanayaicunata ruranajun. Paicuna chashna rurajujtaca, ¿nachu ricungui? Ashtahuan cutin tigrarishpa ricui. Caitapash yali millanayaita rurashcatami ricungui” nihuarcami.

7Chai jipaca, ucu patioman yaicuna ladomanmi pushahuarca. Chaipica, patapi shuj utujutami ricurcani.

8Chaipica: “Huañuna aichayu runa. Chai patata allai” nihuarcami. Shina nijpi chai patata allajpica, shuj pungumi ñapash ricurirca.

9Chai jipami, cashna nihuarca: “Chaiman yaicushpa, ashtahuan jatun nali millanayaicunata paicuna chaipi ruranajujta ricugri” nihuarcami.

10Shina nijpimi, chaiman yaicushpa ricugrircani. Chaipimi tucui muyundi pircapica, llucashpa purij tucui animalcunata, tucui mapa animalcunata, israelcunapaj tucui yanga dioscunata pintashpa rurashca carca.

11Chaicunapaj ñaupajpica, Israel puramanda canchis chunga mandaj rucucunami chaipi carca. Paicunapaj chaupipica, Safán shuti runapaj churi Jaazanías shuti runapashmi chaipi carca. Paicunaca, tucuicunami paicunapaj maquipi inciensota cushnichinata charinajurca. Chaimandaca, inciensota cushnichishca yana yana cushnimi, jahuata vichai llujshijurca.

12Chaipimi cashna nihuarca: “Huañuna aichayu runa. ¿Israelcunata mandaj rucucuna yana yana tutapi imata ruranajujta ricunguichu? Paicunaca, tucuicunami paicunapaj huasi ucucunapi, imamambash rijchaj dioscunata pintashca. Paicunaca: ‘Mandaj Diosca ñucanchita na ricujunllu. Mandaj Diosca, cai llactataca saquishcami’ ninajunmi” nihuarcami.

13Chai jipaca, cashnami nihuarca: “Cutin tigrarishpa ricui. Caicunatapash yali millanayaita ruranajujtami ricungui” nihuarcami.

14Chai jipaca, Mandaj Diospaj huasiman yaicuna jahua lado pungumanmi pushahuarca. Chaipica huarmicunami, yarishpa yarishpa huacashpa, Tamuz shuti diosta mañanajushca carca.

15Chaipimi cashna nihuarca: “Huañuna aichayu runa, ¿nachu ricungui? Cutin tigrashpa ricui. Caicunatapash yali ashtahuan millanayaita ruranajujtami ricungui” nihuarcami.

16Chai jipaca, Mandaj Diospaj huasi ucu patiomanmi pushahuarca. Mandaj Diospaj huasiman yaicuna punguhuan altarhuan chaupipica, ishcai chunga pichashna runacunatami ricurcani. Paicunaca, Mandaj Diospaj huasi ladoman huashata tigrachishpami, indi llujshimuj ladoman ricushpa shayanajurca. Paicunaca, indi llujshimuj ladomanllata alpaman chayajta cungurishpami, indita mañanajurca.

17Chaipimi, cashna nihuarca: “Huañuna aichayu runa, ¿nachu ricungui? ¿Judá llactapi causajcuna millanayaita caipi rurashcapash paicunapaca, yangallachu? Paicunaca, cai llactapi nalita rurashcacunata jundachishca jipami, ñucata ashtahuan fiñachingapaj ñucapajman tigramunajurca. Ricui, paicunaca imapash fangacunatami mutijinajun.

18Shinamandami ñucapash ninandapacha fiñarishpa, paicunataca llaquichisha. Ñuca ñaupajmandaca napacha quishpichishachu, paicunataca napacha llaquishachu. Paicunaca, ñuca uyachunmi shinllita caparinajunga. Shina caparinajujpipash, napacha uyashachu” nihuarcami.