ESDRAS 4 - Quichua Imbabura Bible

Na ricunayachijcunami, Diospaj huasita huasichinajujta jarcashca

1Israelcunata Mandaj Taita Diospaj huasitaca, prezu apai tucushcamanda tigramushcacuna shayachi callarinajujtami Judá ailluta, Benjamín ailluta fiñajcunaca uyarca.

2Chaimandami Zorobabel shuti runapajman, ñaupa taitacunapaj huasi ucu puracunata mandajcunapajman shamushpa, cashna ninajurca:

—Cai huasitaca, ñucanchipash cangunahuan shayachishunllami. Ñucanchipash, cangunashnallatami cangunapaj Taita Diosta mascanchi. Ñucanchica, Asiria llactata jatun mandaj Esar-hadón shuti runa, cai llactaman apamushca punllamandapachami, cangunashnallata Diosman animalcunata cushpa huañuchinchi— ninajurcami.

3Shina nijpimi Zorobabel shuti, Jesúa shuti runacunapash, ñaupa taitacunapaj huasi ucupura israelcunata huaquin mandajcunapash, cashna ninajurca:

—Ñucanchi Taita Diospaj huasita cangunahuan tandanajushpa shayachingapaca, ñucanchipica nali ricurinllu. Ashtahuangarin israelcunata Mandaj Taita Diospaj huasitaca, Persia llactata jatun mandaj Ciro shuti runa mandashcashnallata, ñucanchillami shayachina capanchi— ninajurcami.

4Shina nijpipash chai llactapi causajcunaca, Judá llactapi causajcunataca, imatapash nishpami manllachinajurca. Diospaj huasita ama shayachinajuchunmi, chashna manllachinajurca.

5Chai jahuapash, yuyaita cushpa ayudajcunamanmi, huasita shayachishpa tucuchingapaj yarinajushcata jarcachun, culquita pacalla cunajurca. Persia llactata jatun mandaj Ciro shuti runa mandajui tucui huatacunapimi, Persia llactatallata jatun mandaj Darío mandai callaringacaman chashna ruranajurca.

6Jatun mandaj Asuero shuti runa mandai callari huatapimi, Judá llactapi causajcunata, Jerusalenbi causajcunata ninanda fiñashpa juchachishpa, cartata escribishpa cachanajurca.

7Artajerjes shuti runa mandajui punllacunapipipash, shinallatami Bislam, Mitrídates, Tabeel shuti runacunaca, paicunapaj cumbacunahuan tandanajushpa, shuj cartata escribishpa, Persia llactata jatun mandaj Artajerjes shuti runaman cachanajurca. Chai escribishcapi, ima nishcapash arameo rimaipimi carca.

8Escribijcunata mandaj Rehum shuti runapash, Simsai shuti escribijpashmi, Jerusalenbi causajcunata juchachishpa, jatun mandaj Artajerjes shuti runaman shuj cartata cachanajurca.

9Chai punllapica, escribijcunata mandaj Rehum shuti runahuan, escribij Simsai shuti runahuan, paicunapaj cumba huaquin juezcunahuan, caishuj mandajcunahuan, jipa mandajcunahuanmi cartata escribinajurca. Shinallata Persia llactamanda, Erec shuti pueblomanda, Babilonia llactamanda, Susa shuti pueblomanda shamushca elamita nishca gentecunahuanmi escribinajurca.

10Ninanda alicachi tucushca Asnapar shuti jatun mandaj, shuj gentecunata apamushpa, Samaria llactapi tiaj pueblocunapi, shuj llactacunapi causachun churashcacunapash, jatun yacu chimba ladoman tiaj llactacunapi causajcunapashmi escribinajurca.

11Chai cartata shujman yalichishpa escribishpa cachashcapica, cashnami nijun: “Jatun mandaj Artajerjes: Jatun yacu chimba lado llactacunapi causaj canda servijcunami, alillachu capangui nipanchi.

12Can jatun mandajca, yachanami capangui. Judá llactapi causajcunaca, cambaj llactamanda ñucanchipajman vichai shamushpaca, Jerusalenmanmi shamurca. Paicunaca na cazuj, nali gentecuna causashca pueblotami alichinajun. Cai pueblo muyundi jatun pircacunatapash, callari rumicunatapashmi churashpa alichinajun.

13Cunanga, can jatun mandajca, caitapashmi yachana capangui. Cai pueblota cutin shayachishpa, muyundi jatun pircacunatapash cutin shayachishpaca, canman cuna tributotapash, impuestotapash, imamandalla cuna cashcatapash, na ashtahuan cungachu. Shina na cujpica, jatun mandajcunapaj huasipica, culquipash illangami.

14Ñucanchitaca, mandashpa tiajuna huasipi imalla tiashcata carashpa charishcamandami, can jatun mandajta chashna yangapi churanajuchun saquitaca, na ushapanchi. Chaimandami, can jatun mandaj yachachun, villashpa cachamupanchi.

15Caitaca, ama cungangapaj cambaj ñaupa taitacuna escribichishca libropi mascachunmi villapanchi. Ama cungangapaj escribishca libropi mascashpaca, cai pueblopi causajcunaca na cazujcuna cashcata, jatun mandajcunatapash, llactacunatapash llaquichishpa causashcatami yachapangui. Shinallata cai pueblo chaupipica, ñaupa huatacunamandapacha na cazushpa jatarijcuna cashcamanda, cai pueblopash tucurishcatami yachapangui.

16Can jatun mandaj yachachunmi villapanchi. Cai pueblota cutin shayachishpa, muyundi jatun pircata cutin shayachijpica, jatun yacu ashtahuan chai lado llactacunaca, na ashtahuan cambaj cangachu” nishpami escribishca carca.

17Jatun mandajca cashna nishpami, escribishpa tigrachirca: “Escribijcunata mandaj Rehum shuti runatapash, escribij Simsai shuti runatapash, Samaria llactapi causanajuj cangunapaj caishuj cumbacunatapash, jatun yacu chimba ladopi causanajuj caishuj gentecunatapash, alillachu capanguichi, casilla ali causaiguta charipaichi ninimi.

18Canguna cachamushca cartataca, ñami ñuca ñaupajpi alipacha leyishpa uyachihuarca.

19Chaitaca, ñuca mandajpimi mascashpa, cashna nishcata tarinajurca: Ñaupa huatacuna chai pueblopi causajcunaca jatun mandajcunata fiñashpa jatarishpami, na cazunajushca. Shinallata chai pueblopi tandanajushpami, imatapash yarinajushca.

20Jerusalenbica, jatun yacu ashtahuan chai ladoman tiaj tucui llactacunata manllachij, shinlli jatun mandajcunami tiashca. Chai llactacunapi causajcunaca paicunaman tributocunatapash, impuestocunatapash, imamandalla cuna cashcatapash cushpa causashcatami tarinajurca.

21Cunanga, chai runacuna imatalla ruranajushcata saquichun mandaichi. Chai pueblotaca, ñuca cutin mushujta mandangacaman, na alichishpa catinachu.

22Ricuichi, chaita saquichinataca pactarallapash cunganguichiman. ¿Imashpata jatun mandajcunataca ashtahuan llaquichishpa catinajungayari?” nishpami, cartata tigrachimurca.

23Chaimandami, jatun mandaj Artajerjes shuti runa cachamushca cartata shujman yalichishpa escribishcataca Rehum shuti runapaj, escribij Simsai shuti runapaj, paicunapaj cumbacunapaj ñaupajpi leyishpa uyachirca. Chaita uyashpami paicunaca, Jerusalenbi causaj Judá llactamanda runacuna huasichinajushcaman ucha rishpa, ninan ushaihuan ninandapacha llaquichishpa jarcanajurca.

24Shinamandami, Taita Diospaj huasita Jerusalenbi shayachinajushcataca saquinajurca. Persia llactata jatun mandaj Darío shuti runa yaicushpa, ishcai huatata mandangacamanmi chaitaca saquirca.